Ikaal 23 - Uwumbɔr aagbaŋ

Binib bi kaan ŋmaa li ye Uwumbɔr aanib na aabɔr

¹ “Uja u bi lee u, bee bi gii nyan uchakpaln na, aan ŋmaa kpaln Israel aanii ki kpaan Uwumbɔr aanib chee ki doon u.

² “Ubɔnbo, ni waabim, ni uyaabisɔsɔk kipiik pu taa kpaan Uwumbɔr aanib chee.

³ “Amonn yaab, ni Moab yaab, ni biyaabisɔsɔk kipiik pu taa kpaan Uwumbɔr aanib chee.

⁴ Naah nan nyan ni Ijipt aatiŋ ni ki choo na, Amonn yaab nan yii, kaa tii nimi tijikaar ni nnyun; Moab yaab nan yoor Beor aajapɔɔn u bi nan yin u ke Balaam aan u nyan ni Petor aatiŋ ki bi Mesopotamia aapepel ni na, ke u nan puun lii ni pu.

⁵ Le Nidindaan Uwumbɔr aa nan kii tii Balaam. Nidindaan Uwumbɔr aah gee nimi na, u nan cha waah len pu na kpaln tinyoor le ki tii nimi.

⁶ Naah ye litimbol ki kpa limɔfal na, ni taa ter ŋitimbol ngbaan ke ŋi kan tinyoor.

⁷ “Ni taa lik seen Edom yaab, ba pu? bi ye nido yaab la. Ni taa lik seen Ijipt yaab mu, ba pu? ni nan koo baatiŋ ni.

⁸ Baamaal ni, ki nya yaabisɔsɔk tatar mɔmɔk ga ŋmaa kpaan ni chee ki doon Uwumbɔr.

Baah ga li joo butɔb aajab aah kaa nin chee na chain pu na aabɔr

⁹ “Ni yaa ti kuun nin chee ni to butɔb na kan, ni pɔɔn nibaa ki li joo nima chee chain.

¹⁰ Nibaakan, uja ubaa ga doon kinyeek ki daŋ, ki nyeen gbaa ubaa, u nyan biken aah kuun dɔ nin chee na, ki buen nibaa chee n‑gbaan, ki ti li bi nima chee.

¹¹ Joo cha kijook wɔb na, u fu nnyun, aan nwiin yaa lir doo kan, u ki gir dan biken chee.

¹² “Ni ban nibaa chee aan ki li chaa ti sɔnni.

¹³ Ni mɔmɔk ban ŋidabil ki li joo ki kpee nimi aajawan pu, nima kan, unii umɔk sɔnn na gbii titan biin ti pu.

¹⁴ Ni cha nima chee li bi chain, ba pu? Nidindaan Uwumbɔr bi ni chee ki kii nimi, ki ga cha ni nyaŋ nimi aadim. Ni taa ŋa tijɔŋ tibaa ki cha Uwumbɔr fenn upuwɔb tii nimi.

Ikaal iken aabɔr

¹⁵ “Unaagbiija yaa san udindaan chee, ki dan nimi aatiŋ ni, ki nan ban nkiirm kan, ni taa jenn giin u udindaan do.

¹⁶ Ni cha u koo nimi aatiŋ ki u gee na ponn ni, ki taa muk u.

¹⁷ “Nimi Israel yaab ponn ni aaja, bee upii, taa ŋa liwaal libaa aamaakpayal.

¹⁸ Bi yaa ŋa kina aatuln ki kan ŋimombil kan, bi taa joo ni ŋi, ke bi nan pa tipuur aapiin Nidindaan Uwumbɔr Aadichal ni. Uwumbɔr aa gee ŋiwaa aamaakpayal kpala.

¹⁹ “Ni yaa pinn ŋimombil, bee tijikaar, bee tiwan nibaa tii niŋeen aatɔ Israel aanii kan, ni taa li ban tinyoor ki bui ke u pa paan.

²⁰ Ni yaa ye biwɔwɔm kan, ni ga ŋmaa gaa tinyoor ki cha bi pa paan. Ni taa di kina ŋa niŋeen aatɔ Israel aanii. Ni li joo nkaal ngbaan mbamɔm, nima kan, Nidindaan Uwumbɔr ga ŋa tinyoor ŋa nimi aawan mɔmɔk pu, kitiŋ ki ni ban ni ti gaa na ni.

²¹ “Ni yaa puu tipuur tii Nidindaan Uwumbɔr kan, ni taa taan, ni pɔɔn nibaa ki ŋa naah puu ke ni ga ŋa pu na; ni yaa kaa ŋa ti kan, Uwumbɔr ga chuu nimi taani, le ni ye titunwanbir le ke naa gbiin ti.

²² Aa yaa kaa puu tipuur tii Uwumbɔr kan, naa kpa taani.

²³ Tɔ, aa yaa puu tipuur tii Uwumbɔr, aabaa aageehn ni kan, pɔɔn aabaa ki ŋa ti.

²⁴ “Ni yaa chuun cha nsan ki ti kan ubaa aasaak ni ŋisubil aasui kan, ni ga ŋmaa ban ngem ki moo bab, ni taa ker ŋa kibɔɔkuuk ponn ni ki di kun.

²⁵ Ni yaa ti ki chuun cha nsan ki ti kan ubaa aasaak ni njikaabim kan, ni ga ŋmaa di niŋaal ban ngem ki ŋmɔ bab, ni taa di gɔrk chee ti.