Ikaal 34 - Uwumbɔr aagbaŋ

Moses aah nan kpo pu na

¹ Moses nan nyan Moab aateer ni, le ki buen Nebo Aajool wɔb, ki ti jon Pisga Aajool li bi Jeriko aawipuul wɔb na. Lijool ngbaan paab, le Uwumbɔr nan mɔk u kitiŋ ngbaan mɔmɔk; u nan mɔk u Gilead aapepel mɔmɔk, ki yoor kina ki ti ker Dann aatiŋ, ŋŋangan wɔb,

² ki mɔk u Naftali aapepel aah di ti ker pu na, ni Efraim, ni Manase aapepel mu aah di ti ker pu na; ki kpee Juda aapepel mu aah yoor pu ki ti ker liwilir wɔb, Kaasisik ni Aanyusakpem chee pu na,

³ ki di kina ki ti ker Juda aaŋangii wɔb, ki kpee nteer mu dɔ Soar aatiŋ ni, ki ti ker Jeriko aatiŋ aafataŋ ni na; bi yin Jeriko aatiŋ le ke ŋibɔkpal aasui aatiŋ na.

⁴ Le Uwumbɔr bui Moses ke, “Kitiŋ kee le m nan puu tii Abraham, ni Aisak, ni Jakob, ke m ga di ki tii biyaabitiib na. M cha aanimbil le kan ki, maan cha aa koo ki ni.”

⁵ Nima pu na, Moses, u nan ye Uwumbɔr aatutunn na, nan kpo Moab yaab aatiŋ ni, Uwumbɔr aah nan siin pu na.

⁶ Le Uwumbɔr nan sub u Moab yaab aatiŋ aafataŋ ki dɔ tok Bef Peor aatiŋ na ni. Hali ki di nan saa n‑yoonn mue na, ubaa aa nyi Moses aakaakul chee.

⁷ Moses nan saa ŋibin nkub ni moninko le ki nin kpo. Hali waah nan por sakpen pu na, u nan beenin pɔɔ ke unachipɔɔn na, le ki nan beenin waa kina chain.

⁸ Israel yaab nan ŋa waakpuul, Moab yaab aafataŋ ngbaan ni, ki ti saa iwiin piitaa la.

⁹ Le Nunn aajapɔɔn u bi nan yin u ke Josua na nan kpa nlan mu nyani Uwumbɔr chee na, ba pu? Moses nan nyan uma le ke u gaa waasisiiyaan. Israel aanib nan kii Josua aamɔb, ki mu joo ikaal imɔk Uwumbɔr nan di mɔk Moses aan u mu di i tii bi na.

¹⁰ Israel yaab aatiŋ ni, Uwumbɔr aabɔnabr ubaa aa kee nyan ki bi ke Moses aah nan bi pu na, le Uwumbɔr nan len Moses chee tibɔr.

¹¹ Uwumbɔr aabɔnabr ubaa aa kee ŋa iwaan, ni lijinjiir aawan ni Uwumbɔr nan cha Moses ŋa Ijipt yaab aabɔr, ni waayidam, ni waatiŋ mɔmɔk pu na.

¹² Uwumbɔr aabɔnabr ubaa aa kee ŋa ijawaan aawan ni Moses nan ŋa Israel yaab mɔmɔk aanimbiin ni na.