Ikaal 21 - Uwumbɔr aagbaŋ

Linikul aabɔr

¹ “Nidindaan Uwumbɔr aah ban u di kitiŋ ki tii nimi na, ni yaa kan unii kpo dɔ kitiŋ ngbaan ni nibaa chee, le naa nyi unii u ku u na kan,

² nimi aayidam, ni bibɔjirb buen ki ti ŋaŋ linikpol ngbaan aah dɔ nin chee na ki ti saa ntim mu peen nima chee na.

³ Biyidam bi aatiŋ aa daa linikpol ngbaan aah dɔ nin chee na ban unaasal u baa kee di u tun lituln na.

⁴ Bi di u buen nin chee nkpen mu puu n‑yoonn mɔmɔk kaa foor, aan baa kee kon nima chee na, ki ti nyii koo usil nima.

⁵ Liifai aanib bi ye bitotoorb na mu li bi nima chee, ba pu? bima le ga ŋmaa len kina aakun aabɔr. Nidindaan Uwumbɔr le nyan bi ke bi li tun waatuln, aan ki li joo waayimbil ŋani tinyoor ŋani binib pu.

⁶ Le biyidam bimɔk nyan ni kitiŋ ki linikpol ngbaan dɔ gbɔk na ŋir biŋaal unaasal ngbaan pu,

⁷ ki bui ke, ‘Taa ku unii wee, ki mu aa nyi udaan u ŋa kina na.

⁸ Uwumbɔr, cha pinn saanib Israel yaab bi aa nyan ni bi Ijipt aatiŋ ni na. Cha pinn timi, ki taa daa titafal, unii u kaa kpa taani na aakun pu.’

⁹ Ni yaa ŋa Uwumbɔr aah ban pu na kan, naan kan ntafadaan unii ngbaan aakun pu.

Bipiib bi ni chur ni bi butɔb ni na aabɔr

¹⁰ “Nidindaan Uwumbɔr yaa tii nimi linyaŋ butɔb ni, aan ni chur binaagbiib kan,

¹¹ ni ponn ni ubaa yaa kan upii nyanyaan bi ponn ni, ki gee u, ki ban aa di u ŋa aapuu kan,

¹² aa di u buen aado ki ti cha u kuu uyikpir, ki wur uŋanbinyanyar,

¹³ ki ban tiwanpeenkaan yayan tii u, u peen. Aa cha u li bi linampal ki wii udo yaab bi kpo butɔb ni na aakpowiil, ki ti saa uŋmal ubaa. Nee aapuwɔb na, aa ga ŋmaa di u ŋa aapuu.

¹⁴ Nee aapuwɔb, aa yaa kaa ki gee u kan, aa cha u li cha kina. Saah nan chuu u mpɔɔn ki doon u chee pu na, aa taa ŋa u ke unaagbiija na ki kooh u.

Ubijabopol aah ga ji lifaal li na aabɔr

¹⁵ “Uja yaa kpa bipiib bilee aan bi mɔmɔk maa mbijabim, aan njan aabo ngbaan aa ye upuu u u gee sakpen na aabo kan,

¹⁶ uja ngbaan yaa ban u yakr waawan tii mbim ngbaan mɔmɔk kan, u taa li kpa imaagann ki di njan aabo aawan tii upuu u u gee sakpen na aabo.

¹⁷ U yaa yakr waawan ngbaan kan, u di nfum mulee yaan tii njan aabijabo, hali waah kaa ye upuu u u gee sakpen na aabo na, u tii u kina. Uja mɔmɔk li nyi ki yakr waawan ki tii njan aabijabo, naah ŋeer ke u kan pu na.

Ubo u kaa ŋun tii una ni ute na aabɔr

¹⁸ “Uja yaa kpa japɔɔn aan u kpa tafalaaŋun, ki yii u ni una aasurm, kaa ŋun tii ute ni una buyoonn bi daa utafal na kan,

¹⁹ ute ni una di u buen kitiŋ ngbaan ni aayidam chee, ki cha bi ji u tibɔr.

²⁰ Ute tuk biyidam ngbaan ke, ‘Tijapɔɔn wee aatafal pɔɔ, le u yii timi aasurm; u bii ŋimombil yɔl yɔl, le ki ye udanyur.’

²¹ Bi cha kitiŋ ngbaan ni aajab mɔmɔk mae ŋitakpal ki ku u, nima kan, ni ga nyan titunwanbir kina aaboln nibaa chee. Binib bimɔk bi Israel aatiŋ kee ni na yaa ŋun naah ŋa pu na kan, bi ga san ijawaan.

Ikaal iken aabɔr

²² “Unii yaa tun titunwanbir aan ni ku u ki di uwon leen busub pu kan,

²³ ni taa cha uwon ngbaan li lee nima chee ki woln kitaak. Ni di tiwon ngbaan sub liyaadaal ngbaan, ba pu? linikpol ngbaan aah lee busub ngbaan pu na, Uwumbɔr ga cha tibɔr dan kitiŋ ngbaan pu. Ni di tiwon ngbaan sub, nima kan, naan bii kitiŋ ki Nidindaan Uwumbɔr ban u di tii nimi na.