Ikaal 20 - Uwumbɔr aagbaŋ

Butɔb aabɔr

¹ “Ni yaa buen ni ti faa nimi aadim butɔb aan ki kan ke bi kpa itaan ni yaatɔroku tiib, ni bijab ki wiir sakpen ki jer nimi kan, ni taa li san bi ijawaan. Nidindaan Uwumbɔr u nyan nimi Ijipt yaab aaŋaal ni na ga li bi ni chee.

² Waahr aan ni nin buen butɔb ngbaan na, utotoor ga nyan sil ki len bijab ngbaan chee ke,

³ ‘Israel yaab aajab, li pel man. Ni cha butɔb din wee la. Ni taa li san nimi aadim ijawaan ki cha nitaakpab yɔl, aan nipobil yuk.

⁴ Nidindaan Uwumbɔr le ga dii nimi buen butɔb ngbaan ni, le ki ti cha ni nyaŋ bi.’

⁵ “Biyidam mu ga len bijab ngbaan chee tibɔr, ki baa bi ke, ‘Ŋma bi do ki laa maa waadichal, kaa kee di li tii Uwumbɔr? Kina aanii yaa ŋmal ni ponn ni kan, u li chaa kun. Nibaakan, u yaa ti bee butɔb ni kan, uniyayan le ga gaa waadichal ngbaan.

⁶ Ŋma bi do ki laa bun ŋisubil aasui kaa kee ker njan aasubil ki jin? Kina aanii yaa ŋmal ni ponn ni kan, u li chaa kun. Nibaakan u yaa ti bee butɔb ni kan, uniyayan le ga ji waasubil ngbaan aamɔɔn.

⁷ Ŋma bi do ki laa ban u yoor upii? Kina aanii yaa ŋmal ni ponn ni kan, u li chaa kun. Nibaakan, u yaa ti bee butɔb ni kan, uniyayan le ga yoor upii ngbaan.’

⁸ “Biyidam ga ki baa bijab ngbaan ke, ‘Ŋma bi do, upobil yuk aan ijawaan chuu u? Kina aanii yaa ŋmal ni ponn ni kan, u li chaa kun. Nibaakan, u ga cha biken mu aapobil yuk, le ijawaan ga chuu bi.’

⁹ Biyidam ngbaan yaa baa bijab kina doo kan, bi nyan bisalolm bi loln bijab ngbaan ŋiker ŋiker pu nsan.

¹⁰ “Ni yaa buen ni ti faa kitiŋ kibaa yaab butɔb kan, njan, ni tii bi nsan bi kii ke bi ga ŋa nimi aanaagbiib.

¹¹ Bi yaa koo biŋaal tii nimi, ki piir baatim aagon aabisamɔi kan, ni di bi mɔmɔk ŋa nimi aanaagbiib, ki cha bi li tun nimi aatuln.

¹² Tɔ, kitiŋ ngbaan yaab yaa kaa kii ke bi di bibaa ŋa niŋaal ni ki ban ke bi to nimi butɔb kan, nimi aajab buen ti gob kitiŋ ngbaan.

¹³ Nidindaan Uwumbɔr aah ga cha ni nyaŋ bi na, ni ku bijab bi mɔmɔk bi kitiŋ ngbaan ponn ni na.

¹⁴ Ni ga ŋmaa chur bipiib, ni mbim, ni tiwakor, ni tiwan nimɔk bi kitiŋ ngbaan ni na mɔmɔk. Ni ga ŋmaa gaa baawan mɔmɔk ki di ŋa naah ban pu na. Uwumbɔr le di ni tii nimi.

¹⁵ Uwumbɔr ban ke ni ŋa binib bi bi dandar ki daa nimi aatiŋ na kina la.

¹⁶ “Nidindaan Uwumbɔr aah joo kitiŋ ki u di tii nimi na, ni yaa nyaŋ ki gaa baatim kan, ni ku unii mɔmɔk.

¹⁷ Ni kuln binib ngbaan pel pel. Bima le ye Hef yaab, ni Amor yaab, ni Kanaann yaab, ni Peris yaab, ni Hif yaab, ni Jebus yaab, ke Uwumbɔr aah nan bui ke ni ŋa pu na.

¹⁸ Ni ku bi mɔmɔk, nima kan, baan ŋmaa ŋmann nimi, ni ŋa tiwan ni kaa ŋan na, ke baah dooni baawaa pu na. Ni yaa ŋa kina kan, ni ga li ye titunwanbir Uwumbɔr aanimbiin ni.

¹⁹ “N‑yoonn mu ni bi pɔɔni nibaa ke ni to butɔb ki gaa baatiŋ na, ni taa gaa ŋisubil aasui lii. Hali butɔb ngbaan yaa ga yunn kan, ni taa ŋa kina. Ni li ker ŋisubil ki moo, ni taa bii isui ngbaan, ba pu? isui ngbaan aa ye nimi aadim.

²⁰ Isui i gur na, ni ga ŋmaa gaa yaadɔ ki di ter nibaa butɔb ngbaan ni, aan ki ti gaa kitiŋ ngbaan.