Ikaal 16 - Uwumbɔr aagbaŋ

Lakr‑jer Aajim aabɔr

¹ “Ni nyuŋ Nidindaan Uwumbɔr, ki li ji Lakr‑jer Aajim, Abib aaŋmal ni; uŋmal ngbaan ni aanyeek kibaa, le u nan nyan nimi Ijipt aatiŋ ni.

² Ni kuun buen nin chee ni kpaani ki dooni Uwumbɔr na, ki kɔr nimi aawakor ponn ni ubaa ki ŋa Lakr‑jer aajikaar aan ki nyuŋ Nidindaan Uwumbɔr.

³ Ni yaa ban ni ji tijikaar ngbaan kan, ni taa ŋmɔ boroboro u kpa boroboro aanyɔk na. N‑yoonn ngbaan kan, ni taa ŋmɔ boroboro u kpa boroboro aanyɔk na ki ti saa iwiin ilole, ke naah nan ban ni nya Ijipt aatiŋ ni woween ki ŋman pu na. Ni li ŋmɔ boroboro ngbaan aaboln; ni ga li yin u ke falaa aaboroboro la. Ni li teer nwiin mundaal ni nan nyan Ijipt aatiŋ ki ti nan jin falaa ki ponn ni na, n‑yoonn mɔmɔk.

⁴ Iwiin ilole ngbaan aayoonn, nimi aatiŋ ni aanii ubaa taa li kpa boroboro aanyɔk udo. Tiwakor ti ni kɔr njan aawiin daal, kijook wɔb na, ni mɔmɔk ŋmɔ nimi aawakor aanann doo kinyeek ngbaan.

^5-6 “Nidindaan Uwumbɔr aah ban u di kitiŋ ki tii nimi na, ni mɔmɔk kɔr Lakr‑jer aawakor ngbaan, nin chee ni kpaani ki dooni u na. Ni ŋa kina nwiin aah lir buyoonn na; n‑yoonn ngbaan le ni nan nya Ijipt aatiŋ ni.

⁷ Ni ŋaa tinann ngbaan nin chee ni dooni Uwumbɔr na, ki kpaan ŋmɔ ti mɔmɔk nima, aan kitaak yaa woln kan, ni mɔmɔk gir kun nido.

⁸ Iwiin iloob i gur na, ni li ŋmɔ boroboro u kaa kpa boroboro aanyɔk na, aan winlole daal kan, ni mɔmɔk kpaan ki kuun ti doon Nidindaan Uwumbɔr, ki taa tun lituln libaa liyaadaal ngbaan.

Lijikaacheel aajim aabɔr

⁹ “Buyoonn ni piin ki bi chee nimi aajikaabim na kan, ni piin likpaakool ngbaan ni, ki kahn ti saa ŋikpaakoo ŋilole aan ki ji Lijikaacheel Aajim.

¹⁰ Ni ŋa kina ki nyuŋ Nidindaan Uwumbɔr, ni li joo ni nimi aageehn aapiin, ni ŋeer waah ŋa tinyoor ki tii nimi pu na aapiin.

¹¹ Nimi, ni nimi aamaal, ni nimi aatutum, ni Liifai yaab, ni biwɔwɔm, ni nkpobim, ni bikpopiib bi koo nimi aatim pu na mɔmɔk li kpa mpopiin Uwumbɔr aanimbiin ni. Ni mɔmɔk ŋa kina nin chee ni kpaani ki dooni Uwumbɔr na.

¹² Ni pɔɔn nibaa ki li joo nkaal ngbaan mbamɔm, ki taa suln ke ni mu nan ye binaagbiib le Ijipt aatiŋ ni.

Tikakar Aajim aabɔr

¹³ “N‑yoonn mu ni ti poi nimi aajikaabim ki nyan ŋisubil aanyun doo na aapuwɔb, ni toor Tikakar Aajim aatork mu iwiin ilole.

¹⁴ Nimi, ni nimi aabim, ni nimi aatutum, ni Liifai yaab, ni biwɔwɔm, ni nkpobim, ni bikpopiib bi koo nimi aatim ni na kpaan ji mu, ki li mɔɔni, ki li kpa mpopiin.

¹⁵ Ni ŋa kina aajim nin chee ni kuuni ki dooni Uwumbɔr na, ki ti saa iwiin ilole, ki nyuŋ Nidindaan Uwumbɔr. Uwumbɔr aah ŋa ni pu tinyoor, nimi aatuln ponn ni, ki cha ni chee tijikaar sakpen pu na, ni ŋa njim ngbaan, ki li kpa mpopiin kina pu.

¹⁶ “Nimi aatiŋ ni aajab mɔmɔk kuun dan nin chee ni dooni Uwumbɔr na, ki nan doon u nfum mutaa libiln libaa ni: Lakr‑jer Aajim, ni Lijikaacheel Aajim, ni Tikakar Aajim aayoonn. Uja mɔk li joo ni ipiin waah ŋman pu na,

¹⁷ ni ŋeer Nidindaan Uwumbɔr aah ŋa tinyoor ŋa waatuln li pu na.

Biyidam aatuln aabɔr

¹⁸ “Nyan bibɔjirb, ni biyidam kaan ntim mu Nidindaan Uwumbɔr di tii nimi na mɔmɔk ni. Binib ngbaan li ji tibɔr, ki taa li kpa imaagann.

¹⁹ Bi taa di inyamɔn ni imaagann ji tibɔr, ki mu taa li gaal igaŋgaŋlik, ba pu? ŋimombil ga cha binib bi kpa nlan ki bi mbamɔm na jɔb, le kaan ki li nyi ibamɔn.

²⁰ Ni li ŋani nimi aawan mɔmɔk mbamɔm, ki li si chob, nima kan, ni ga ŋmaa koo kitiŋ ki ni Nidindaan Uwumbɔr ban u di ki tii nimi na ni, aan ki li bi ki ponn ni n‑yoonn mɔmɔk.

²¹ “Ni yaa ŋa nimi aatork aabimbiln kan, ni taa di idɔ ŋa lipiiwaal Asera ki di siin gbaŋ li,

²² ki taa di ŋitakpal kuun bil ke ŋi li ye ŋiwaa, ba pu? Uwumbɔr aa gee ŋiwaa aabɔr.