Ikaal 18 - Uwumbɔr aagbaŋ

Bitotoorb aawan aah ye ni na

¹ “Liifai aanibol, bi ye bitotoorb na, aan li kpa ikpaakon ke ŋinibol ŋiken na. Baah ga li ji tiwan ni na le ye ipiin, ni kitork ki binib joo ni nan tii Uwumbɔr na.

² Bi taa li kpa ikpaakon ke biken aah kpa pu na, baayimɔɔn le ye ke bi ye Uwumbɔr aatotoorb ke waah nan puu tipuur pu na.

³ “N‑yoonn mu ni ti di kiwakork toor kitork na kan, ni di kibook, ni mmɔkpaween, ni lipuul tii bitotoorb.

⁴ Ni di nimi aajan aajikaar tii bi, nima le ye njikaabim, ni ŋisubil aadaan, ni olif aakpan, ni ipiih aakor.

⁵ Uwumbɔr le nyan nimi aanibol ponn ni Liifai yaab, ke bi li ye waatotoorb ki cha n‑yoonn mu kaa kpa ndoon na.

⁶ “Liifai yaab umɔk nyan ni dandar, Israel yaab aatiŋ ni na yaa ban kan, u ga ŋmaa dan nin chee bitotoorb kpaani ki tun Uwumbɔr aatuln na,

⁷ ki mu nan tun tii Udindaan Uwumbɔr, ke Liifai yaab biken aah tun pu na.

⁸ U mu ga kan tijikaar ke biken aah kani pu na, le udo yaab mu aah tii ni u baapiin i na, bi ga di tii u.

Ni taa dii binib bi kaa nyi Uwumbɔr na aah ŋani pu na

⁹ “Ni yaa ti fuu kitiŋ ki Nidindaan Uwumbɔr ban u di ki tii nimi na ni kan, ni taa dii ŋitimbol ŋi ka nima na aasanbir i bi dii na.

¹⁰ Ni taa di nimi aabim see mmii ni, nimi aatork aabimbiln pu. Ni taa cha ubaa le ye ubɔɔ, ubaa mu taa ji nnyɔk. Ubaa taa ban ke u bee tiwan ni ga fe ŋa fen na.

¹¹ Ni taa cha ubaa li joo waanyɔk ŋmanni biken. Ni taa cha ubaa ban nterm bitekpiib chee.

¹² Nidindaan Uwumbɔr aa gee binib bi tun kina aatuln na aabɔr, nima pu le u bi nyani bi kitiŋ ki ni ban ni koo ki ponn ni na.

¹³ Ni pɔɔn nibaa ki li dii Uwumbɔr mbamɔm.”

Uwumbɔr aah puu ke u ga tun ni waabɔnabr pu na

¹⁴ Le Moses ki bui ke, “Binib bi koo kitiŋ ki ni ban ni gaa na dii binib bi ji inyɔk na aasurm la, le ki chaa bibɔɔb chee ki ti ban nterm. Nidindaan Uwumbɔr ma aa gee kina aatuln.

¹⁵ U ga tun ni waabɔnabr u li bi ke min na, udaan ga li ye ninaabitiib ponn ni ubaa la. Ni ŋun tii u.

¹⁶ “Nwiin mundaal ni nan kuun sil Sainai Aajool chee na, ni nan gaŋ ke Uwumbɔr taa ki cha ni ŋun uneel pu, ki taa ki cha ni kan mmii mu ponn ni u nan len tibɔr ni chee na daalbaadaal. Naah nan ŋun kina na, ni nan dak ke ni ga kpo la.

¹⁷ Nima le Uwumbɔr nan bui mi ke, ‘Baah mee tiwan ni na, bi kpa nlan pam.

¹⁸ M ga tun ni maabɔnabr ke saah bi pu na. U ga li ye binaabitiib ponn ni ubaa la. M ga bui u waah ga len pu na, le u ga tuk nimi tiwan nimɔk m ban na.

¹⁹ Ubɔnabr ngbaan ga di maah ban pu na tuk nimi, le umɔk yii na kan, m ga daa utafal.

²⁰ Ubɔnabr umɔk di maayimbil len tibɔr ti maa tuk u na kan, ni ku u kina pu. Le ubɔnabr u mu di ŋiwaa aayimbil len tibɔr na, ni ku u kina pu.’

²¹ “Ni ga baa ke ni ga ŋa kinye ki bee ke ubɔnabr aabɔr ngbaan aa ye Uwumbɔr aabɔr.

²² Ubɔnabr yaa nabr tibɔr aan taa nan gbiin waah len pu na kan, taa ye mbamɔn, le ni mɔk ke taa nyan ni Uwumbɔr chee. Ni mɔk ke ubɔnabr ngbaan len ubaa aageehn aabɔr la. Ni taa san u ijawaan.