Ikaal 17 - Uwumbɔr aagbaŋ

¹ “Kiwakork yaa kaa ŋan, kaa kpa laafee kan, ni taa di ki toor kitork tii Nidindaan Uwumbɔr. Waa gee kina.

² “Nibaakan, ni ga ŋun ke nimi aatiŋ kibaa ponn ni uja, bee upii tun Uwumbɔr titunwanbir ki bii waakaal,

³ ki dooni ŋiwaa, bee nwiin, bee uŋmal, bee iŋmabi, ki yenn Uwumbɔr chee.

⁴ Ni yaa ŋun kina aabɔr kan, ni pɔɔn nibaa ki lik tibɔr ngbaan ponn ni mbamɔm. Ni yaa ye mbamɔn ke titunwanbir ngbaan sil bi Israel aatiŋ ni kan,

⁵ ni nyan udaan ngbaan kitiŋ aagbaan aan ki mee ŋitakpal ku u.

⁶ Ni yaa kpa seeraadam bilee, bee ki jer kina, aan bi len ke tibɔr ngbaan gbii kan, ni ku u. Tɔ, ni yaa ye seeraadaan ubaa baanja kan, ni taa ku u.

⁷ Ni cha seeraadam ngbaan pue mee u ŋitakpal, aan nimi bi gur na mu kpee bi pu, ki ku u. Ni yaa ŋa kina kan, ni ga nyan titunwanbir ngbaan ni chee.

⁸ “Nibaakan, tibɔr tibaa ga li pɔɔ, le bibɔjirb bi bi itingbaan ni na aan ŋmaa toor ti. Ni yaa ye nkun, bee kijaak, bee ubaa yaa tii uken titotonn, bee ubaa yaa gaa uken aawangol kan, ni di kina aabɔr buen nin chee Nidindaan Uwumbɔr nyan aan ni mɔmɔk dooni u na,

⁹ ki di tibɔr ngbaan ŋa bitotoorb bi ye Liifai yaab na, ni ubɔjir u bi lituln ni n‑yoonn ngbaan na aaŋaal ni. Bima le ga lik tibɔr ngbaan ni.

¹⁰ Bi yaa lik ti ponn ni, ki bui nimi pu na kan, ni ŋa baah len pu na.

¹¹ Ni dii baah siin pu na mbamɔm, aan ki ŋa baah mɔk nimi pu na, ki ti doo.

¹² Unii u yii ubɔjir, bee utotoor u bi lituln ni liyaadaal ngbaan na aamɔb kan, ni ku u. Ni yaa nyan udaan ngbaan kina kan, ni ga nyan kina aatunwanbir, Israel aatiŋ ni.

¹³ Unii umɔk ga ŋun tibɔr ngbaan na ga san ijawaan, le kaan kii ke u ŋa kina aatuln.

Baah ga dii pu ki nyan ubɔr na

¹⁴ “Ni yaa ŋmaa nyaŋ ki gaa kitiŋ ki Nidindaan Uwumbɔr ban u di tii nimi na aan ki kal doo kan, ni ga ban ubɔr ke ntim muken aah kpa bibɔrb pu na.

¹⁵ Ni pɔɔn nibaa ki cha Uwumbɔr aah nyan unii u ke u li ye ubɔr na kal nnaan aajal pu. Ni cha nimi Israel yaab ponn ni ubaa ji nnaan ngbaan, u taa li ye uwɔwɔnja.

¹⁶ Ubɔr ngbaan taa li kpa itaan sakpen ki di tii waajab, u mu taa cha bi buen Ijipt aatiŋ ni, ke u ti daa itaan; ba pu? Uwumbɔr bui ke waanib ponn ni ubaa taa ki gir buen kitiŋ ngbaan ni.

¹⁷ Ubɔr ngbaan taa li kpa bipiib sakpen; ba pu? bi ga cha u yenn Uwumbɔr chee; u mu taa li ban tikunabr, ni salmaa ke u ŋa uwankpadaan.

¹⁸ U yaa ŋa ubɔr kan, u pɔɔn ubaa ki li kpa Uwumbɔr aakaal, ni waamɔkm ni nyan ni bitotoorb Liifai yaab aagbaŋ ni na.

¹⁹ U cha kigbaŋ ngbaan li bi u chee n‑yoonn mɔmɔk ki li karni ki, ki ti saa waamɔfal aadoon. Nima kan, u ga bee waah ga ŋa pu ki li nyuŋni Uwumbɔr ki kii waamɔb mbamɔm na.

²⁰ Nima kan, waan dakl ke u jer Israel yaab biken, ki yii Uwumbɔr aasan. Nima kan, u ga yunn nnaan ngbaan ponn ni, le uyaabitiib ga li joo nnaan ngbaan ki yunn pam.