Ikaal 24 - Uwumbɔr aagbaŋ

Upii u uchal jenn u lii, aan u ki mɔn uja uken na aabɔr

¹ “Uja yaa yoor upii le ki nan kan ke waabimbin aa ŋan, waa ki gee u kan, u ga ŋmee kigbaŋ ponn ni ke u jenn u, ki di tii u, le ki nin jenn u lii, ki nyan u udo.

² Upii ngbaan yaa ki mɔn uja uken,

³ aan u mu ki kan mbimbin mubaa upii ngbaan ni, ki mu ŋmee kigbaŋ tii u, ki jenn u lii, ki nyan u udo, bee uchal leler ngbaan yaa kpo kan,

⁴ uchakpok na aan ki ŋmaa yoor u, ba pu? u nan ki mɔn tichar a. U yaa ki yoor upii ngbaan kan, ni ye tibɔbir Uwumbɔr chee la. Nidindaan Uwumbɔr aah ban u di kitiŋ ki tii nimi na, ni taa ŋa titunwanbir kina aaboln nima chee.

Ikaal iken aabɔr

⁵ “Uja yaa laa yoor upii kan, ni taa di uja ngbaan buen butɔb yaan, ki mu taa tii u tininkpir aatuln libaa ke u tun, ki ti saa libiln libaa. Nima kan, u ga li bi linampal, upuu chee, aan bi li kpa mpopiin.

⁶ “Ni yaa pinn tiwan tii uja kan, ni taa yoor waanaak ki bi joo nan n‑yon na, ki bui ke u yaa nan pan kan, ni giin tii u. Nimina ga cha uja ngbaan aamaal aan ki kan kinaak ki nan n‑yon, ki ŋa tijikaar ji, ki li bi.

⁷ “Israel aanii umɔk loon chuu uŋeen aatɔ ki di u ŋa waanaagbiija, bee u di u kooh bi ti ŋa u unaagbiinii na kan, ni ku u. Ni yaa ku u kan, ni ga nyan kina aatunwanbir aaboln nibaa chee.

⁸ “Ni ponn ni ubaa yaa kpa tiwon aaween i bir na kan, ni pɔɔn nibaa ki ŋa Liifai aatotoorb aah ga bui nimi pu na. Ni ŋa maah tuk bi ikaal i na mɔmɔk.

⁹ Ni teer Nidindaan Uwumbɔr aah nan ŋa Miriam, buyoonn ni nan nyan ni Ijipt aatiŋ ni pu na bɔr.

¹⁰ “Aa yaa pinn tiwan tii unii kan, taa koo udo ki ti yoor waawanpeenkaan, ke u yaa nan pan si kan, aa giin tii u.

¹¹ Li si lipaal ki cha udaan ngbaan nyan ni waawanpeenkaan ubaa nan tii si.

¹² U yaa ye ugiin kan, aa taa cha tiwan ngbaan doon aa chee ki woln kitaak.

¹³ Kijook mɔmɔk kan, aa giin tiwan ngbaan tii u, nima kan, u ga ŋmaa kan tiwan biin ubaa pu kinyeek. U ga li kpa mpopiin, le Nidindaan Uwumbɔr mu aasui ga piir aa pu.

¹⁴ “Aa yaa yoor unii u ye ugiin kaa kpa na, saatuln ni kan, u yaa ye aaŋeen aatɔ Israel aanii, bee uwɔwɔnja le ki bi saatiŋ ni kan, aa taa ji u pem pem.

¹⁵ Nwiin yaa cha mu ti lir idaa mɔmɔk kan, aa ti pa udaan liyaadaal ngbaan aatuln aapar, ba pu? waa kpa u ji, le ki ban limombil. Aa yaa kaa pan u kan, u ga wii ŋa Uwumbɔr saah ŋa u pu na, le Uwumbɔr ga chuu si taani.

¹⁶ “Uja aabim yaa ŋa bakaa kan, ni taa ku bite, waabim aatunwanbir pu; ni taa ku mbim mu, bitetiib aatunwanbir pu. Unii mɔmɔk ga kpo ubaa aatunwanbir pu la.

¹⁷ “Ni taa cha biwɔwɔm, ni nkpobim lann baabamɔn, ki taa gaa ukpopii aawanpeenkaan, waah pinn aa chee tiwan ni pu na, ki bui ke see u pan saawan tii si, le aa nin giin tii u.

¹⁸ Ni teer ke ni mu nan ye binaagbiib le Ijipt aatiŋ ni, le Nidindaan Uwumbɔr gaa nimi lii, nima pu le m di nkaal ngbaan tii nimi.

¹⁹ “Ni yaa chee nimi aajikaar ki yoor ti kun, aan ki suln ngem bɔr kisaak ni kan, ni taa ki gir ti yoor ti gur na; biwɔwɔm, ni nkpobim, ni bikpopiib le yeh tima ngbaan; nima kan, Nidindaan Uwumbɔr ga ŋa tinyoor ŋa nimi aatuln mɔmɔk pu.

²⁰ Ni yaa ker olif aakpan aasubil nfum mubaa kan, ni taa ki gir buen ti ker ŋi gur na; biwɔwɔm, ni nkpobim, ni bikpopiib le yeh ŋi gur na.

²¹ “Ni yaa ker nimi aasubil nfum mubaa kan, ni taa ki gir buen ti ker ŋi gur na; biwɔwɔm, ni nkpobim, ni bikpopiib le yeh ŋi gur na.

²² Ni taa suln ke ni mu nan ye binaagbiib le Ijipt aatiŋ ni, nima pu le m di nkaal ngbaan tuk nimi.