Ikaal 15 - Uwumbɔr aagbaŋ

Libilolole aabɔr

¹ “Libilolole ngbaan yaa nan jer aan nimi Israel yaab ubaa yaa joo uken aapɔln kan, umombidaan taa ki cha u pa.

² Naah ga ŋa pu na sɔ: Unii umɔk pinn ŋimombil tii uŋeen aatɔ Israel yoo na kan, u taa ki cha u pa, umombidaan taa ki cha u pa tii u. Uwumbɔr ubaa le bui ke ni taa cha bi pa.

³ Binib bi ye biwɔwɔm na ma kan, ni ga ŋmaa cha bi pa nimi aamombil ŋi bi pinn na, ni taa cha nimi aanib ma pa.

⁴ “Nidindaan Uwumbɔr ga ŋa tinyoor ŋa ni pu, kitiŋ ki ponn ni u ban u di tii nimi na.

⁵ Ni yaa joo waakaal mbamɔm ki ŋa maah mɔk nimi din wee pu na kan, nimi aanii ubaa aan li ye ugiin.

⁶ Uwumbɔr ga ŋa tinyoor ŋa ni pu ke waah nan puu pu na. Ni ga li kpa ŋimombil ki pinn tii ŋitimbol pam, le nimi Israel yaab ma kan, naan buen ubaa chee ki ti pinn bi ŋimombil. Ni ga li joo ŋitimbol pam, le litimbol libaa aan ŋmaa joo nimi Israel yaab ma.

⁷ “Israel aanii ubaa yaa ye ugiin, ki bi ntim mu Nidindaan Uwumbɔr ban u di tii nimi na kibaa ponn ni kan, ni taa kpa kukumɔŋ ki yii ke naan ter u.

⁸ Ni pɔɔn nibaa ki li kpa tibulchinn ki pinn tii u, ni ŋeer waah ban pu na.

⁹ Ni taa yii ki bui ke libiln li ni ga di cha pinn bipɔndam na peen a, naan ki tii u nibaa. Ni taa cha tilandakbir kina aaboln koo nisui ni. Ni yaa yii ke naan tii udaan kan, u ga wii ki yin Uwumbɔr naah ŋa u tiwan ni na pu, le Uwumbɔr ga chuu si taani.

¹⁰ Tiin u, ki taa li kpa tilandakbir, ni kukumɔŋ, le Uwumbɔr ga ŋa tinyoor ŋa saatuln mɔmɔk pu.

¹¹ Mbamɔn, n‑yoonn mɔmɔk kan, nimi Israel yaab ngem ga li ye bigiim, kaan li kpa, le ki ga li ban nterm. Nima pu na, m ban ke ni li kpa tibulchinn ki ter bi.

Baah ga ŋa baanaagbiib pu na aabɔr

¹² “Nimi Israel yaab ponn ni, uja, bee upii yaa di ubaa kooh tii si, ke u li ye saanaagbiija, aan ni yaa nan saa ŋibin ŋiloob kan, aa di u lii, u li cha. N‑yoonn mu ŋibin ŋilole ti fuu na kan, aa cha u li cha.

¹³ N‑yoonn ngbaan, aa yaa di u lii kan, aa taa cha u li gaan iŋaalpeen.

¹⁴ Uwumbɔr aah ŋa tinyoor ŋa saawan ni mɔmɔk pu na, aa li kpa tibulchinn ki nyan ni ponn ni tiwan tii u. Tiwan ngbaan ngem le ye tiwakor, ni njikaabim, ni ŋisubil aadaan.

¹⁵ Teer ke ni mu nan ye binaagbiib le Ijipt aatiŋ ni, le Nidindaan Uwumbɔr gaa nimi lii, nima pu le m joo nkaal ngbaan tuk ni mu.

¹⁶ “Tɔ, nibaakan saanaagbiija ngbaan aan li ban ke u nya aado; u ga li gee aa ni saamaal sakpen, le ki ban ke u li bi aado.

¹⁷ Kina pu na, di u buen saadichal aanaakook aabisamɔb ki ti saa chir utafal; le u li gur koo ki ye saanaagbiija ki ti saa waakundaal. Ni ŋa nimi aanaagbiib bi ye bipiib na mu kina.

¹⁸ Aa yaa cha saanaagbiija buen kan, aa taa cha ni li muk si, ba pu? waah tun pu tii si ŋibin ŋiloob ŋi jer na ŋeer ututunn u gaal lipal na aapal nfum mulee pu. Ni li ŋani kina, le Nidindaan Uwumbɔr ga ŋa tinyoor ŋa nimi aatuln mɔmɔk pu.

Baawakor aajan aabim aabɔr

¹⁹ “Ni pɔɔn nibaa ki nyan nimi aanaa ni ipiih ni iŋoob aajan aabim nibaa; ni taa di inaa ngbaan tun lituln libaa, ki taa chee ipiih ngbaan aakor mu.

²⁰ Ŋibin mɔmɔk kan, ni di i buen nin chee ni dooni Uwumbɔr na, ki ti kɔr i, aan nimi, ni nimi aamaal kpaan ŋmɔ i, Uwumbɔr aanimbiin ni.

²¹ Tɔ, nibaa yaa ŋa tiwakor ngbaan, nibaakan ki yaa wɔb, bee ki jɔb, bee ni nibaa chee yaa bii kan, ni taa di ki toor kitork tii Nidindaan Uwumbɔr.

²² Ni ga ŋmaa ŋmɔ tiwakor kina aaboln linampal. Unii u bi chain, bee waa bi chain na kan, ni mɔmɔk ga ŋmaa ŋmɔ tiwakor ngbaan ke naah ŋmɔ ipeeman pu na.

²³ Ni taa di naasin ŋa tijikaar ki ji, ni pɔɔn nibaa ki di mu kpir ke naah kpir nnyun pu na.