Ikaal 1 - Uwumbɔr aagbaŋ

¹ Israel yaab aah nan bi nteersakpiin ni, Jɔɔdann Aamɔɔl chee, liwipuul wɔb na, le Moses di tibɔr ti bi kigbaŋ kee ponn ni na tuk bi. Bi nan bi Jɔɔdann aafataŋ ni, ki bi gbɔk kitiŋ ki bi yin ki ke Suf na, ki nan bi Parann aatiŋ, ni ntim mu bi nan yin mu ke Tofel, ni Labann, ni Haserof, ni Disahab na aakaasisik ni la.

² Aa yaa nyan ni Sainai Aajool chee ki cha Kades Banea, ki dii ŋigongon aatiŋ ki bi yin ki ke Edom na ni kan, aa ga di iwiin kipiik ni mbaa le fuu nima chee.

³ Baah nan nyan ni Ijipt aatiŋ ni aan ni ti saa ŋibin imonko ilee na, ŋmapiik ni ubaa aajan aawiin daal, le Moses nan di Uwumbɔr aakaal imɔk u nan tuk u na mɔk binib ngbaan.

⁴ Uwumbɔr aah nan nyaŋ Amor yaab aabɔr u bi yin u ke Sihonn, u nan bi Hesbonn aatiŋ ki joo waanib na, ni Basann aapepel aabɔr u bi nan yin u ke Og, u nan bi Astarof ni Edrei aatim ki joo waanib na, aapuwɔb le Moses nan di ikaal ngbaan tuk bi.

⁵ Binib ngbaan aah nan bi Jɔɔdann aawipuul wɔb, ni bi Moab aapepel ni na, le Moses piin ki kpiir Uwumbɔr aakaal ngbaan aatataa mɔk bi.

⁶ U nan bui ke, “Taah nan bi Sainai Aajool chee buyoonn na, le Tidindaan Uwumbɔr nan bui timi ke, ‘Ni kal lijool ngbaan chee ni yunn pam.

⁷ Fiin nima chee ki li cha man. Ni li cha Amor yaab aatiŋ ki ye ŋigongon na ni, ni ŋipepel mɔmɔk ŋi fab na ni, ŋi ye Jɔɔdann aafataŋ, ni ŋigongon na, ni ŋigongon aataab, ki ti ker ŋŋangii aapepel wɔb, ki yoor kina ki ti ker Kaasisik ni Aanyusakpem aagbaan. Ni li cha Kanaann aatiŋ ni, ki jer koo Lebanonn Aajoo ni, ki yoor kina ki ti fuu Yufrates Aamɔɔl sakpeln mɔk.

⁸ Ntim mumina mɔmɔk le min Uwumbɔr nan puu tipuur ke m ga di tii niyaajatiib, Abraham, ni Aisak, ni Jakob, ni biyaabitiib na. Ni li cha ki ti gaa mu man.’”

Moses aah nan lee bijojoob pu na aabɔr

⁹ Le Moses bui binib ngbaan ke, “Taah nan laa bi Sainai Aajool chee na, le m nan tuk nimi ke, ‘Maah ga joo nimi m baanja pu na, lituln ngbaan wiir jer mi a. Maan ŋmaa tun li m baanja.

¹⁰ Nidindaan Uwumbɔr cha ni pɔr ki wiir ke iŋmabi i bi paacham na.

¹¹ Uwumbɔr, u ye niyaajatiib Aawumbɔr na, le cha ni moo pɔr ŋichur ŋichur ki jer naah bi pu na, aan ki kan tinyoor ke waah nan puu pu na.

¹² Tɔ, naah wiir sakpen pu na, min baanja ga ŋa kinye ki li toor nimi aabɔr?

¹³ Ni lee ni ponn ni binib bi kpa nlan, ki nyi mbimbin mbamɔn na ngem ubaabaa linibol mɔmɔk ni, aan m cha bi li lik nimi.’

¹⁴ Ni nan kii ke ni ŋan kina.

¹⁵ Nima pu na, m nan di binib bi kpa nlan, ki nyi mbimbin mbamɔm, aan ni nan nyan bi nimi aanibol ni ki di bi tii mi na, ki di nimi kpaan bi. Bibaa nan lik nimi binib lichur, biken mu binib nkub, le biken mu binib piiŋmu, biken mu kipiik. M nan ki nyan biyidam bibaa mu ke bi li lik ŋinibol ngbaan mɔmɔk.

¹⁶ “N‑yoonn ngbaan m nan tuk bi ke, ‘Kinikpakpak yaa fii binib ngbaan aakaasisik ni kan, ni lik ti ponn ni mbamɔm. Ni li toor kina aabɔr ibamɔn ni; ni li toor nimi aanib, ni biwɔwɔm bi koo ni chee na mɔmɔk aabɔr kina.

¹⁷ Ni taa li kpa imaagann nimi aabɔjil ni, ni li dii nsanbaan ki toor ugiin ni uwankpadaan mɔmɔk aabɔr. Taa san ubaa ijawaan, Uwumbɔr le ga tii nimi nlan le ni len ibamɔn. Tibɔr ti jer nimi aapɔɔn na kan, ni li joo ni ti m chee, aan m nan toor ti.’

¹⁸ N‑yoonn ngbaan m nan tuk nimi naah ga ŋa pu na mɔmɔk.

Binib aah nan buen bi ti pekr Kanaann aatiŋ pu na aabɔr

¹⁹ “Tidindaan Uwumbɔr aah nan bui ke ti ŋa pu na, ti nan ŋa kina. Ti nan fii Sainai Aajool chee, ki di bɔ dii ijawaan aateersakpiin ngbaan ni, le ki di buen Amor yaab aatiŋ ki ye ŋigongon na ni. N‑yoonn mu ti nan ti fuu Kades Banea aatiŋ ni na,

^20-21 le m bui nimi ke, ‘Ni fuu ni Amor yaab aatiŋ ki ye ŋigongon na ni a, kitiŋ ki Tidindaan Uwumbɔr u ye tiyaajatiib Aawumbɔr na di tii nimi na. Lik man, kima le ti bi na. Waah nan len pu na, li cha ki ti gaa ki man. Ni ŋa mala man, ki taa san ijawaan.’

²² “Le ni nan dan m chee ki nan bui ke, ‘Cha ti tun binib bi ti pekr lik kitiŋ ngbaan aah bi pu na, nima kan, bi ga ŋmaa gir ni ki nan mɔk timi taah ga dii pu na, ni ntim mu aaboln bi nima na.’

²³ “Naah nan kpokl pu na, ni nan ŋan m chee, le m nan nyan bijab kipiik ni bilee ŋinibol mɔmɔk ni.

²⁴ Bi nan buen ŋigongon aatiŋ ngbaan ni, ki di kina ti ker Eskol aafataŋ ni, ki lik nima chee.

²⁵ Bi nan joo ni nima chee aasubil, le ki tuk timi ke Tidindaan Uwumbɔr aah ban u di kitiŋ ki tii timi na ŋan pam.

²⁶ “Le ni yii Nidindaan Uwumbɔr aamɔb, kaa kii ke ni koo kitiŋ ngbaan ni.

²⁷ Ni nan ŋulni tɔb chee ki len ke: ‘Uwumbɔr aa gee timi. U nyan ni timi Ijipt aatiŋ ni ke u nan di timi ŋa Amor yaab aaŋaal ni aan bi ku timi.

²⁸ Ba pu aan ti ga buen nima? Ti san ijawaan la. Bijab bi ti tun bi na tuk timi ke binib bi koo nima na pɔɔ, ki fɔk jer timi, le ki mu ki bi ŋigon ŋi fɔk ti tuu kitaapaak na aatim ni la. Bi nan ki kan ŋiwɔk mu nima.’

²⁹ “M nan bui nimi ke, ‘Ni taa li san binib ngbaan ijawaan.

³⁰ Nidindaan Uwumbɔr ga loln ni pu nsan, ki jan ni pu, ke waah nan ŋa pu Ijipt aatiŋ ni, ni nteersakpiin ni, aan ni kan na.

³¹ Ni kan waah joo ni nimi laafee ni, ki nan saa do chee na, ke ubo aate aah joo u pu na.’

³² Le maah sur nimi ki len pu na, naa ban ke ni kii tii Uwumbɔr.

³³ Hali, waah lolni ni pu nsan ki ti ban nkakaayaan tii nimi pu na, naa ban ni ŋun tii u. Waah nan ban u mɔk nimi nsan na, kinyeek kan, u nan bi mmii ni ki wiin, le nwiin pu kan, u nan bi ntaalangbam ni ki loln ni pu nsan.

Uwumbɔr aah nan daa bitafal pu na aabɔr

³⁴ “Uwumbɔr ŋun naah ŋulni pu na, le liŋuul chuu u, le u puu ki bui ke,

³⁵ ‘Maah puu ke m ga di kitinyaan ki tii niyaajatiib na, nimi titunwanbir aanib bimina ubaa aan koo ki ponn ni,

³⁶ Jefune aajapɔɔn Kaleb baanja le ga koo ki ni. Uma le si chob ki tii mi naadii; m ga di kitiŋ ki u nan buen ti pekr ki chuun mann ki ponn ni na, tii u ni uyaabitiib.’

³⁷ Hali, nimi aabimbin pu, Uwumbɔr gee m pu liŋuul, ki bui mi ke, ‘Sin Moses aan koo kitiŋ ngbaan ni.

³⁸ Tɔ, pɔɔk Nunn aajapɔɔn Josua u ye saateter na aataakpab. Uma le ga loln nimi Israel yaab pu nsan, le ni gaa kitiŋ ngbaan.’

³⁹ “Le Uwumbɔr ki bui timi, ke timi aabim, bi laa diin, kaa nyi ni ŋan na, ni ni kaa ŋan na, mbim bi ni nan bui ke nimi aadim ga gaa bi ni chee na, bima le ga koo kitiŋ ngbaan ni. M ga di kitiŋ ngbaan tii bi, le bi gaa ki kookoo.

⁴⁰ Nimi ma kan, fenn man, ki di niyil toŋ nteersakpiin ni, ki li dii nsan mu cha Limɔɔkal Aanyusakpem na chee.

⁴¹ “Le ni giin bui ke, ‘Moses, ti tun titunwanbir Uwumbɔr chee. Tɔ, dandana wee ma kan, ti ga fii ki ti tak timi aadim, Tidindaan Uwumbɔr aah bui ke ti ŋa pu na.’ Le ni mɔmɔk gor ke ni jan kijaak, ki dak ke ni ga li diin tii nimi aan ni gaa ŋigongon aatiŋ ngbaan.

⁴² “Le Uwumbɔr bui mi ke, ‘Sur binib ngbaan ke bi taa buen ti tak baadim, ba pu? maan ter bi, le baadim ga nyaŋ bi.’

⁴³ M tuk nimi Uwumbɔr aah len pu na, le naa gar mi. Ni yii waamɔb, le nimi aagaak pu, ni buen ti lir ŋigongon aatiŋ aanib ngbaan pu.

⁴⁴ Le Amor yaab bi ka ŋigongon ngbaan ni na fii lir ni pu ke inangbee na. Bi nan jenn nimi ki ti nyan Homa aatiŋ ni, le ki ti nyaŋ nimi, ŋigongon aatiŋ ki bi Edom aatiŋ ni na.

⁴⁵ Kina pu na, ni nan wii yin Uwumbɔr ke u ter nimi, le u yii ke waan gar nimi, ke utafal aa nan bi ni ni.

⁴⁶ Nima pu na, ti nan bi Kades aatiŋ ni ki yunn.