Ikaal 19 - Uwumbɔr aagbaŋ

Mbɔbɔryaan aatim aabɔr

¹ “Nidindaan Uwumbɔr yaa kuln binib bi u ban u di baatiŋ tii nimi na, aan ni gaa baatim, ni baadichal doo, ki kal nima na kan,

^2-3 ni yakr nimi aapepel ngbaan nfum mutaa, aan ki nyan mbɔbɔryaan aatiŋ kibaa ŋipepel ngbaan mɔmɔk ni. Nima kan, unii yaa ku uken kan, u ga ŋmaa san buen nima ki ŋmar.

⁴ Unii ubaa yaa peln ku uken, aan waa ye waadin, kaa nyi mu kan, unikur ngbaan ga ŋmaa san buen ntim ngbaan kibaa ponn ni ki ŋmar.

⁵ Nibaakan, binib bilee yaa buen timoor ni, bi ti gaa idɔ, le ubaa aah bi gaar ndɔ na, waachɔkbim fenn ki ti yun ku uken na kan, unikur ngbaan ga ŋmaa san buen ntim ngbaan kibaa ponn ni ki ŋmar.

⁶ Mbɔbɔryaan aatiŋ ngbaan yaa ye kibaa baanja kan, ni ga li daa lipepel libaa wɔb, le unikur na yaa san cha kan, unii u kpo na aado yaab ga san chuu u nsan ni, ki ku u, u mu aa kpa taani ubaa, ba pu? waa nyi le ki ku u, waa ye waadin.

⁷ Nima pu le m bui nimi ke ni nyan kina aatim mutaa.

⁸ “N‑yoonn mu Nidindaan Uwumbɔr cha ni pɔr kpee, ke waah nan bui niyaajatiib ke u ga ŋa pu, ki di kitiŋ ngbaan mɔmɔk tii nimi doo na kan,

⁹ ni ki nyan ntim mutaa ki kpee. Ni yaa ŋa maah bui nimi din wee pu na mɔmɔk, ki yaa gee Nidindaan Uwumbɔr, ki ŋa waakaal aah mɔk pu na kan, u ga di kitiŋ ngbaan mɔmɔk tii nimi.

¹⁰ Ni nyan kina aatim; nima kan, binib bi kaa nyi ki ku biken na, ni taa ku bi mu, aan ni taa li kpa taani, ke ni ku kina aanii Uwumbɔr aah di kitiŋ ki tii nimi na ni.

¹¹ “Tɔ, nibaakan unii ga li nan uken le ki ku u, ki san buen mbɔbɔryaan aatiŋ ngbaan kibaa ponn ni ke u ŋmar.

¹² Tibɔr kina aaboln yaa ŋa kan, unikur ngbaan aatiŋ aayidam tun bi ti joo ni u, aan ki nan di u ŋa waah ku unii u na aado yaab aaŋaal ni, bi ku u.

¹³ Ni taa san u kinimbaak kpala. Ni ŋa kina, aan Israel yaab aatiŋ ni taa li kpa binikurb, nima kan, ni ga li ŋan tii nimi.

Kitiŋ aapɔnja aabɔr

¹⁴ “Nidindaan Uwumbɔr aah ga di kitiŋ ki tii nimi na, aa taa foor aaŋeen aatɔ aatiŋ aapɔnja u bi nan siin nninkpodoyoonn na.

Seeraadam aabɔr

¹⁵ “Unibaan aan ŋmaa sil ke u ŋa utunwanbirdaan aaseeraadaan aan ni kii ke waah len pu na ŋeer. Binib bilee, bee bitaa ga ŋmaa ŋa seeraadam, le baah len pu na, ni kii ke utunwanbirdaan ngbaan aabɔr bii.

¹⁶ Unii ubaa le yaa gii inyamɔn ki galn uken ke u tun titunwanbir kan,

¹⁷ ni di bimɔk bilee buen nin chee ni kpaani ki dooni Uwumbɔr na, aan bi ti ji baabɔr; bitotoorb ni bibɔjirb bi bi lituln ni liyaadaal ngbaan na le ga ji baabɔr.

^18-19 Bibɔjirb na moo lik tibɔr ngbaan ni mbamɔm, u yaa gii inyamɔn le paan uken na kan, ni di waah gii paan u na aatafadaan di tii u. Kina le ni ga di nyan titunwanbir ngbaan.

²⁰ Le unii mɔmɔk ga ŋun tibɔr ngbaan ki san ijawaan, le ubaa aan kii ke u ŋa kina aabɔr.

²¹ Tibɔr kina aaboln kan, ni taa san u kinimbaak; linikul aapal le ye nkun, linimbil aapal le ye linimbil, linyil aapal le ye linyil, kiŋaafaak aapal le ye kiŋaafaak, kitaafaak aapal le ye kitaafaak.