Ikaal 26 - Uwumbɔr aagbaŋ

Lijikaacheel aapiin aakaal

¹ “Buyoonn Nidindaan Uwumbɔr ti di kitiŋ ngbaan tii nimi aan ni gaa ki mɔmɔk ki kal nima na kan,

² ni mɔmɔk ubaabaa ban tijikaar ti ni chee njan na, ki gbiin tibɔɔkur, ki di buen naah dooni Uwumbɔr nin chee na.

³ Ni buen utotoor u bi lituln ni liyaadaal ngbaan na chee, ki ti bui u ke, ‘Dandana wee m bee ke Nidindaan Uwumbɔr le joo ni mi kitiŋ ki u nan puu tipuur tii tiyaajatiib ke u ga di tii timi na ni.’

⁴ “Utotoor ngbaan ga yoor tijikaar aabɔɔkuuk ngbaan, ki di siin Nidindaan Uwumbɔr aanimbiin ni, kitork aabimbiln taab.

⁵ Le udaan ngbaan ga sil Uwumbɔr aanimbiin ni ki len ke, ‘N‑yaaja nan ye Aram aanii u ye usachuln na la, le ki nan di waamaal buen Ijipt aatiŋ ni ki ti koo nima. Baah nan buen na, baa nan wiir, le ki ti wiir ki ŋa litimbokpaan.

⁶ Le Ijipt yaab ŋa bi mbiin sakpen, ki cha bi tun lituln ke binaagbiib na.

⁷ Le ti wii yin Uwumbɔr, u ye tiyaajatiib Aawumbɔr na, ke u ter timi. U nan ŋun le ki kan timi aafalaa, ni limukl, ni kinimbaak.

⁸ Le u di waapɔɔnsakpiin na nyan timi Ijipt yaab aaŋaal ni. U nan cha iwaan ni lijinjiir aawan ŋa, le ki cha ijawaan aawan ŋa nima chee.

⁹ U joo ni timi do, ki nan di kitiŋ ki kpa tiwakor aamoŋmɔpaan ni ŋisubil sakpen na tii timi.

¹⁰ Nima pu le m joo ni njan aajikaar ti m chee na ke m nan tii uma Uwumbɔr.’ “Aa yaa len kina doo kan, aa di kibɔɔkuuk ngbaan siin Uwumbɔr aanimbiin ni, ki doon u.

¹¹ Li dooni ki pak Aadindaan Uwumbɔr, waah tii si, ni saamaal tiwanyaan nimɔk na, ki cha aa ni Liifai yaab, ni biwɔwɔm bi bi ni chee na kpaan ji njim ngbaan, ki li mɔɔni.

¹² “Libitatar mɔmɔk ni kan, ni nyan nimi aajikaar aapiin ki tii Uwumbɔr. Nimi aasar aajikaar mɔmɔk ponn ni, ni nyan tiwan kipiik kipiik. Ni di tijikaar ngbaan tii Liifai yaab, ni biwɔwɔm, ni nkpobim, ni bikpopiib, nima kan, ntim mɔmɔk aanib ga kan baah ban pu na ki ji. Udaan yaa ŋa kina doo kan,

¹³ u bui Uwumbɔr ke, ‘Tiwan ni ye ki ŋeer m di tii si na nibaa aa ki gur ndo linampal, m di ni mɔmɔk tii Liifai yaab, ni biwɔwɔm, ni nkpobim, ni bikpopiib, saah len ke m ŋa pu na, maa yii saah len pu na, ki mu aa suln.

¹⁴ Maah nan wii ikpowiil na, maa nan jin ti ponn ni, buyoonn maa nan bi chain na, maa nan lee ti ponn ni ngem nyan maadichal ni, ki mu aa lee ti tii bitekpiib. Uwumbɔr, saah bui ke m tii tijikaar aapiin pu na, m ŋa ni mɔmɔk.

¹⁵ Saah bi nin chee paacham ni bi chain na, lik ni saanib Israel yaab ki ŋa bi tinyoor, ki ŋa tinyoor ŋa kitiŋ ki kpa tiwakor aamoŋmɔpaan ni ŋisubil sakpen na ki aa di tii timi na, ke saah nan puu tipuur tii tiyaajatiib pu na.’

Uwumbɔr ubaa aanib

¹⁶ “Din wee na, Nidindaan Uwumbɔr bui ke ni kii tii u, ki li joo waakaal mɔmɔk, nima pu na, ni li joo i mbamɔm nisui mɔmɔk ni.

¹⁷ Ni len din aataak kee, ke Nidindaan le ye nimi Aawumbɔr, ki puu tipuur ke ni ga kii tii u, ki ŋa waah len pu na, ki joo waakaal mɔmɔk mbamɔm.

¹⁸ Din wee na, Uwumbɔr mu gaa nimi ki di ŋa ubaa aanib, ke waah nan puu tipuur pu na, ki bui ke ni li joo waakaal mɔmɔk mbamɔm.

¹⁹ Waah naan ŋinibol mɔmɔk ŋi dulnyaa wee ni na, nimi le u nyan ke u ga ŋa nimi linibol li kpa mpɔɔn sakpen ki jer ŋi mɔmɔk na, le ni ga pak ki nyuŋ waayimbil. Ni ga li ye uma ubaa aanib ke waah nan puu pu na.”