Ikaal 25 - Uwumbɔr aagbaŋ

¹ “Nimi Israel yaab ŋmeen aajab bilee yaa kpa kijaak ki di tɔb buen libɔjil ni, aan ubaa ti jin mbamɔn, uken aabɔr bii kan,

² uja u aabɔr bii na aatafadaan yaa ŋeer ke ni gbaa u kan, ubɔjir cha u doon lichichikr, aan bi lɔe u linaalab. Waataani aapar aah ŋeer pu na, ni lɔe u linaalab ki ti saa kina.

³ Ni ga ŋmaa lɔe u linaalab ki ti saa nfum imonko ilee baanja la. Ni taa cha ni jer kina, ni yaa chaar jer kina kan, ni ga jinn u inimɔɔn biken chee.

⁴ “Ni yaa joo unaaja poi idi kan, ni taa buu umɔb.

Unii aakpel yaa kpo kan, waah ga joo waamaal pu na aabɔr

⁵ “Naabitiib yaa kpaan bi, aan ubaa kpo, kaa kpa ubijabo kan, ukpopii ngbaan taa nya uchal aamaal ni ki ti mɔn lipaal. Utekpiir ngbaan aana aabo di ukpopii na kpan.

⁶ Baah puen ma ubijabo u na le ga sil utekpiir ngbaan aasisiiyaan, nima kan, waamaal aan doo Israel aanib ni.

⁷ Tɔ, utekpiir ngbaan aana aabo yaa yii ke waan yoor ukpopii na kan, upii ngbaan buen kitiŋ ngbaan ni aayidam chee ki ti bui bi ke, ‘Nchawaa aa ban ke nchal li kpa mmaal Israel aanib ni. U yii ke waan di mi kpan aan m maa ubo tii nchal.’

⁸ Le kitiŋ ngbaan ni aayidam yin ni uchawaa na, ki nan baa u ke ti gbii aan taa gbii. Uchawaa ngbaan yaa bui ke waan kpan u kan,

⁹ ukpopii ngbaan ga chuu nyan uja ngbaan aanaatakl libaa aan ki tii timɔɔtan ŋa unimbil wɔb, biyidam ngbaan aanimbil ni, ki bui ke, ‘Bi ŋani uja u yii ke waan yoor una aabo aakpopii ki maa mbim tii u na kina la.’

¹⁰ Le nimi Israel yaab ga li gur yin uja ngbaan aamaal ke, ‘Mmaal mu bi chuu nyan mu aaja aanaatakl na.’

Ikaal iken aabɔr

¹¹ “Bijab bilee yaa jaa, aan bi ponn ni ubaa aapuu dan ke u nan ter uchal, ki chuu uken aanimbiin ni aawan kan,

¹² ni chuu gii uŋaal, ni taa san u kinimbaak.

^13-14 “Ni yaa ban ni kooh nimi aawan ni ni ŋaŋni na kan, ni taa bar ni pu ki ji biken pem pem.

¹⁵ Ni li joo tiwanbamɔnn ŋaŋni, nima kan, Nidindaan Uwumbɔr ga tii nimi limɔfal li fɔk na, kitiŋ ki u ban u di tii nimi na ni.

¹⁶ Uwumbɔr aa gee binib bi ji biken pem pem na.

Bi ku Amalek yaab mɔmɔk

¹⁷ “Naah nan nyan ni Ijipt aatiŋ ni ki choo na, ni teer Amalek yaab aah nan ŋa nimi pu na.

¹⁸ Baa nan san Uwumbɔr ijawaan, nima pu na, naah nan cha ki ti bak na, le bi tak nimi aanib bi nan bee puwɔb na ki ku bi.

¹⁹ Kina pu na, buyoonn Nidindaan Uwumbɔr ti di kitiŋ ngbaan tii nimi, aan ki tii nimi lifuur nimi aadim chee doo na, ni ku Amalek yaab mɔmɔk, nima kan, ubaa aan nan ki teer bibɔr kitaak kibaa daal. Ni taa suln.