Ikaal 28 - Uwumbɔr aagbaŋ

Limɔkiir aanyoor

¹ “Ni yaa kii Nidindaan Uwumbɔr aamɔb, ki joo waakaal i m joo tuk nimi din wee na mbamɔm kan, u ga ŋa nimi litimbokpaan ki jer ŋimɔk bi dulnyaa wee ni na.

² Ni kii Nidindaan Uwumbɔr aamɔb, le tinyoor timina mɔmɔk ga li ye nimi yaan.

³ “Uwumbɔr ga ŋa tinyoor ŋa nimi aatim, ni tisar pu.

⁴ “Uwumbɔr ga ŋa tinyoor ŋa ni pu, ki tii nimi mbim, ni tijikaar, ni tiwakor pam.

⁵ “Uwumbɔr ga ŋa tinyoor ŋa nimi aajikaar pu, le ni li kpa ki ji n‑yoonn mɔmɔk.

⁶ “Uwumbɔr ga ŋa tinyoor ŋa nimi aatuln mɔmɔk pu.

⁷ “Uwumbɔr ga nyaŋ nimi aadim bimɔk tak nimi na; bi ga nya lipepel libaa wɔb le ki nan tak nimi, le ni ga nyaŋ bi, aan bi san yaa ŋipepel mɔmɔk.

⁸ “Nidindaan Uwumbɔr ga ŋa tinyoor ŋa nimi aatuln pu, le ni kan tijikaar gbiin nimi aapil. U ga ŋa tinyoor ŋa ni pu, waah ban u di kitiŋ ki tii nimi na ni.

⁹ “Ni yaa kii Nidindaan Uwumbɔr aamɔb ki ŋa waah len pu na mɔmɔk kan, u ga di nimi ŋa waanib, ke waah nan puu tipuur pu na.

¹⁰ Le binib bi mɔmɔk bi dulnyaa wee ni na ga kan ke Uwumbɔr le nyan nimi ke ni li ye waanib, le bi ga li san nimi ijawaan.

¹¹ Uwumbɔr ga ŋa tinyoor ŋa ni pu, ni li kpa mbim, ni tiwakor, ni tijikaar pam, kitiŋ ki u nan puu tipuur tii niyaajatiib ke u ga di tii nimi na ni.

¹² U ga cha utaal nyan ni paacham ki nan nu n‑yoonn mu ŋeer na, le nimi aatiŋ ga ŋa tijikaar pam, nima kan, ni ga pinn tii ŋinibol pam, le nimi ma aan buen bi chee ke ni ti pinn nibaa.

¹³ Nidindaan Uwumbɔr ga cha ni li ye ŋinibol ŋiken aasaloln, le ŋima aan ŋmaa loln ni pu nsan. Ni yaa joo ikaal imɔk m joo tuk nimi din wee na kan, naan lann nibaa, ni ga li kani tinyoor n‑yoonn mɔmɔk.

¹⁴ Ni taa yii ikaal ngbaan ponn ni mubaa, ki mu taa dii liwaal libaa mu, ki taa li dooni li.

Limɔyiir aatafadaan

¹⁵ “Tɔ, ni yaa yii Nidindaan Uwumbɔr aamɔb, kaa joo waakaal, ni waah bui nimi din wee pu na kan, tibɔbir timina mɔmɔk ga dan ni pu:

¹⁶ “Uwumbɔr ga puun lii nimi aatim, ni tisar pu.

¹⁷ “Uwumbɔr ga puun lii nimi aajikaabim, ni tijikaar ti ni joo mu ŋani na pu.

¹⁸ “Uwumbɔr ga puun lii ni pu, le kaan tii nimi mbim sakpen, tijikaar mu aan li ŋan, le nimi aawakor aan pɔr.

¹⁹ “Uwumbɔr ga puun lii tiwan nimɔk ni ŋani na pu.

²⁰ “Ni yaa tun titunwanbir, ki yii Uwumbɔr kan, u ga cha falaa dan ni pu, le nimi aalandak ŋmal. Tibɔbir ga dan tiwan nimɔk ni ŋani na mɔmɔk ni, le naan yoor n‑yoonn, le ni kuln kookoo.

²¹ U ga cha iween aabɔŋ dan ni pu, le ki kuln ni mɔmɔk, ubaa aan ti ki gur kitiŋ ki ni ban ni gaa ki na ni.

²² Uwumbɔr ga cha iween i door na chur nimi, niwon ga duun, le ki li ton. U ga cha ntaaweel, ni libuln li ton na see nimi aajikaar. Kina aabɔbir ga li bi ni pu, le ni ti kpoi doo.

²³ Utaal aan nu nimi aatiŋ ni, le kitiŋ kuur ki pɔɔk ke tikur na.

²⁴ Uwumbɔr aah ba ga cha utaal nu pu na, le u ga cha kitangbaak ni litambol aataabuŋ daa ki kuln nimi doo.

²⁵ “Uwumbɔr ga cha nimi aadim nyaŋ nimi. Ni ga nya ni lipepel libaa wɔb le ki nan tak bi, le bi nyaŋ nimi ki cha ni san yaa tɔb chee ki buen ŋipepel mɔmɔk. Le dulnyaa ni aanib mɔmɔk yaa kan tiwan ni ŋa nimi na kan, ijawaan ga chuu bi.

²⁶ Ni yaa kpo dɔ kan, inyoon, ni timoor ni aapeel le ga dan ki nan ji nimi aawon, le ubaa aan kan ki jenn i foor.

²⁷ Uwumbɔr ga cha ŋichakpelar yur nimi, ke waah nan ŋa Ijipt yaab pu na. U ga cha niwon kpaln ibuun ŋmeen. Niwon ga kpaln ligbaln ŋmeen, ki saak, le nnyɔk aa bi ki ga tii nimi laafee.

²⁸ Uwumbɔr ga cha ni taa ki li kpa nlan, ki cha ni jɔb, le nimi aalandak ŋmal.

²⁹ Ni ga li chuun tuur nwiin pu ke ujoon na, le kaan bee nin chee ni cha na. Ni yaa ŋa tiwan mɔmɔk kan, naan kan tinyoor kpala. Ni ga li bi falaa ni, n‑yoonn mɔmɔk la, le bi ga li su nimi aawan, ubaa mu aan li bi ki ga ter nimi.

³⁰ “Aa ga li ban ke aa yoor usapɔɔn, le uniyayan ga yoor u ki cha si. Aa ga maa lidichal, ki mu aan koo li ponn ni. Aa ga ko ŋisubil aasaak, ki mu aan ji ŋisubil ngbaan.

³¹ Bi ga ku saanaaja aanimbil ni la, le saan ŋmaa ŋa nibaa, ki mu aan ŋmɔ tinann ngbaan. Bi ga chuu saabon ki dar buen, le aa si lik baah joo i cha pu na, le baan giin ubaa kina tii si. Saadim ga chur saapiih ki dar buen, le ubaa aan ter si ki gaa i tii si.

³² Bi ga chur saanachipɔm ni saasapɔm tinaagbiir, ki di buen biwɔwɔm aatim ni, le aa ga li si lik baah joo bi cha pu na. Idaa mɔmɔk aa ga li si lik ke nibaakan saabim ga san gir ni le aanimbil ti bii, ubaa kina aan gir ni.

³³ Linibol yayan ga dan nan yoor nimi aajikaar mɔmɔk ti ni jin falaa ki kon na buen, le ni ga kan falaa ni ntafadaan mu pɔɔ na n‑yoonn mɔmɔk.

³⁴ Naah ga ji falaa pu na ga cha naan ki li kpa nlan.

³⁵ Uwumbɔr ga cha nitaa wɔb kpaln ibuun i kaan sɔŋ na, i ga li wu pam, le ŋichakpelar ga biin niwon pu, ki yoor niyil ki ti saa nitaafar.

³⁶ “Uwumbɔr ga cha bi di nimi, ni nimi aabɔr buen biwɔwɔm aatim ni, nin chee niyaajatiib, ni nimi nibaa aa kee buen na. Nima chee le ni ga ti li dooni idɔ ni ŋitakpal aawaa.

³⁷ Ntim mu ponn ni Uwumbɔr ga cha ni yaa ki koo mu ni na, binib ngbaan aapobil ga yuk tiwan ni ŋa nimi na pu, le bi ga ŋa nimi mbɔnyun ki nyei nimi.

³⁸ “Ni ga ko tisar pam, le ki mu ga nan chee siib la, ba pu? itoon ga dan ki nan ŋmɔ nimi aajikaar ngbaan.

³⁹ Ni ga bu ŋisubil aasui ki toor i mbamɔm, le ki mu aan nan kan ŋisubil ki ker ki nyu ŋaadaan; ba pu? ŋikpaambil le ga dan nan ŋmɔ tifar ni mpuun mɔmɔk.

⁴⁰ Olif aakpan aasui ga punn nimi aatiŋ ni, ni kookoo, le ni mu aan kan olif aakpan, ba pu? ŋisubil ngbaan ga gbaar lir kitiŋ pel pel.

⁴¹ Ni ga maa japɔtiib ni bisatiib, le ki ga lann bi, ba pu? binib biken ga faa nimi butɔb, ki chur bi buen baatim ni, ki ti ŋa bi binaagbiib.

⁴² Le itoon ga di nimi aasui ni tijikaar ŋmɔ kookoo.

⁴³ “Biwɔwɔm bi koo nimi aatiŋ ni na ga li kani tinyoor ki kpae idaa mɔmɔk, le nimi ma kan, nimi aapɔɔn ga li bar sii sii cha le ki ti doo.

⁴⁴ Biwɔwɔm ngbaan le ga li kpa ŋimombil bi pinn tii nimi, le naan li kpa nibaa ni pinn tii bi. Le ni yaa bi cha kan, bima le ga ti gaa nimi aasaloln ki li joo nimi.

⁴⁵ “Tibɔr ngbaan mɔmɔk ga dan ni pu, le ki li bi kina ki ti kuln nimi, ba pu? ni yii Nidindaan Uwumbɔr aamɔb, kaa joo waakaal imɔk u di tii nimi na.

⁴⁶ Tibɔbir ngbaan ga li ye limɔkl ki tii nimi ni niyaabitiib n‑yoonn mu kaa kpa ndoon na, ki mɔk ke Uwumbɔr daa nitafal.

⁴⁷ Uwumbɔr le ŋani tinyoor ŋani ni pu tiwan mɔmɔk ni, le ni yii ke naan doon u, kaan li kpa mpopiin ki li mɔɔni u pu.

⁴⁸ Kina pu na, ni ga li tun tii nimi aadim bi Uwumbɔr cha bi nan nyaŋ nimi butɔb ni na la. Nkon ni nnyunyuu ga chuu nimi, le ni ga chuun ni ŋmeen, kaan li kpa nibaa, ki ye bigiim. Uwumbɔr ga daa nitafal pam, le ni ti kuln.

⁴⁹ Uwumbɔr ga cha linibol li nyan ni dulnyaa aanaanmɔk aan naa nyi baaliin na nan lir ni pu. Bi ga fii nan lir ni pu, ke likaagiil aah booni chur tiwan pu na la.

⁵⁰ Bi ga li kpa ni pu mbiin, le kaan li san nimi bi por na, ni bi ye biwaatiib na kinimbaak.

⁵¹ Bi ga di nimi aawakor ni tijikaar ji, le nkon ku nimi. Baan ki gur nimi tijikaar, ni ŋisubil aadaan, ni olif aakpan, ni tiwakor, le ni ga kpo.

⁵² Nidindaan Uwumbɔr aah ban u di kitiŋ ki tii nimi na, bi ga tak nimi, nimi aatim mɔmɔk ni. Nimi aagon fɔfɔk ŋi ni maa ki dak ke ŋi pɔɔ na ga lir.

⁵³ “Bi yaa lir nimi aatim pu kan, tijikaar aabɔr ga muk nimi, le ni chur nimi aabim bi Nidindaan Uwumbɔr di tii nimi na ŋmɔ.

^54-55 Bi yaa lir ni pu kan, hali nimi aaninyuun u nyan ni biyidam do na, tijikaar aabɔr ga muk u, le u chur waabim ku ki ŋmɔ; ba pu? waan ki li kpa tijikaar tibaa. Le waan li gee ke una aabo, bee upuu u u gee u sakpen na, bee waabim bi gur na ubaa kan waah ga ŋmɔ biken na pu na.

^56-57 Upii u mu ye uninyuun, ki nyan ni biyidam do, ki kpa ŋimombil sakpen, kaa nya chuun yɔl yɔl na mu ga ŋa kina la. Nimi aadim yaa lir nimi aatim pu kan, tijikaar aabɔr ga muk upii kina aaboln, le u di waabopɔɔn ni libɔl ŋmɔ. Waan kii ke u tii uchal u u gee u na, bee waabim bi gur na tinann ngbaan bi mu ŋmɔ.

⁵⁸ “Ni yaa kaa joo mmɔkm mumɔk bi waagbaŋ ni na mbamɔm, ki yaa kaa pak Nidindaan Uwumbɔr aayimbil li kpa kipak ni ijawaan na kan,

⁵⁹ u ga cha iween i kaan sɔŋ na, ni iweenlirkee i ga li bi ni pu ki cha na, dan ni pu.

⁶⁰ U ga ki cha iweenbir i ni nan kan i Ijipt aatiŋ ni na dan ni pu, le iween ngbaan aan sɔŋ.

⁶¹ U ga ki cha iween i aaboln baa ŋmee yaabɔr ŋa Uwumbɔr aakaal, ni mmɔkm aagbaŋ ni na, dan ni pu, le ki kuln nimi.

⁶² Naah wiir ke iŋmabi na, ni ga ti gur siib la, ba pu? ni yii Nidindaan Uwumbɔr aamɔb.

⁶³ Ni nan mɔ Uwumbɔr le u ŋa tinyoor ŋa ni pu ki cha ni pɔr, ni ga ki li mɔ u ke u bii ki kuln nimi. Bi ga nyan nimi kitiŋ ki ni ban ni koo ki ponn ni ki gaa ki na ni.

⁶⁴ “Uwumbɔr ga cha ni yaa buen ŋinibol ŋiken mɔmɔk ponn ni, ki di ti nya dulnyaa aapepel libaa ki ti ker liken, nima chee le ni ga doon ŋitakpal ni idɔ aawaa ŋi nimi ni niyaajatiib aa nan nyi dooni ŋi na.

⁶⁵ Le naan kan nsuudoon nibaa chee, ki mu aan li kpa nibaa aatiŋ. Uwumbɔr ga cha nisui bii, le nitaakpab yɔl, le naan li kpa nterm nibaa chee.

⁶⁶ Nimi aamɔfal ga li bi linimaln ni, n‑yoonn mɔmɔk la. Ijawaan ga li joo nimi kinyeek ni nwiin pu la, le ni ga li dak ke ni ga kpo.

⁶⁷ Tiwan nimɔk ninimbil kan ni na ga cha ijawaan chuu nimi. Ni yaa ti joor kijook kan, ni ba ga dakl ke ni li ye kichakpiik ni, le ni yaa woln kichakpiik ni kan, ni ba dak ke ni li ye kijook.

⁶⁸ Uwumbɔr ga cha iŋɔsakpiin giin nimi buen Ijipt aatiŋ ni, nin chee u nan puu ke waan cha ni ki gir buen na. Nima chee le ni ga ti pɔɔn nibaa ke ni di nibaa kooh tii nimi aadim aan ki li ye baanaagbiib, le ubaa mu aan li ban ke u daa nimi.”