Ikaal 30 - Uwumbɔr aagbaŋ

Israel yaab aah ga ŋa pu ki kan tinyoor na

¹ “Dandana wee, m tii nimi nsan ke ni nyan naah gee tiwan ni na, ni ban tinyoor le aan ni ban ntafadaan la? N‑yoonn mu tiwan nimina mɔmɔk ŋa nimi, aan ni bi ŋinibol ŋiken aatim ni, nin chee Nidindaan Uwumbɔr nan cha nimi aadim chur nimi buen na kan, ni ga teer tibɔr ti m joo tii nimi na.

² Nimi ni niyaabitiib yaa fenn dan Uwumbɔr chee, ki di nisui mɔmɔk kii waakaal i m joo tii nimi din wee na kan,

³ Nidindaan Uwumbɔr ga san nimi kinimbaak. U ga ki nyan ni nimi ŋinibol ngbaan aatim mu ni u nan cha ni yaa buen na, ki giin ni nimi, nimi aatiŋ ni, ki tii nimi liwangol.

⁴ Hali ni yaa yaa buen dulnyaa aanaanmɔk kan, Nidindaan Uwumbɔr ga kuun ni nimi tɔb chee ki giin ni nimi,

⁵ le ni ki gaa niyaajatiib aatiŋ. U ga ŋa tinyoor ŋa ni pu, ki kpee nimi liwangol, le ni ga moo pɔr ki li wiir jer niyaajatiib aah nan wiir pu na.

⁶ Nidindaan Uwumbɔr ga tii nimi ni niyaabitiib nsui mu kpa limɔkiir na, nima kan, ni ga li gee u nisui ni mbamɔm, ki li bi kitiŋ ngbaan ni.

⁷ U ga cha ntafadaan ngbaan fenn lir nimi aadim bi nan nimi ki muk nimi na pu.

⁸ Le ni ga ki gir kii waah len pu na, ki joo waakaal imɔk m di tuk nimi din wee na.

⁹ Uwumbɔr ga ŋa tinyoor ŋa ni pu, nimi aatuln mɔmɔk ni, le ni ga li kpa mbim ni tiwakor pam, le nimi aakpaakon ga ŋa tijikaar pam. U ga li kpa mpopiin ke u tii nimi liwangol, ke waah nan kpa mpopiin ki tii niyaajatiib pu na.

¹⁰ Ni mu di nisui mɔmɔk fenn gir ni u chee, ki pɔɔ nibaa ki kii waah len pu na, ki joo waakaal imɔk ŋmee ki bi mmɔkm aagbaŋ kee ponn ni na.

¹¹ “Ikaal i m joo tuk nimi din wee na aa pɔɔ, ki mu aa bi nin chee daa na.

¹² Yaa bi kitaapaak, aan ni ga baa ke, ‘Ŋma ga buen ki ti sunn ni i tii ni timi, aan ti ga ŋun i ki kii yaah mɔk pu na?’

¹³ I mu aa ti ki bi nnyusakpem aadapuul, aan ni ga baa ke, ‘Ŋma ga puur buen ki ti yoor i tii ni timi, aan ti ga ŋun i ki kii yaah mɔk pu na?’

¹⁴ I bi gbɔk nimi do. Ni nyi i, le ki ga ŋmaa len i, nima pu na, ni kii yaah mɔk pu na.

¹⁵ “Din aataak kee, m tii nimi nsan ke ni nyan naah gee tiwan ni na, ni ban ni ŋan na le aan ni ban ni kaa ŋan na la, ni ban limɔfal le aan ni ban nkun la?

¹⁶ Ni yaa kii Nidindaan Uwumbɔr aah ban ni ŋa pu na mɔmɔk, ki gee u, ki kii waamɔb, ki joo waakaal imɔk m joo tii nimi din wee na kan, ni ga kan naah ban pu na, ki ŋa litimbol li aanib wiir sakpen na. Le Nidindaan Uwumbɔr ga ŋa tinyoor ŋa ni pu, kitiŋ ki ponn ni, ni ban ni gaa na.

¹⁷ Tɔ, ni yaa yii, kaa ŋun waah len pu na, ki yenn ki ti bi dooni ŋiwaa kan,

¹⁸ u ga kuln nimi. Dandana, m si do le ki bi tuk nimi tibɔr ngbaan. Ni yaa yii waakaal kan, naan yunn Jɔɔdann Aamɔɔdapuul aatiŋ ki ni ban ni puur ki ti gaa ki na ni.

¹⁹ Dandana wee, m tii nimi nsan ke ni nyan limɔfal, bee nkun, ni Uwumbɔr aanyoor, bee waamɔpuur, le m yin kitaapaak ni kitiŋ, ke ni li ye nimi aaseeraadam aan ni nyan naah gee ni na. Nyan limɔfal man.

²⁰ Ni li gee Nidindaan Uwumbɔr, ki kii tii u, ki li dii u mbamɔm. Le nimi ni niyaabitiib ga ti li bi waah nan puu tipuur ke u ga di kitiŋ ki tii niyaajatiib Abraham, ni Aisak, ni Jakob na ponn ni, ki yunn.”