Ikaal 32 - Uwumbɔr aagbaŋ

¹ “Kitiŋ ni kitaapaak, ni li ŋun maah len tibɔr ti na man, li pel gbimm man maah bi len pu na.

² Maamɔkm ga lir ke utaal na la, le ki bi kitiŋ pu ke limaln na. Maamɔbon ga lir ke titaapupur aah lir timoor ti laa diin na pu na la, ki ki naahn ke utaal u lir yɔl yɔl timoor ti laa chiin na pu na.

³ M ga pak Uwumbɔr aayimbil, le waanib ga len waah kpa mpɔɔn sakpen pu na.

⁴ Uwumbɔr u ye mpɔɔnsakpiindaan na le ye saakikiir, u bi chob, ki ŋani waawan mɔmɔk mbamɔm. U ŋani ni ŋan na, kaa kpa imaagann.

⁵ Nimi Aawumbɔr ŋani waah len pu na, nimi le aa si chob, kaa ŋeer ke ni li ye waanib, le kaa ye mbamɔndam, ki ye litimbol li ŋmanni, ki ye titunwanbirdam na.

⁶ Nimi bijɔrb bi kaa kpa nlan na, Uwumbɔr aah ŋa nimi tibulchinn ti na, kina le ni ga giin pa u uu? Naa ye uma le ye nite u naan nimi, ki ŋa nimi litimbol na aa?

⁷ Ni teer man n‑yoonn mu jer na, n‑yaayoonn na aabɔr; ni baa nitetiib aan bi tuk nimi tiwan ni nan ŋa na, ni baa bijaninkpiib aan bi tuk nimi n‑yoonn na aabɔr.

⁸ Uwumbɔr Mpɔɔnsakpiindaan le tii ŋinibol mɔmɔk baatim. Uma le nyan unii mɔmɔk aah ga kal nin chee na. Uma le siin ŋitimbol mɔmɔk aatim aanaanmɔk,

⁹ le ki nyan Jakob aamaal ke bi li ye waanib.

¹⁰ Bi nan chuun bi nteersakpiin ni, le u kan bi, nteersakpiin mu libuln li kuur na daar aan nibaa aa punni na. Uma le nan lik ki kii bi ke waah ga li joo ubaa pu na;

¹¹ ke likaagiil aah mɔk laabim ŋi fii pu na, li joo laafeen le ki teŋni ke ŋi taa lir kitiŋ, kina le Uwumbɔr kiir Israel yaab ke bi taa lir.

¹² Uwumbɔr baanja le joo waanib, le kaa ban nterm liwaal libaa chee.

¹³ Uma le cha bi joo ŋijoo aatim, le ki cha bi ji kipɔɔk ni aasubil. U nan di tisiir ti bi titakpalunn ni na le kpiin bi, le baakpan aasui nan ŋani ntakpateer pu.

¹⁴ Le baawakor nan kpa mbiin pam; baapiih, ni iŋoob, ni inaa nan filk sakpen; bi nan kpa tijikaar ni ŋisubil aadaan ni ŋan na.

¹⁵ Uwumbɔr aanib ngbaan nan kan liwangol, le ki tee kpa tafalaaŋun. Bi nan ji ti babr, le ki filk. Bi nan yii Uwumbɔr u naan bi, ki ye Mpɔɔnsakpiindaan u gaa bi lii na.

¹⁶ Baah nan dooni ŋiwaa ŋi na le nan cha lipiipoln chuu Uwumbɔr. Baah tun titunwanbir ti na cha liŋuul chuu u.

¹⁷ Bi nan toor kitork ki tii tiwan ni kaa ye Uwumbɔr na la, kinimbɔŋ le bi toor tii: ŋiwaa ŋi biyaajatiib Israel yaab aa nyi ŋi daalbaadaal na, Israel yaab aa kee doon ŋi daalbaadaal.

¹⁸ Bi nan suln Uwumbɔr Mpɔɔnsakpiindaan u gaa bi lii ki tii bi limɔfal na bɔr.

¹⁹ Uwumbɔr aah kan kina na, le u gee liŋuul bi pu, ki yii ujapɔtiib ni ubisatiib,

²⁰ le ki bui ke, ‘Maan ki ter bi kpala, ki lik tiwan ni ga ŋa bi na.’ Bi ye binib bi aasui pɔɔ, kaa ban bi sil mbamɔm na la.

²¹ Baah dii ŋiwaa ŋi na le cha liŋuul chuu mi. Baawaa ŋi kaa ye nibaa aan bi dii ŋi na le cha lipiipoln chuu mi. Nima pu na, m mu ga cha litimbol li kaa ye nibaa na le ŋa bi liŋuul. M ga cha bi li kpa lipiipoln litimbol li aanib ye bijɔrb na pu.

²² Maaŋuul ga fii bi pu ke mmiigaal na ki wu tiwan nimɔk bi dulnyaa wee ni na. Mu ga gaa ki ti pii kitekpiitiŋ ni, le ki wu ŋijoo aataab pel pel.

²³ ‘M ga cha tibɔbir ti bi, kaan doo na, dan bi pu, le ki di maapiin mɔmɔk yur bi.

²⁴ Bi ga kpo nkon, ni iween ponn ni la, le iween i bir na mu ga ku bi. M ga cha tipeewanbir le dan nan lir bi pu, ki cha iwaa i kpa liluul sakpen na mu junn bi.

²⁵ Butɔb ponn ni le bi ga ku nimi aanib bil isanja pu, le ijawaan ga pii nimi nido, ŋichin ni. Le binachipɔm ni bisapɔm ga kpoi, kina le ga pii mbim ni bininkpiib mu.

²⁶ M nan len ke m ga kuln bi, aan nima kan, ubaa aan ki teer bibɔr.

²⁷ Tɔ, maan tee cha baadim li kpa kipupuk, ki bui ke bima le nyaŋ maanib, m mu le daa bitafal kina.’

²⁸ Israel aatimbol aanib ye bijɔrb la, kaa kpa nlan mu kpala.

²⁹ Baa bee tiwan ni bi ŋa aan baadim nyaŋ bi na, kaa bee tiwan ni pii bi na aatataa.

³⁰ Ba ŋa unibaan nan ŋmaa nyaŋ bi binib lichur, aan binib bilee ŋmaa nyaŋ bi binib ŋichur kipiik? Bidindaan Uwumbɔr le nan yii bi, Baawumbɔr u ye Mpɔɔnsakpiindaan na le nan di bi tii baadim.

³¹ Baadim bibaa nyi ke baawaa aa kpa mpɔɔn, kaa kpa mpɔɔn sakpen ke Israel yaab Aawumbɔr na.

³² Baadim ye titunwanbirdam ke Sodom ni Gomora yaab na la, le ki naahn ŋisubil aadaan aasui i lu ŋisubil ŋi to ki kpa liluul na.

³³ Baabimbin ki naahn ndaan mu bi di ikuub aaluul di ŋa mu na la.

³⁴ Uwumbɔr teer baadim aah ŋa bi pu na, le ki kii n‑yoonn mu u gee na ke u daa bitafal.

³⁵ Le Uwumbɔr ga teen bi, ki daa bitafal. N‑yoonn choo, le bi ga nan lir; bundaal bi ga kuln na aa ki daa.

³⁶ Uwumbɔr yaa kan ke waanib aa ki kpa mpɔɔn kpala kan, u ga gaa bi lii. U ga san binib bi tun tii u na kinimbaak, u ga ter bi buyoonn baa ti ki kan nterm na.

³⁷ Le Uwumbɔr ga baa waanib ngbaan ke, ‘Nimi aawaa ŋi ni nan di naadii tii ŋi na bi la?

³⁸ Ni nan joo tiwakor ti filk na le toor kitork tii ŋi, le ki nan tii ŋi ndaan ke ŋi nyu. Dandana wee, cha ŋi dan nan ter nimi, ki san ni ki nan gaa nimi lii, aan m kan.

³⁹ Min baanja le ye Uwumbɔr, ubaa aa ki bi; ŋiwaa ye nnyamɔn aawan la. Min le ga ku unii, min le ga tii unii limɔfal, min le tii unii iween, min le sɔŋni unii aaween, le ubaa aan ŋmaa kpak mi maatuln ni.

⁴⁰ Mbamɔn, maah ye Uwumbɔr u bi cha na pu, m yoor ŋŋaal paacham,

⁴¹ ki puu ke m ga luun maajuk ki ka na le ki cha mbamɔn ŋa. M ga teen maadim baabakaa, ki daa binib bi nan mi na aatafal.

⁴² Maapiin ga kpaln baasin ŋmeen la, le m di maajuk ku binib bimɔk kpak mi na. Maan di cha binib bimɔk tak mi na ubaa, hali binib bi kan titotonn na, ni binib bi bi chur bi na mɔmɔk ga kpoi.’

⁴³ Ŋitimbol mɔmɔk, ni li pak Uwumbɔr aanib, u dar binib bi ku waanib na aatafal. U ga di cha pinn waanib baatunwanbir, le ki daa waadim aatafal ki teen bi.”

⁴⁴ Le Moses, ni Nunn aajapɔɔn u bi nan yin u ke Josua na ŋeer nlahn ngbaan tuk Israel aanib mɔmɔk, le bi ŋun mu.

Moses aah nan di kookoo aabɔr ti sur Israel yaab na

⁴⁵ Moses aah nan di Uwumbɔr aabɔr ngbaan tuk binib ngbaan doo na,

⁴⁶ u nan bui ke, “Ni lik mbamɔm ki taa yii ikaal imɔk m di tuk nimi din wee na. Ni li joo i mɔk nimi aabim, nima kan, bi ga li joo Uwumbɔr aamɔkm ngbaan mbamɔm.

⁴⁷ Ikaal ngbaan aa ye bɔfam, ima le ye nimi aamɔfal. Ni li joo i mbamɔm, nima kan, ni yaa puur Jɔɔdann Aamɔɔdapuul doo kan, ni ga li kpa limɔfafɔfɔŋ, ki li bi kitiŋ ngbaan ni.”

⁴⁸ Liyaadaal ngbaan le Uwumbɔr nan bui Moses ke,

⁴⁹ “Li cha Abarim Aajoo ŋi bi Moab aatiŋ ni ki si tok Jeriko aatiŋ na, aan ki ti jon Nebo Aajool paab, ki lik Kanaann aatiŋ ki m ban m di tii Israel yaab na.

⁵⁰ Lijool ngbaan pu le aa ga kpo, ke aakpel Aaronn aah nan kpo Hor Aajool paab pu na,

⁵¹ ba pu? nimi bilee ngbaan nan yii maamɔb, Israel aanib ngbaan mɔmɔk aanimbiin ni. Buyoonn ni nan fuu Meriba aanyun mu bi gbɔk Kades aatiŋ ki bi Sinn aateersakpiin ni chee na, ni nan yii, kaa tii mi kipak binib ngbaan aanimbiin ni.

⁵² Aa ga li waa kitiŋ ngbaan dandar, le aataa aan taa kitiŋ na, kitiŋ ki m ban m di tii Israel aanib na pu.”