Ikaal 31 - Uwumbɔr aagbaŋ

Josua aah nan gaa Moses aasisiiyaan pu na

¹ Moses nan ki len Israel yaab chee tibɔr timina,

² ki bui ke, “Dandana wee, maabin ye nkub ni moninko la, le maan ki ŋmaa li ye nimi aayidaan. Ni ki kpee na, Uwumbɔr tuk mi ke maan puur Jɔɔdann Aamɔɔl.

³ Nidindaan Uwumbɔr ubaa le ga loln ni pu nsan, ki kuln ŋitimbol ŋimɔk bi nima chee na, aan ni ga ŋmaa gaa baatiŋ. Uwumbɔr le bui ke Josua le ga ŋa nimi aayidaan.

⁴ Uwumbɔr ga kuln binib ngbaan ke waah nan nyaŋ Amor yaab aabɔrb Sihonn ni Og, ki kuln baatiŋ pu na.

⁵ Uwumbɔr le ga cha ni nyaŋ bi; ni ŋa bi tiwan nimɔk m bui nimi ke ni ŋa bi na.

⁶ Ni nya sil, ki li kpa lipobil. Ni taa san bi ijawaan. Nidindaan Uwumbɔr ubaa ga li bi ni chee. Waan jinn nimi inimɔɔn, ki mu aan di nimi lii.”

⁷ Moses nan yin Josua siin ni binib ngbaan mɔmɔk aanimbiin ni ki bui u ke, “Aa nya sil, ki li kpa lipobil. Sin le ga loln binib ngbaan pu nsan, aan ni gaa kitiŋ ki Uwumbɔr nan puu tipuur ke u ga di tii niyaajatiib na.

⁸ Uwumbɔr ubaa le ga loln aa pu nsan ki li bi aa chee. Waan jinn si inimɔɔn, ki mu aan di si lii aabaa, nima pu na, aa taa cha aataakpab yɔl, ki taa san ijawaan.”

Ŋibin ŋilole yaa ti saa kan, bi karn Ikaal aagbaŋ ngbaan

⁹ Moses nan ŋmee Uwumbɔr Aakaal aagbaŋ ngbaan, le ki di mu tii Liifai yaab bi ye bitotoorb ki lik Uwumbɔr Aakaal Aadakaa na, ni Israel yaab aayidam.

¹⁰ U nan bui bi ke, “Ni yaa ti saa ŋibin ŋilole aadoon mɔk, buyoonn ni joo cha pinni ŋipɔɔn na kan,

¹¹ ni karn ikaal ngbaan mpɔɔn pu, Tikakar Aajim aayoonn. Bi yaa dan bi nan doon Nidindaan Uwumbɔr nin chee ni dooni u na kan, ni karn i, aan Israel aanib ngbaan mɔmɔk ŋun.

¹² Aa yin bi mɔmɔk, bijab, ni bipiib, ni mbim, ni biwɔwɔm bimɔk bi nimi aatim ni na, aan bi mɔmɔk nan ŋun ti, ki bee baah ga li pak Nidindaan Uwumbɔr ki kii tii waamɔkm mbamɔm pu na.

¹³ Nima kan, niyaabitiib bi kaa kee ŋun Nidindaan Uwumbɔr Aakaal aabɔr ngbaan na mu ga ŋun ti. Nima le ga cha bi bee ki kii waamɔb, kitiŋ ki ni ban ni puur Jɔɔdann Aamɔɔl ki ti gaa ki na ni, ki ti saa baamɔfal aadoon.”

Uwumbɔr aah nan di kookoo aabɔr ti tuk Moses na

¹⁴ Uwumbɔr nan bui Moses ke, “Saan ki li bi ki yunn. Kina pu na, di Josua dan Maabool ni aan m nan mɔk u waatuln.” Le Moses ni Josua nan dii buen Libool ngbaan ni.

¹⁵ Uwumbɔr nan dan bi chee ntaalangbam ni, le ntaalangbam ngbaan nan sil Libool ngbaan aabisamɔb chee.

¹⁶ Uwumbɔr nan bui Moses ke, “Naan yunn le aa ga kpo. Saakun aapuwɔb, binib ngbaan ga fenn cha mi, ki bii tipuur ti m nan puu tii bi na. Bi ga di mi lii, le ki buen ti doon baah ban bi koo kitiŋ ki ni na aanib ngbaan aawaa.

¹⁷ Bi yaa ŋa kina kan, m ga gee liŋuul bi pu, ki yii bi, le ki ga kuln bi. Tibɔbir pam ga dan bi pu, le ni ga cha bi bee ke min Baawumbɔr aa ki bi bi chee.

¹⁸ Le m ga yii, kaan ki ter bi, ba pu? baah yii ki tun titunwanbir ti ki dooni ŋiwaa na pu.

¹⁹ “Dandana wee, ŋmee nlahn mue ŋa kigbaŋ ni. Di mu mɔk Israel aanib, aan mu li ye seeraa ki tii bi.

²⁰ Maah nan puu pu tii biyaajatiib na, m ga di bi buen kitiŋ ki kpa tiwakor aamoŋmɔpaan ni ŋisubil sakpen na ni. Nima chee le bi ga ti li bi nsuudoon ni, ki kan tijikaar timɔk bi ban na. Tɔ, bi mu ga nan fenn le ki li dooni ŋiwaa. Bi ga yii mi, le ki bii maah puu tipuur ti na,

²¹ le tibɔbir pam ga dan bi pu. Bi ga li beenin gaa nlahn mue, aan mu li ye seeraa ki tii bi. Hali dandana wee, waahr aan m nin di bi buen kitiŋ ki ponn ni m nan puu ke m ga di tii bi na, m nyi baah dak pu na.”

²² Liyaadaal ngbaan kpala, le Moses nan ŋmee nlahn ngbaan bil, le ki mɔk Israel yaab baah ga gaa mu pu na.

²³ Le Uwumbɔr bui Nunn aajapɔɔn Josua ke, “Aa li kpa mpɔɔn, ki li kpa lipobil. Sin le ga loln Israel aanib ngbaan nsan, ki di bi buen kitiŋ ki m nan puu ke m ga di tii bi nan ni, m mu ga li bi aa chee.”

²⁴ Moses nan ŋmee Uwumbɔr Aakaal ŋa kigbaŋ ni, ki pɔɔk ubaa ke u taa suln tibaa bɔr.

²⁵ Waah doo buyoonn na, le u bui Liifai yaab bi ye bitotoorb ki lik Uwumbɔr Aakaal Aadakaa na ke,

²⁶ “Yoor man kigbaŋ ki Uwumbɔr Aakaal bi ki ponn ni na, ki di bil gbaŋ Nidindaan Uwumbɔr Aakaal Aadakaa, aan ki li bi nima ki ye seeraa ki tii waanib.

²⁷ M nyi bisui aah pɔɔ aan bi kpa tafalaaŋun pu na. Maah bi limɔfal ponn ni na, m kan baah bir ki yiir Uwumbɔr pu na, le m yaa kpo kan, bi ga ŋa ni bir ki jer kina na.

²⁸ Kuun ni nimi aanibol ngbaan aayidam mɔmɔk, bi dan m chee, aan m nan tuk bi tibɔr tee; m ga yin kitaapaak ni kitiŋ aan ni li ye timi aaseeraadam.

²⁹ M bee ke m yaa kpo kan, binib ngbaan ga tun titunwanbir, ki yii maah mɔk bi ikaal i na. Le bi yaa ŋa kina kan, n‑yoonn mbaa choo, bi ga nan kan tibɔbir, ba pu? baah ga tun titunwanbir ti na le ga cha Uwumbɔr aaŋuul fii bi pu.”

Moses aalahn

³⁰ Israel yaab ngbaan mɔmɔk aah nan si pel buyoonn na, le Moses gaa nlahn ngbaan mɔmɔk.