Ikaal 11 - Uwumbɔr aagbaŋ

Uwumbɔr aah kpa mpɔɔn pu na

¹ “Ni li gee Nidindaan Uwumbɔr, ki li joo waakaal n‑yoonn mɔmɔk.

² Din wee, ni teer naah bee Uwumbɔr aabimbin, waah tun ŋitukpaan ŋi ni chee na pu. Naa ye nimi aabim le kan, nimi le nan kan ŋitukpaan ngbaan.

³ Ni nan kan Uwumbɔr aah ye mpɔɔnsakpiindaan, ki tun ŋitukpaan, ni lijinjiir aatun pu na. Ni nan kan waah ŋa Ijipt aabɔr, ni waatiŋ mɔmɔk pu na.

⁴ Ni nan kan Uwumbɔr aah nan kuln Ijipt aajab, ni baataan, ni itaan aatɔroku tiib pu na; u nan cha bi bee Limɔɔkal Aanyusakpem ni, buyoonn bi nan san paa ni nimi pu na.

⁵ Ni ki nyi Uwumbɔr aah nan ki ŋa tiwan nimɔk tii nimi nteersakpiin ni, aan ni nin fuu do na.

⁶ Ni ki teer waah nan ŋa Datann, ni Abiram, bi nan ye Eliab aajapɔtiib, ki nyan ni Rubenn aataŋaal ni aanib pu na. Ni mɔmɔk aanimbil ni, le Uwumbɔr nan cha kitiŋ piir, le bi ni baamaal, ni baakookoo yaan, ni baanaagbiib, ni baawakor mɔmɔk lir ni ponn ni, le kitiŋ ki biin bi pu.

⁷ Mbamɔn, nimi bimina le nan kan ŋitukpaan ŋimɔk Uwumbɔr nan tun na.

Tipuur aatiŋ aah kpa tinyoor ti na

⁸ “Ni li joo waakaal i mɔmɔk m di mɔk nimi din wee na mbamɔm. Nima kan, ni ga ŋmaa puur limɔɔl aan ki ti gaa kitiŋ ki ni chaa koo ki ponn ni na.

⁹ Le ni ga li bi kitiŋ ki kpa tiwakor aamoŋmɔpaan ni ŋisubil sakpen na ni, aan Uwumbɔr nan puu ke u ga di tii niyaajatiib, ni biyaabitiib na pu.

¹⁰ Kitiŋ ki ni ban ni gaa ki na aa bi ke Ijipt aatiŋ ki ni nan bi ki ponn ni na aah bi pu na.

¹¹ Ni yaa nan kon tijikaar nima chee kan, see ni pɔɔn nibaa ki lun nnyun gbir ti pu; tɔ, naah chaa koo kitiŋ ki ponn ni na, ki kpa ŋijoo, ni tifatann, le utaal ga nu ŋa nimi aajikaar pu.

¹² Nidindaan Uwumbɔr le joo kitiŋ ngbaan, ki lik ki n‑yoonn mɔmɔk.

¹³ “Kina pu na, ni li joo waakaal i m di tuk nimi din wee na mbamɔm, ki li gee Nidindaan Uwumbɔr, ki li joo nisui mɔmɔk tun waah ban pu na.

¹⁴ Ni yaa ŋa kina kan, u ga cha utaal nu kitiŋ ngbaan pu, le ni yaa ti ŋeer unaalan, ni linimoogaal aayoonn kan, u ga cha utaal nu. Nima kan, ni ga li kpa njikaabim, ni ŋisubil aadaan, ni olif aakpan sakpen.

¹⁵ Timoor ga li bi, nimi aawakor ŋmɔ. Ni ga kan naah ban tijikaar ti na mɔmɔk.

¹⁶ Ni taa cha nibaa ŋmann nimi aan ni yii Uwumbɔr ki fenn dii ŋiwaa ki dooni ŋi.

¹⁷ Ni yaa ŋa kina kan, Uwumbɔr ga gee ni pu liŋuul; waan ki cha utaal nu, le nimi aatiŋ ga kuur ki ti chaar jer, le nimi aajikaar aan ŋmaa ŋa. Hali kitiŋ ngbaan aah ye kitinyaan pu aan u di ki tii nimi na, naan ki yunn le ni ga kpo.

¹⁸ “Ni teer ikaal ngbaan aabɔr, aan ki li joo i mbamɔm. Ni ŋmee i ki di gbin niŋaal pu, ki di buu tam niyigbeer mu pu, aan ki li teer ibɔr.

¹⁹ Ni di i mɔk nimi aabim. Ni yaa bi linampal, bee ni yaa bi ligɔr kan, ni li len yaabɔr. Ni li len yaabɔr buyoonn ni ka fuur na, ni buyoonn ni bi tun lituln na.

²⁰ Ni ŋmee i paan nimi aadir aabisamɔi pu, ni nimi aatiŋ aagon aabisamɔi pu.

²¹ Nima kan, nimi, ni nimi aabim ga li bi kitiŋ ki Nidindaan Uwumbɔr nan puu ke u ga di tii niyaajatiib na pu, ki yunn. Ni ga li bi ki ponn ni n‑yoonn mumɔk paacham ni taab ga li bi na.

²² “Ni li nyi ki li joo ikaal i mɔmɔk m di mɔk nimi na mbamɔm. Ni li gee Nidindaan Uwumbɔr, ki ŋa waakaal aah mɔk nimi pu na, ki li dii uma baanja.

²³ Le u ga jenn nyan ŋinibol ŋimɔk ni tur koo ŋi ponn ni na, le ni ga gaa ŋinibol kpaan ŋi kpa mpɔɔn jer nimi na aatiŋ.

²⁴ Nitaa aah taa kitiŋ ki mɔmɔk pu na ga li ye nimi yaan la. Nimi aatiŋ mɔk ga yoor nteersakpiin aaŋangii wɔb ki ti nya Lebanonn Aajool chee, ŋŋangan wɔb, le ki ga ki yoor Yufrates Aamɔɔl chee, liwipuul wɔb, ki ti ker Kaasisik ni Aanyusakpem chee, liwilir wɔb.

²⁵ Nidindaan Uwumbɔr aah nan puu pu na, u ga cha linibol limɔk ni fuu laatiŋ ni na aanib li san nimi ijawaan. Ubaa aa bi ki ga ŋmaa kiir nimi kpala.

²⁶ “Lik man, din wee na, m ban ni lee naah gee tiwan ni na la, ni gee tinyoor le aan tibɔbir?

²⁷ Ni yaa kii, ki joo Nidindaan Uwumbɔr aakaal i m joo tuk nimi din wee na kan, u ga ŋa tinyoor ŋa ni pu.

²⁸ Ni mu yaa yii waakaal, ki fenn dooni ŋiwaa kan, ni ga kan tibɔbir la. Teer man ke naa kee dii ŋiwaa, ni taa dii ŋi kpala.

²⁹ Uwumbɔr yaa joo ni nimi kitiŋ ki ni ban ni gaa ki na ni kan, ni sil Gerisim Aajool paab ki moon tinyoor aabɔr, ki sil Ebal Aajool paab ki moon tibɔbir aabɔr.

³⁰ (Ŋijoo ŋilee ngbaan bi Jɔɔdann Aamɔɔl aawilir wɔb la, le ki bi Kanaann yaab bi bi Jɔɔdann aafataŋ ni na aapepel ni. Ŋi bi ki cha liwilir wɔb la, le kaa daa More aawaachur chee, ki bi Gilgal aatiŋ chee.)

³¹ Ni ban ni puur Jɔɔdann Aamɔɔl, ki gaa kitiŋ ki Nidindaan Uwumbɔr ban u di tii nimi na la.

³² Buyoonn ni ti kal ki ponn ni doo na kan, ni pɔɔn nibaa ki li joo waakaal i mɔmɔk m joo tuk nimi din wee na mbamɔm.