Ikaal 2 - Uwumbɔr aagbaŋ

Israel yaab aah nan bi nteersakpiin ni na

¹ “Nee aapuwɔb le ti nan ki fii nima, le ki koo nteersakpiin ni, ki dii nsan mu cha Limɔɔkal Aanyusakpem na, Uwumbɔr aah nan bui timi pu na, le ti nan chuun yiini ŋigongon aatiŋ Edom ni, ki yunn pam.

² “Le Uwumbɔr tuk mi

³ ke ti chuun yiini ŋigongon aatiŋ ngbaan ni ki yunn, kina pu na, ti li cha kitiŋ ngbaan aaŋangan wɔb.

⁴ U nan tuk mi ke m bui nimi tibɔr tee: ‘Ni ban ni dii ŋigongon aatiŋ Edom, ki ye nimi aamaal ponn ni aanib Esɔ aayaabitiib aatiŋ na ni le jer. Bi ga li san nimi ijawaan;

⁵ ni mu taa tak bi, ba pu? maan di baatiŋ nibaa chee tii nimi. M di Edom aapepel tii Esɔ aayaabitiib la.

⁶ Ni ga ŋmaa daa bi chee tijikaar, ni nnyun.’

⁷ “Ni teer man Nidindaan Uwumbɔr aah ŋa tinyoor ŋa ni pu nimi aatuln mɔmɔk ponn ni pu na. Naah nan chuun yiini nteersakpiin ponn ni pu na, le u kii nimi, ki joo nimi mbamɔm. Ŋibin imonko ilee ŋimina ponn ni, uma le joo nimi, le ni kan tiwan nimɔk ni ban na.

⁸ “Nima na, ti nan fii nima chee, kaa nan dii nsan mu nya Elaf ni Esionn Geber aatim ni ki cha N‑yaan Aanyusakpem chee na. Ti nan fenn toŋ ŋŋangan ni liwipuul aakaasisik ni, Moab aapepel wɔb.

⁹ Le Uwumbɔr bui mi ke, ‘Taa muk Moab yaab, ki taa tak bi, Lot aayaabitiib le bi na. M di Ar aatiŋ le tii bi, le maan di baatiŋ nibaa chee tii nimi.’”

¹⁰ Ŋiwɔk aanibol li bi yin li ke Em yaab na le nan koo Ar aatiŋ ni. Bi nan fɔk ke Anak yaab bi mu nan ye ŋiwɔk na la.

¹¹ Bi nan yin bi ni Anak yaab mu ke Refa yaab la, le Moab yaab ma nan yin bi ke Em yaab.

¹² Hor yaab le nan koo Edom aapepel ni, le Esɔ aayaabitiib jenn nyan bi, ki kuln baatimbol, ki kal nima chee bibaa, ke Israel yaab aah jenn nyan baadim kitiŋ ki Uwumbɔr di tii bi na ni pu na.

¹³ “Le ti puur Sered Aamɔɔl, Uwumbɔr aah nan bui timi ke ti ŋa pu na.

¹⁴ Taah nan nyan ni Kades Banea buyoonn na aabin piitaa ni ŋiniin le na. Uwumbɔr aah nan bui ke bijab bi waan cha bi koo tipuur aatiŋ ni na nan kpo doo a.

¹⁵ Uwumbɔr le nan gann nyan bi, le ki bii bi mɔmɔk, ŋibin piitaa ni ŋiniin ngbaan ponn ni.

¹⁶ “Bi mɔmɔk aah kpo doo na,

¹⁷ le Uwumbɔr nan bui timi ke,

¹⁸ ‘Din wee, ni bɔ dii Ar aatiŋ ki bi Moab yaab aapepel ni na.

¹⁹ Naan li daa Lot aayaabitiib, Amonn yaab aatiŋ. Ni taa muk bi, ki taa tak bi, ba pu? maah di kitiŋ ki tii bi na, maan ki di ki nibaa chee tii ni mu.’”

²⁰ Bi ki yin lipepel ngbaan ke Refa yaab aatiŋ, ba pu? binib bi nan bi nima chee na, bi nan yin bi kina la, le Amonn yaab ma yin bi ke Samsum yaab.

²¹ Bi nan fɔk ke Anak yaab na la. Bi nan ye linibol li wiir na la, le ki kpa mpɔɔn sakpen. Le Uwumbɔr nan tee kuln bi, ki di baatiŋ tii Amonn yaab, le bi kal nima chee.

²² Kina le Uwumbɔr nan ŋa tii Esɔ aayaabitiib, Edom yaab, bi koo ŋigongon aatiŋ Edom aapepel ni na. U nan kuln Hor yaab, le ki cha Edom yaab gaa baatiŋ ki kal nima chee ki nan saa din.

²³ Krete aadikl aanib le nan ka kpak Kaasisik ni Aanyusakpem aagbaan. Bima le nan kuln Afim yaab. Binib ngbaan le nan pue ka nima chee, le bi kuln bi, ki gaa baatiŋ ki dii ŋŋangii wɔb ki ti nyan Gasa aatiŋ ni.

²⁴ “Taah dii Moab aapepel ki jer doo na, le Uwumbɔr bui timi ke, ‘Dandana wee, fenn ki puur Anonn Aamɔɔl man. M ga di Amor yaab aabɔr Sihonn u koo Hesbonn aatiŋ ni na, ni waatiŋ, ŋa niŋaal ni. Tak u man, ki piin ki gaa waatiŋ man.

²⁵ Din wee ki joo cha, m ga cha ŋipepel mɔmɔk aanib san nimi ijawaan. Unii umɔk ŋun nimi aayimbil bɔr na kan, ijawaan ga chuu u, le uwon gbaa.’

Israel yaab aah nan nyaŋ ubɔr Sihonn pu na

²⁶ “Kedemof aateersakpiin ni, le m nan tun ituun Hesbonn aabɔr u bi yin u ke Sihonn na chee, ki di nsuudoon aabɔr tee bui u ke,

²⁷ ‘Cha ti dii saatiŋ ni ki jer. Ti gaa li dii nsanja le chob, taan paar ki dii nibaa.

²⁸ Ti ga pa tijikaar ti ga ji na pu, ni nnyun mu ti ga nyu na pu. Ti ban le ke ti dii saatiŋ ni jer,

²⁹ aan ki ti puur Jɔɔdann Aamɔɔl, ki koo Tidindaan Uwumbɔr aah ban u di kitiŋ ki tii timi na ni. Esɔ aayaabitiib bi koo Edom aatiŋ ni na, ni Moab yaab bi koo Ar aatiŋ ni na, kii tii timi, le ti dii baapepel ni ki jer.’

³⁰ “Le ubɔr Sihonn nan yii, ke ti taa dii waatiŋ ni jer. Nidindaan Uwumbɔr nan cha usui pɔɔk, le u yii Uwumbɔr aamɔb, le Uwumbɔr cha ti nyaŋ u, ki gaa baatiŋ ki ti laa koo ki ponn ni na.

³¹ “Uwumbɔr nan bui mi ke, ‘Lik, m di ubɔr Sihonn ni waatiŋ ŋa niŋaal ni, le baa ki kpa mpɔɔn, nima pu na, nyaŋ bi, ki gaa kitiŋ ngbaan.’

³² Ubɔr Sihonn ni waajab mɔmɔk nan nyan ni, le ki to timi butɔb, Jahas aatiŋ chee,

³³ le Tidindaan Uwumbɔr nan di bi ŋa tiŋaal ni, le ti nyaŋ bi, ki ku ubɔr ngbaan, ni ujapɔtiib, ni waajab mɔmɔk.

³⁴ N‑yoonn ngbaan, ti nan ki nyaŋ ki kuln waatim, ni binib bi mɔmɔk nan bi mu ni na, bijab, ni bipiib, ni mbim. Taa nan cha unii ubaa kina ŋmar.

³⁵ Ti nan chur baawakor, ki yoor tiwan mɔmɔk baatim ni.

³⁶ Tidindaan Uwumbɔr le nan cha ti gaa ntim ngbaan mɔmɔk, ki nyan Aroer aatiŋ ni, ki di dii Anonn aafataŋ aagbaan, ni kitisakpeŋ ki mu bi kifataŋ ngbaan aakaasisik ni na, ki di ti ker Gilead aatiŋ. Ntim ngbaan mɔmɔk aagon aa nan pɔɔ nyaŋ timi.

³⁷ Tɔ, taa nan buen Amonn yaab aapepel ni, ki mu aa buen Jabok Aamɔɔl aagbaan. Taa nan buen ŋigongon aatim aapepel ni, kaa buen nin chee Tidindaan Uwumbɔr nan bui ke ti taa buen na.