Ikaal 14 - Uwumbɔr aagbaŋ

Ikpowiil aakoobil

¹ “Ni ye Nidindaan Uwumbɔr aanib la. Nima pu na, nimi aanii yaa kpo kan, ni taa di kijuk gii niwon nibaa chee, ki mu taa kuu niyigbeer pu aayikpir lii, ke ŋinibol ŋiken aah ŋani pu na.

² Nidindaan Uwumbɔr le yeh nimi, uma le nyan nimi binib bimɔk bi dulnyaa wee ponn ni na, ke ni li ye waanib.

Baah ga li kɔ tiwakor ti na aabɔr

³ “Tiwan nimɔk Uwumbɔr bui ke ni kɔ na kan, ni taa ji ni.

⁴ Ni ga ŋmaa ji tiwakor timina: inaa, ni ipiih, ni iŋoob,

⁵ ni ipeeyun, ni timoor ni aapiih, ni timoor ni aaŋoob, ni ipeeman.

⁶ Ni ga ŋmaa ŋmɔ tiwakor ti aataabuseen yakr, aan ti ŋmɔ timoor ki ki biir ti na.

⁷ Tiwakor ni ipeel i aataabuseen yakr aan ti biir timoor ki ŋmɔ na baanja le ni ga ŋmaa ji ti. Ni taa ji laakumii, ni sandee, ni ŋitakpal ponn ni aalapol. Tiwan ngbaan le kɔ, ni biir timoor ki ŋmɔ, ki mu aataabuseen aa yakr.

⁸ Ni taa li ji igbeer. I kɔ la; ba pu? itaabuseen yakr, le i mu aa biir timoor ki ŋmɔ. Ni taa li ji tiwakor ni ipeel imina, ki mu taa meeh yaawankpol.

⁹ “Ni ga ŋmaa ji ijan i kpa ŋikon ni tipɔkr na.

¹⁰ Tiwan nimɔk bi nnyun ni kaa kpa ŋikon ni tipɔkr na, ni taa ji ni, ni li nyi ke ni kɔ.

¹¹ “Ni ga ŋmaa ji inyoon i kaa kɔ na.

^12-18 Inyoon i kɔ ke ni taa ji i na sɔ: ŋikaagii, ni ifiin, ni kaasaa tiib, ni inyoon i chur iken na, ni inyoon i mu bi ke kaasaa tiib na, ni nangba tiib, ni ŋikakaa, ni taataa tiib, ni inyoon i naahn ineepɔɔn na, ni inyumuil, ni tinanjenn.

¹⁹ “Tiwayukaan nimɔk kpa ifeen ki fiir na mu kɔ, ni taa ji ni.

²⁰ Tiwayukaan ni bi, kaa kɔ na kan, ni ga ŋmaa ji ni.

²¹ “Ni taa ji kiwakork ki kpo kibaa pu na. Ni ga ŋmaa di ki tii biwɔwɔm bi koo ni chee na, bee ni ga ŋmaa di kooh tii biwɔwɔm biken. Nimi ma kan, Nidindaan Uwumbɔr le yeh nimi; ni ye waanib la. “Ni taa di upiih, bee uŋoob aabiin ŋaa waabo.

Baah ga yakr baawan tii Uwumbɔr pu na

²² “Ni yaa kon ki chee nimi aajikaar kan, ni faa ti ŋikpuk kipiik, kipiik, ki ti nyan tibaa kipiik mɔmɔk ponn ni, libiln mɔmɔk ponn ni.

²³ Ni yaa nyan ti ki di kpaan kan, ni di buen Nidindaan Uwumbɔr aah nyan nin chee ke ni li dooni u na, ki ti ji naah nyan njikaabim, ni ŋisubil aadaan, ni olif aakpan, ni nimi aawakor aajan aabim aajim, unimbiin ni. Ni ŋa kina aan ki li nyuŋni Nidindaan Uwumbɔr n‑yoonn mɔmɔk.

²⁴ Nimi ngem yaa bi ntim mu daa nin chee Uwumbɔr nyan ke ni li dooni u, aan naan ŋmaa tun waah tii nimi tijikaar ti na aageln buen kan, naah ga ŋa pu na sɔ:

²⁵ Ni di nimi aajikaar ti ni nyan ke ni ti tii Uwumbɔr na kooh, aan ki di ŋimombil ngbaan buen nin chee ni mɔmɔk dooni Uwumbɔr na.

²⁶ Ni di ŋimombil ngbaan daa naah ban tiwan ni na. Ni ga ŋmaa daa naah ban tiwan ni na. Ni ga ŋmaa daa kiwakork, bee ŋisubil aadaan, bee tiwan nimɔk ni ban na. Le nimi, ni nimi aamaal ga ŋmaa kpaan ki ji tiwan ngbaan Nidindaan Uwumbɔr aanimbiin ni, ki li kpa mpopiin.

²⁷ “Ni taa suln Liifai yaab bi bi nimi aatim ponn ni na bɔr, ba pu? baa kpa bibaa aakpaakon.

²⁸ Ŋibin ŋitaa mɔmɔk kan, ni ti kuun ni naah nyan tijikaar ponn ni kipiik kibaa ke ni di tii Uwumbɔr na, ki nan di bil nimi aatim ni.

²⁹ Tijikaar ngbaan le Liifai yaab, ni biwɔwɔm, ni nkpobim, ni bikpopiib bi bi nimi aatim ni na mu ga li ji. (Liifai yaab aa kpa bibaa aakpaakon.) Nima chee le bi ga dan ki nan kan baah ban tijikaar ti na. Ni li ŋani kina, nima kan, Nidindaan Uwumbɔr ga ŋa tinyoor ŋa nimi aatuln mɔmɔk pu.