Ikaal 5 - Uwumbɔr aagbaŋ

Uwumbɔr Aakaal kipiik na aabɔr

¹ Moses nan yin ni Israel aanib ngbaan, le bi kuun ni tɔb chee, le u bui bi ke, “Israel yaab, li pel man ikaal imɔk m ban m di tuk nimi din wee na. Ni pɔɔn nibaa ki bae i, ki li joo i mbamɔm, ki taa yii i.

² Sainai Aajool pu le Tidindaan Uwumbɔr nan puu tipuur tii titetiib,

³ ni mu aa nan ye titetiib baanja le u nan puu tii, tipuur ngbaan ye timi bi laa beenin bi din wee na mu yaan la.

⁴ Lijool ngbaan pu, Uwumbɔr nan len ni chee tibɔr, mmii ponn ni.

⁵ N‑yoonn ngbaan, min le nan sil nimi ni Uwumbɔr aakaasisik ni, le ki tuk nimi waah len pu na, ba pu? ni nan san mmii ngbaan ijawaan, le kaa kaa ke ni buen lijool ngbaan paab. “Le Uwumbɔr nan bui ke,

⁶ ‘Min le ye Nidindaan Uwumbɔr u nyan ni nimi Ijipt aatiŋ ni, nin chee ni nan ye binaagbiib na.

⁷ “‘Ni taa doon liwaal libaa ki kpee min Uwumbɔr pu.

⁸ “‘Ni taa naan tiwan nibaa ki di naŋ paacham aawan nibaa, bee kitiŋ aawan nibaa, bee nnyun ni aawan nibaa, ke ni doon ni.

⁹ Ni taa gbaan kitiŋ ke ni doon liwaal libaa, ba pu? min le ye Nidindaan Uwumbɔr, le maa ban ke m ni ubaa li kpaan yeh nimi. M ga daa binib bi nan mi na, ni baabim, ni biyaabitiib, ni bi mu aayaabitiib aatafal.

¹⁰ M ga li gee binib churbakaa bi mu gee mi, ki kii tii maakaal na.

¹¹ “‘Ni taa yin maayimbil fam fam; min Nidindaan Uwumbɔr ga daa unii u yin maayimbil fam fam na aatafal.

¹² “‘Ni li nyuŋni Likpaakool daal aawiin, ke mu ye maawiin daal la, ke min Nidindaan Uwumbɔr aah tuk nimi pu na.

¹³ Ni kpa iwiin iloob le ni di tun nimi aatun,

¹⁴ le winlole daal ye lifuur daal ke ni li joo dooni mi. Nwiin ngbaan daal kan, nimi, ni nimi aabim, ni nimi aanaagbiib, ni nimi aawakor, ni biwɔwɔm bi bi nimi aatiŋ ni na ubaa taa tun lituln. Cha nimi aanaagbiib fuur ke naah fuur pu na.

¹⁵ Teer man ke ni mu nan ye binaagbiib le Ijipt aatiŋ ni, le min, Nidindaan Uwumbɔr di maapɔɔn sakpiin na nyan ni nimi. Nima pu le m bui nimi ke ni li joo Likpaakool daal mbamɔm.

¹⁶ “‘Aa li pak aate ni aana, ke min Nidindaan Uwumbɔr aah bui si pu na, nima kan, tiwan mɔmɔk ga li ŋan tii si, aan aa li bi ki yunn, kitiŋ ki m ga di tii si na ni.

¹⁷ “‘Aa taa ku unii.

¹⁸ “‘Aa taa gɔr kidagook.

¹⁹ “‘Aa taa su kinaayuk.

²⁰ “‘Aa taa mɔn nnyamɔn paan unii ubaa.

²¹ “‘Aa taa cha aanimbil li man aaŋeen aatɔ aadichal, bee upuu, bee waakpaakon, bee waanaagbiib, bee waawakor, bee waah kpa tiwan nimɔk na pu.’

²² “Ikaal imina le Uwumbɔr nan di tii ni mɔmɔk, buyoonn ni nan kuun dan lijool ngbaan chee na. Waah nan len ni chee tibɔr nneel sakpiin, mmii ponn ni, ni ntaalangbam bɔmbɔm ponn ni na, le u nan di ikaal imina tii nimi. Waa ki di ibaa kpee i pu. U nan ŋmee i ŋitakpapepee ŋilee pu, le ki di i tii mi.

Baah san Uwumbɔr ijawaan pu pu na

²³ “N‑yoonn mu lijool ngbaan pu nan ye mmii ŋmeen, aan ni ŋun nneel pu mbɔmbɔɔn ponn ni na, le nimi aaninkpiib, ni nimi aanibol aayidam nan dan m chee,

²⁴ ki nan bui ke, ‘Tidindaan Uwumbɔr mɔk timi waapɔɔn sakpiin, ni waanyuŋ, buyoonn ti ŋun u len mmii ni na. Din wee, ti kan ke Uwumbɔr yaa len unii chee tibɔr kan, udaan ngbaan ga ŋmaa li beenin fu.

²⁵ Tɔ, taa ban ti li gbiir nkun. Mmii mue ga ku timi. Ti yaa ki ŋun Uwumbɔr len ti chee tibɔr lelee kan, ti ga sil kpo.

²⁶ Unibɔn ubaa kee ŋun Uwumbɔr u bi n‑yoonn mɔmɔk na bi mmii ni ki len u chee tibɔr, aan udaan ki bi, ki kpa limɔfal aa?

²⁷ Moses, gir buen aan ki ti pel Tidindaan Uwumbɔr aah ga len tibɔr timɔk na, ki ki gir ni ki nan tuk timi waah len pu na. Ti ga pel ti, ki gaa ti mɔmɔk.’

²⁸ “N‑yoonn mu Uwumbɔr ŋun kina na, le u bui mi ke, ‘M ŋun binib ngbaan aah len pu na; bi kpa mbamɔn.

²⁹ Bima yaa kpa nlandak ngbaan aaboln kina n‑yoonn mɔmɔk kan, ki yaa ga pak mi ki kii tii maakaal mɔmɔk kan, tiwan mɔmɔk ga li ŋan tii bi, ni biyaabitiib, ki cha n‑yoonn mu kaa kpa ndoon na.

³⁰ Gir buen ti tuk bi ke bi gir kun bido ŋinampal.

³¹ Sin Moses ma kan, gaar m chee do, aan m di maakaal, ni maamɔkm mɔmɔk tuk si. Aa di ikaal ngbaan mɔk binib ngbaan, nima kan, bi ga joo i mbamɔm, ki li bi kitiŋ ki m ban ke m di tii bi na ni.’

³² “Nimi Israel yaab, ni pɔɔn nibaa man, aan ki li ŋani tiwan nimɔk Nidindaan Uwumbɔr bui ke ni ŋa na. Ni taa yii waakaal mubaa man.

³³ Ni li joo i mɔmɔk mbamɔm, aan nima kan, naah ban ni gaa kitiŋ ki aan ki li koo ki ponn ni na, tiwan mɔmɔk ga li ŋan tii nimi, le ni ga yunn ki ponn ni.