Ikaal 3 - Uwumbɔr aagbaŋ

Israel yaab aah nan nyaŋ ubɔr Og pu na

¹ “Ni paa na, ti nan di buen ŋŋangan wɔb, Basann aapepel ni, le ubɔr Og ni waajab mɔmɔk nyan ni ke bi nan faa timi butɔb, Edrei aatiŋ chee.

² Le Uwumbɔr bui mi ke, ‘Ni taa li san u ijawaan. M ban m di u ni waajab, ni waapepel mɔmɔk, tii nimi la. Ni ŋa u ke naah ŋa Amor yaab aabɔr Sihonn u nan koo Hesbonn aatiŋ ni na pu na.’

³ “Nima pu na, Uwumbɔr nan di ubɔr Og ni waanib ŋa tiŋaal ni, le ti ku bi mɔmɔk.

⁴ N‑yoonn ngbaan, ti nan ki nyaŋ waatim mɔmɔk. Taa nan cha kitiŋ kibaa kina gur. Ntim mu ti nan nyaŋ, Agob aapepel li Basann aabɔr Og nan joo na, nan ti saa ntim imonko itaa la.

⁵ Ntim mue mɔmɔk nan kpa ŋigon ŋi fɔk na, le ki kpa jaaleŋ tiib bi joo laŋ ni ibisamɔi na. Itingbaan pam mu nan bi, kaa kpa ŋigon mann gob ŋi.

⁶ Ti nan bii ntim ngbaan mɔmɔk, ki ku binib bimɔk nan bi mu ni na; ti nan ku bijab, ni bipiib, ni mbim, ke taah nan ŋa Hesbonn aabɔr Sihonn ni waanib pu na.

⁷ Ti nan chur baawakor, ki yoor tiwan mɔmɔk, ntim ngbaan ni.

⁸ “N‑yoonn ngbaan, ti nan gaa Amor yaab aabɔrb bilee ngbaan aatiŋ ki bi Jɔɔdann Aamɔɔl aawipuul wɔb, ki yoor Anonn Aamɔɔl chee ki ti ker Hemonn Aajool mɔk na.

⁹ Tɔ, Saidonn yaab yin Hemonn Aajool ngbaan ke Sirionn, le Amor yaab mu yin li ke Senir.

¹⁰ Ti nan gaa Basann aatiŋ aabɔr Og aapepel mɔmɔk doo; ntim mu nan bi ŋigongon ŋi bi taar na pu, ki kpee Gilead ni Basann aapepel, li di ti nyan Saleka ni Edrei aatim mu bi liwipuul wɔb na.”

¹¹ Ubɔr Og le nan gur ye ŋiniwɔk Refa yaab aakookoo aanii, nima chee. Bi nan di ŋitakpal le ŋa waanikpol aadakaa, waawawaan nan ye ŋitaa ŋiloob la, le waafɔfɔk mu ga nan li pii ŋitaa kipiik ni ŋinaa, le ni dii baah nan ŋaŋni tiwan mɔmɔk pu na. Dakaa ngbaan beenin bi Amonn yaab aatiŋ Raba ni, ki nan saa din.

Ŋinibol ŋi nan kal Jɔɔdann Aamɔɔl liwipuul wɔb na aabɔr

¹² “Taah nan gaa kitiŋ ngbaan na, m nan di lipepel li bi Aroer aatiŋ ŋŋangan wɔb ki bi gbɔk Anonn Aamɔɔl chee, ni ŋigongon aatiŋ Gilead aapepel nibaa wɔb, ni kaatim, le di tii Rubenn ni Gad aanibol.

¹³ M nan di Gilead aapepel li gur na, ni Basann aatiŋ ki ubɔr Og nan joo aan ki ye Agob aapepel mɔmɔk na, tii Manase aanibol ligeln libaa.” Tɔ, bi nan yin Basann aatiŋ ke Refa yaab aatiŋ.

¹⁴ Le Jair, u nan ye Manase aanibol ni aanii na, nan gaa Agob aapepel mɔmɔk. Bi ki yin nima ke Basann, le waanaanmɔk nan di ti ker Gesur ni Maaka aatim mɔk. U nan di waayimbil le yin ntimbim ngbaan, le bi beenin yin mu ke Jair aatim ki nan saa din.

¹⁵ “M nan di Gilead aatiŋ le tii Makir aataŋaal yaab bi nyan ni Manase aanibol ni na;

¹⁶ ki yoor Gilead mɔk ki ti ker Anonn Aamɔɔl na, m nan di nima tii Rubenn ni Gad aanibol la. Limɔɔl ngbaan aakaasisik ni le nan ye baatiŋ ngbaan aaŋangii wɔb aanaanmɔk, le ŋŋangan wɔb aanaanmɔk nan ye Jabok Aamɔɔl mɔk, lipepel ngbaan libaa mu nan ye Amonn yaab aanaanmɔk.

¹⁷ Liwilir wɔb mu, baanaanmɔk nan di kina ti ker Jɔɔdann Aamɔɔl mɔk la, ki yoor Galilee Aanyusakpem ŋŋangan wɔb ki ti saa N‑yaan Aanyusakpem mɔk ŋŋangii wɔb, ki di ti ker Pisga Aajool taab, liwipuul wɔb.

¹⁸ “N‑yoonn ngbaan, maah nan ki di tibɔr ti tuk bi na sɔ: ‘Tidindaan Uwumbɔr le di Jɔɔdann Aamɔɔl aawipuul aatiŋ kee tii nimi. Dandana wee, cha nimi aajab gor bibaa ki puur Jɔɔdann Aamɔɔl, ki loln Israel aanibol ŋi gur na nsan, aan ki ti ter bi mu bi gaa baatiŋ.

¹⁹ M nyi ke ni kpa tiwakor pam, kina pu na, nipuutiib, ni nimi aabim, ni tiwakor ma ga gaar kitiŋ ki m di tii nimi na pu.

²⁰ Ni buen ti ter niŋeen aatɔtiib Israel yaab biken, aan bi mu gaa kitiŋ ki Uwumbɔr ga di tii bi, Jɔɔdann Aamɔɔl aadapuul, liwilir wɔb na, ki ti saa buyoonn Uwumbɔr ga tii bi nsuudoon ke waah tii nimi do pu na. Nee aapuwɔb, ni ga ŋmaa gir kun ni kitiŋ ki m di tii nimi na ni.’

²¹ “Le m tuk Josua ke: ‘Aa kan Nidindaan Uwumbɔr aah nan ŋa bibɔrb bilee na, Sihonn ni Og pu na, kina le u ga ŋa bibɔrb bimɔk ni ga gaa baatim na.

²² Ni taa li san bi ijawaan, Nidindaan Uwumbɔr le ga jan tii nimi.’

Moses aah kaa nan ŋmaa koo Kanaann aatiŋ ni pu na

²³ “N‑yoonn ngbaan le m nan mee Uwumbɔr linimaln mbamɔm ke,

²⁴ ‘Ndindaan Uwumbɔr, m nyi ke aa piin ki mɔk mi saah ga ŋa tiwan sakpenn, ni iwaan aawan ni aa ban ke aa ŋa na. Liwaal libaa aa bi paacham, bee kitiŋ pu, ki ga ŋmaa ŋa tiwan sakpenn nimɔk aa ŋa na.

²⁵ Uwumbɔr, cha m puur Jɔɔdann Aamɔɔl, aan ki kan kitiŋ ki nyuun na, ki bi nima wɔb, ki ye ŋigongon aatinyanyaan ngbaan na, ni Lebanonn Aajoo.’

²⁶ “Le nimi binib bee pu, Uwumbɔr aaŋuul nan fii m pu, le waa kii tii mi. Le u giin bui mi ke, ‘Ni ŋeer a. Taa ki kpiir kina lelee.

²⁷ Li cha Pisga Aajool aapaacham, ki ti lik ŋŋangan wɔb ki ti saa ŋŋangii wɔb, ki ki lik liwipuul wɔb ki ti saa liwilir wɔb. Saah waa tiwan nimɔk na, aa lik ni mbamɔm, ba pu? saa kpa nsan ke aa puur Jɔɔdann Aamɔɔl.

²⁸ Tuk Josua waah ga ŋa pu na. Pɔɔk utaakpab ki sur u, ba pu? uma le ga loln binib ngbaan pu nsan, aan bi puur ki ti gaa kitiŋ ki aa lik waa ki na.’

²⁹ “Nima pu na, ti nan gaar kifataŋ ki dɔ tok Bef Peor aatiŋ na ni.”