Hosea 9 - Uwumbɔr aagbaŋ

Hosea aah moon Israel yaab aatafadaan aabɔr pu na

¹ Israel aanib, taa ki ji nimi aajim ke binib bi kaa nyi Uwumbɔr na aah ŋani pu na. Ni fenn nipuwɔb tii nimi Aawumbɔr le kaa keei waamɔb. Kitiŋ kee mɔmɔk pu, ni di nibaa kooh ke upiidagoor na le ki di tii liwaal Baal, le ki gee tijikaar ti ni dak ke u joo pa nimi na.

² Tɔ, naan yunn le nimi aajikaar, ni olif aakpan aan ki ŋeer nimi, le ndaan mu ga doo.

³ Israel aanib aan ki li bi Uwumbɔr aatiŋ pu, bi ga gir buen Ijipt aatiŋ ni, ki ga ti li ji tijikaar ti bi kɔ na Asiria aatiŋ ni.

⁴ Baan ti ŋmaa tii Uwumbɔr ndaan aapiin, biwɔwɔm aatim ngbaan ni, kaan ŋmaa di baatork buen unimbiin ni. Biwɔwɔm ngbaan aajikaar ga bii umɔk jin ti na, ke baah jin likpuul ponn ni aajikaar pu na la. Bi ga li ji ti ke ti lee baakon la; ti ponn ni tibaa aan ŋmaa koo Uwumbɔr Aadichal ni ki ye ipiin tii u.

⁵ Le n‑yoonn yaa nan fuu ni ke bi ji njim ki nyuŋ Uwumbɔr kan, baan li nyi baah ga ŋa pu na.

⁶ Libiil yaa nan fuu ni ki yaa binib ngbaan kan, le Ijipt yaab ga kuun bi. Bi ga kuun bi ti sub Memfis aatiŋ ni la. Le timoor ni ikokon ga gaa baadichal ni baawangol aah nan si nin chee n‑yoonn mubaa na.

⁷ Ntafadaan aayoonn fuu a, n‑yoonn ngbaan binib ga kan ni ŋeer bi na. Kina yaa nan ŋa kan, Israel yaab ga bee ni. Ni bui ke, “Uwumbɔr aabɔnabr umina ye ujɔr la. Unii u Nfuur Nyaan fir u pu ngbaan na aa ki kpa nlan la.” Nimi aatunwanbir aah nyaŋ na le kinanaŋ gbiin nimi.

⁸ Uwumbɔr tun ni mi ke ubɔnabr na, ke m nan sak waanib Israel yaab. Le m yaa buen nimɔk na kan, ni pɔɔni nibaa ke ni chuu mi ke unyoon na. Uwumbɔr Aadichal ni aanib aadin le ye uma Uwumbɔr aabɔnabr.

⁹ Baatuln mɔmɔk ponn ni ye titunwanbir le kaa kpa ŋitataa, ke baah nan bi Gibea aatiŋ ni pu na. Uwumbɔr ga teer baatunwanbir le ki daa bitafal ti pu.

Israel aatunwanbir ni taapar

¹⁰ Uwumbɔr bui ke, “Maah nan puen kan Israel na, ni nan bi ke unii aah kan ŋisubil nteersakpiin ni kan, ni bi pu na la. Maah nan puen kan niyaajatiib na, ni nan bi ke aa yaa kan ŋikakan ŋi puen puir na kan, ni bi pu na la. Baah nan fuu ni Peor Aajool chee na, le bi piin ki gur dooni liwaal Baal, le ki ŋa fam ke ŋiwaa ŋi bi gee ŋi na.

¹¹ Israel aayimbil ga fii buen ke unyoon na, le baan ki maa mbim, bipudam mu aan ki li bi, baan ki dek mbim aapuu.

¹² Tɔ, bi yaa ma mbim kan, m ga yoor bi mɔmɔk kaan gur ubaa. N‑yoonn mu m siir cha binib bee na kan, tibɔbir pam le ga kan bi.”

¹³ M waa Efraim aanib bi lipepel li ŋan na ni, ke Taya aatiŋ na. Efraim mu ga nya baabim bi ti ku bi.

¹⁴ Ba aan m ga bui ke aa ŋa binib bee? Cha baapiib kpaln biŋoob. Cha bi taa ki ŋmaa kpiin baabipɔm.

Uwumbɔr aah ga ji Israel yaab tibɔr pu na

¹⁵ Uwumbɔr bui ke, “Baatunwanbir mɔmɔk nan piin Gilgal aatiŋ ni la. Maa ki gee bi nima chee. Le baah tun titunwanbir ti na pu, m ga jenn nyan bi maatiŋ pu. Maan ki li kpa bi pu ngeehm; baasalolm mɔmɔk fii sil m pu la.

¹⁶ Israel aanib bi ke busub bu aanyaan kuur aan bu aa ki lu na la. Baan ki maa mbim, le bi ti ki ma bi kan, m ga ku baah gee baabim bi sakpen na.”

Uwumbɔr aabɔnabr aah len Israel yaab aabɔr pu na

¹⁷ Maah dii Uwumbɔr u na ga yii waanib, baah kaa ŋun tii u pu na pu. Bi ga kpaln bichayiim le ŋitimbol ponn ni.