Ikaal 33 - Uwumbɔr aagbaŋ

Moses aah nan mee Uwumbɔr aanyoor ŋa Israel aanibol pu pu na

¹ Uwumbɔr aanii Moses aah nan ŋa tinyoor ti ŋa Israel aanib pu aan ki nin kpo na sɔ:

² Uwumbɔr nan nyan ni Sainai Aajool paab, u nan fii Edom ke nwiin na, le waawiihn nyan ni Parann Aajool paab ki woln waanib pu. Waatuuntiib ŋichur kipiik nan bi u chee ke mmiigaal mu nyan ni uŋangii wɔb na.

³ Uwumbɔr gee waanib, le ki lik binib bi ye u yaab na. Nima pu na, ti gbaani unimbiin ni, le ki keei waamɔb.

⁴ Ti ga ŋa Moses aah di ikaal i tuk timi na aah len pu na. Ima le ye timi Israel yaab aawangol li jer liwangol mɔmɔk na.

⁵ N‑yoonn mu Israel yaab aanibol ni biyidam nan kuun sil na, le Uwumbɔr ŋa baabɔr.

⁶ Moses nan ŋa Rubenn aanibol pu tinyoor ki bui ke, “Rubenn aanibol aah bi siib na pu na, taa cha bi kpo doo.”

⁷ U nan ŋa tinyoor ŋa Juda aanibol pu ki bui ke, “Uwumbɔr, bi yaa wii ki yin si kan, ter bi, Di bi kpaan Israel aanibol ŋiken chee. Uwumbɔr, jan baajaak tii bi, ki ter bi, aan bi nyaŋ baadim.”

⁸ U nan ŋa Liifai yaab aanibol pu tinyoor ki bui ke, “Sin Uwumbɔr le di Urim ni Tumim aawan ni aa joo kpiir saageehn mɔk saanib na tii Liifai yaab bi ye saatutum bamɔm na. Sin le nan toŋ bi Masa aatiŋ ni, le ki lik baabimbin aah bi pu na Meriba aanyun chee.

⁹ Bi nan mɔk ke bi pak si sakpen, ki jer baah pak bitetiib, ni binatiib, ni binaabitiib, ni baabim pu na. Bi kii saamɔb ki nan joo saah puu tipuur ti na mbamɔm.

¹⁰ Bima le ga mɔk saanib aan bi li joo saakaal mbamɔm; Bima le ga di tiwakor toor kitork saabimbiln paab.

¹¹ Uwumbɔr, ter baanibol aan bi li kpa mpɔɔn. Cha aasui li piin baatuln mɔmɔk pu, ki nyaŋ baadim mɔmɔk tii bi, aan bi taa ki ŋmaa ŋa nibaa.”

¹² U nan ŋa tinyoor ŋa Benjaminn aanibol pu ki bui ke; “Linibol limina le Uwumbɔr gee, le ki kii li. Uma le bii bi pu iwiin mɔmɔk, le ki bi bikaasisik ni.”

¹³ U nan ŋa tinyoor ŋa Josef aanibol pu ki bui ke; “Uwumbɔr, ŋa tinyoor ŋa baatiŋ pu, ki cha utaal nu, ki cha nnyun mu nyeeni nya kitiŋ aataab na sɔŋ baatiŋ aan ki li kpa tijikaar.

¹⁴ Cha nwiin nyii baajikaar pu aan ti biir, aan kitiŋ ngbaan li kpa tijikaar n‑yoonn mɔmɔk.

¹⁵ Uwumbɔr, cha baayaayoonn na aagongon li kpa ŋisubinyaan.

¹⁶ Uwumbɔr, cha tiwanyaan mɔmɔk li gbii baatiŋ ni. Uwumbɔr, ŋa tinyoor ŋa bi pu, ki cha bi kan tiwanyaan mɔmɔk. Sin le nan len tibɔr tisufar ti nan gaal mmii kaa wu na ni. Uwumbɔr cha tinyoor timina mɔmɔk dan Josef aanibol pu, ba pu? uma le ye ukpetiib pu usaloln.

¹⁷ Josef aapɔɔn bi le ke unaaja aapɔɔn na, ki pɔɔ ke upɔɔnaa aayiin na, Mubaa le ye Manase aataŋaal ni aanibol aachur na, le muken ye Efraim aataŋaal ni aanibol ŋichur kipiik. U ga di waapɔɔn ngbaan le nyaŋ ŋitimbol ŋi bi na, ki tur ŋi buen dandar.”

¹⁸ U nan ŋa tinyoor ŋa Sebulunn ni Isakar aanibol pu ki bui ke, “Uwumbɔr cha nimi Sebulunn aamaal kan tinyoor baah tun lituln nnyusakpem pu pu na, ki cha Isakar aamaal mu aah kpa liwangol li linampal na moo kpee.

¹⁹ Bi kuuni biwɔwɔm chaa baajool paab, ki ti toor kitork ki Uwumbɔr gee ki na nima chee. Bi kani liwangol sakpen nnyusakpem ni, ni litambol li dɔ kpak nnyusakpem ngbaan na ni.”

²⁰ U nan ŋa tinyoor ŋa Gad aanibol pu le ki bui ke, “Pak Uwumbɔr man, uma le tii bi lipepel li wiir na. Gad aamaal gor ki kiir ke uchinn na, ke bi dar par ŋŋaal mubaa, bee liyipaateer paab aagban.

²¹ Bi nan nyan lipepel li ŋan na, le ki joo bibaa. Bi nan nyan biyidam aasisiiyaan la. Bi nan kii Uwumbɔr aamɔb ki joo waakaal mbamɔm buyoonn Israel yaab aayidam nan kuun ni na.”

²² U nan ŋa tinyoor ŋa Dann aanibol pu le ki bui ke, “Dann bi le ke uchinn u laa diin ki yuk nyan ni Basann aatiŋ ni na.”

²³ U nan ŋa tinyoor ŋa Naftali aanibol pu le ki bui ke, “Uwumbɔr ŋa tinyoor sakpen ŋa Naftali aanibol pu, ki cha waabulchinn li bi bi chee. Baatiŋ mɔk le yoor ŋŋangii wɔb ki ti ker Galilee Aanyusakpem mɔk.”

²⁴ U nan ŋa tinyoor ŋa Aser aanibol pu le ki bui ke, “Ŋinibol ngbaan mɔmɔk ni, nimi le kan tinyoor ki jer ŋiken. Uwumbɔr cha ninaabitiib biken li gee nimi, ki cha nimi aatiŋ li kpa olif aakpan aasui sakpen.

²⁵ Uwumbɔr li kii nimi aatim ke baah di tikur aajaaleŋ tiib le kiir mu na, aan ni li pɔɔ ki ti saa nimi aakundaal.”

²⁶ Israel aanib, ubaa aa ki bi ke nimi Aawumbɔr na, uma le bi paacham, ntaalangbam ni, ki ter nimi.

²⁷ Uwumbɔr le nyaŋni ki kii nimi n‑yoonn mɔmɔk. U joo uŋaal mu bi, kaa kpa ndoon na le kii nimi. Naah tur koo nimi aadim ponn ni ki cha na, le u jenn nyan bi tii nimi, le ki bui nimi ke ni kuln bi mɔmɔk.

²⁸ Nima pu na, le Jakob aayaabitiib bi bibaa pu, ki kpa nsuudoon, ni mpɔɔn, ki bi kitiŋ ki gbii tijikaar, ni ŋisubil aadaan na, nin chee limaln nyani kitaapaak ki sɔŋni kitiŋ ngbaan n‑yoonn mɔmɔk na.

²⁹ Israel yaab, ni kpa mpopiin pam. Lilanibol kpa liyimɔɔn ke nimi na? Nimi aatimbol le Uwumbɔr gaa li lii. Uwumbɔr ubaa le ye nimi aakikiir, ki ter nimi, ki ga li kii nimi, ki tii nimi linyaŋ. Nimi aadim ga san nimi ijawaan ki gaŋ nimi ke ni san bi kinimbaak, le ni ga taa taa bi pu.