Ikaal 12 - Uwumbɔr aagbaŋ

Baah ga li dooni Uwumbɔr nin chee na

¹ “Ni yaa bi kitiŋ ki Uwumbɔr, u ye niyaajatiib Uwumbɔr na, ban u di ki tii nimi na ni kan, naah ga li joo ikaal i na sɔ. Li pel man yaah ye pu na:

² Ni kuln naah ban ni gaa kitiŋ ki na aanib ngbaan aah dooni baawaa nin chee na, nima le ye ŋijoofɔfɔk pu, ni ŋigongon pu, ni tiwaachur aasui taab.

³ Ni gbaa wiir baatork aabimbin, ni baawaa aatakpal yak yak, ki see baapiiwaal Asera aanaŋ, aan ki gaa yikr baawaa mɔmɔk, nima kan, baan ki ŋmaa dan ŋaah bi nin chee na ki nan doon ŋi.

⁴ “Binib ngbaan aah dooni baawaa pu na, ni mu taa li dooni Nidindaan Uwumbɔr kina aaboln.

⁵ Nimi aanibol mɔmɔk aah ga kal nin chee na, Uwumbɔr ga nyan nibaa chee, le ni ga choo unimbiin ni, ki nan dooni u nima.

⁶ Nima chee le ni ga toor nimi aatoor ti ni ga li joo seer mmii ni na, ni kitork kiken, ni naah ga nyan nimi aawan kipiik ponn ni nibaa ni tii Uwumbɔr na, ni nimi aapiin, ni ni yaa puu Uwumbɔr tipuur kan, naah ga pa pu na, ni nibaa aageehn aapiin, ni nimi aawakor aajan aabim aapar.

⁷ Nidindaan Uwumbɔr u ŋa ni pu tinyoor na aanimbiin ni, le nimi, ni nimi aamaal mɔmɔk ga kpaan ki ji tiwanyaan nimɔk ni tun ki kan na.

⁸ “N‑yoonn ngbaan yaa nan fuu ni kan, naah bi ŋani pu na, ni taa ki ŋa kina.

⁹ N‑yoonn mu jer ki nan saa din wee na, ni mɔmɔk aah gee pu na, le ni dooni Uwumbɔr; ba pu? naa kee koo kitiŋ ki Nidindaan Uwumbɔr nan bui ke u ga di tii nimi aan ni li koo nima, ki kan lifuur.

¹⁰ N‑yoonn mu ni ti puur Jɔɔdann Aamɔɔl doo na kan, Uwumbɔr ga cha ni gaa kitiŋ ngbaan, ki li bi nima. U ga li kii nimi, nimi aadim chee, le ni ga li kpa nsuudoon.

¹¹ Uwumbɔr ga nyan nibaa chee le tii timi, aan ti li dooni u nima, le maah mɔk nimi pu na, ni li joo ni nimi aapiin mɔmɔk: ni ye nimi aatork ki ni joo seer mmii ni na, ni kitork kiken, ni naah ga nyan nimi aawan kipiik ponn ni nibaa ni tii Uwumbɔr na, ni ipiin, ni ipiinkpaan i ni puu ke ni ga tii u na.

¹² Nima chee, le nimi, ni nimi aabim, ni nimi aatutum, ni Liifai yaab bi bi nimi aatim ni na li kpa mpopiin ki li mɔɔni Nidindaan Uwumbɔr aanimbiin ni. Ni teer ke Liifai yaab aan li kpa bibaa aakpaakon.

¹³ Ni taa li toor nimi aatork naah gee nin chee na,

¹⁴ ni mɔmɔk kpaan libuul chachaan li Uwumbɔr ga nyan nimi aanibol libaa aatiŋ ni na, ki li toor nima. Nima chee baanja le ni ga li toor nimi aatork ki ni ga see ki mmii ni na, ni tiwan nimɔk m bui nimi ke ni li ŋani na.

¹⁵ “Nimi aawakor ma kan, ni ga ŋmaa kɔr ti nin chee ni bi na ki ŋmɔ. Uwumbɔr aah tii nimi pu na, ni ga ŋmaa kɔr naah gee pu na ki ŋmɔ. Unii umɔk bi chain na, ni u kaa bi chain na kan, ni ga ŋmaa ŋmɔ nimi aawakor, ke naah ku ipeeman ki ŋmɔ nimi aageehn pu pu na.

¹⁶ Tɔ, ni taa kpaan ŋmɔ tiwakor ngbaan aanann aan nsin li bi ti ponn ni. Ni kɔr tiwakor ngbaan ki nyan taasin kpir kitiŋ, ke naah kpir nnyun pu na.

¹⁷ Tiwan nimɔk ni di toor kitork tii Uwumbɔr na kan, ni taa ji tiwan ngbaan linampal: naah ga nyan nimi aajikaabim, ni ŋisubil aadaan, ni olif aakpan kipiik ponn ni nibaa ni tii Uwumbɔr na, ni nimi aawakor aajan aabim, ni naah puu tipuur ke ni ga tii Uwumbɔr ipiin i na, ni nimi aageehn aapiin, ni ipiin iken na aapar, ni taa ji ni linampal.

¹⁸ Nimi, ni nimi aabim, ki kpee nimi aatutum, ni Liifai yaab bi koo nimi aatim ni na, kpaan ki ji ipiin ngbaan aajikaar Nidindaan Uwumbɔr aanimbiin ni, nin chee u nyan ke ni li dooni u na baanja. Ni li kpa mpopiin ki mɔɔni tiwan nimɔk ni ŋa na pu.

¹⁹ Naah ga li bi kitiŋ ngbaan ni, ki cha n‑yoonn mu na, ni pɔɔn nibaa ki taa suln Liifai yaab bɔr.

²⁰ “N‑yoonn mu Nidindaan Uwumbɔr moo tii nimi kitiŋ kpee, ke waah nan puu pu na kan, ni ga ŋmaa ŋmɔ tinann, naah ban pu na.

²¹ Naah dooni Uwumbɔr nin chee na yaa daa sakpen, aan ni yaa gee ke ni kɔr tiwakor ti Uwumbɔr tii nimi na tibaa, ki ŋmɔ linampal na kan, ni ga ŋmaa ŋa kina, maah tuk nimi pu na.

²² Unii umɔk bi chain na, ni u kaa bi chain na ga ŋmaa ŋmɔ tinann ngbaan, ke naah ŋmɔ ipeeman aanann pu na.

²³ Ni taa tee kpaan ŋmɔ tiwakor ngbaan aanann aan nsin li bi ti ponn ni, ba pu? limɔfal bi nsin ponn ni la; ni taa kpaan ŋmɔ tinann ni limɔfal.

²⁴ Ni taa ji nsin, ni kɔr tiwakor ngbaan ki nyan nsin kpir kitiŋ, ke naah kpir nnyun pu na.

²⁵ Ni yaa joo ikaal ngbaan mbamɔm kan, Uwumbɔr ga li kpa mpopiin ni pu, le ni ga li ŋan tii nimi, ni nimi aamaal.

²⁶ Ni li joo ni Uwumbɔr aapiin, ni naah puu tipuur ke ni ga tii u ipiin i na, ki di i buen waah nyan nin chee ke ni li dooni u na.

²⁷ Ni di kitork ki ni ga di ki mɔmɔk see mmii ni, Uwumbɔr aabimbiln paab na toor tii u nima chee. Naah ga di tiwakor ti toor kitork na, ni nyan taasin kpir waabimbiln pu, aan ki ŋmɔ tinann ngbaan.

²⁸ Ni li joo ikaal imɔk m di tuk nimi na mbamɔm, le tiwan mɔmɔk ga li ŋan tii nimi, ni niyaabitiib, ki joo cha n‑yoonn mu kaa kpa ndoon na, ba pu? ni yaa ŋani tiwan ni ŋan na kan, Nidindaan Uwumbɔr ga li kpa mpopiin ni pu.

Ni taa yii Uwumbɔr ki li dii ŋiwaa

²⁹ “Nidindaan Uwumbɔr ga kuln ŋinibol ŋimɔk ni ban ni koo ŋaatim ponn ni na mɔmɔk, le ni ga kal nima.

³⁰ Uwumbɔr yaa kuln ŋinibol ngbaan doo aan ni koo ŋaatim ni kan, ni pɔɔn nibaa ki taa li dii baah dooni ŋiwaa ŋi na; ba pu? ni ye nnikun la. Ni taa li ban ni bee baah dooni baawaa pu na aan ki mu li dooni Uwumbɔr kina.

³¹ Ni taa li dooni Nidindaan Uwumbɔr ke baah dooni baawaa pu na, ba pu? bi dooni baawaa ki ŋani tiwan ni kaa ŋan na aabɔŋ, le Uwumbɔr nan kina aabimbin. Hali bi joo baabim le kɔr toor kitork ki seer mmii ni, ŋibimbin paab tii ŋiwaa.

³² “Ni pɔɔn nibaa ki ŋa maah bui nimi pu na mɔmɔk, ni taa di tiwan nibaa kpee maah mɔk nimi pu na, ki mu taa nyan nibaa mu.