Hosea 8 - Uwumbɔr aagbaŋ

Uwumbɔr aah galn Israel yaab baah dooni ŋiwaa pu na aabɔr

¹ Uwumbɔr bui ke, “Faa nkuun man. Bidim boon nan lir maatiŋ pu ke ŋikaagii na la. Maanib bii tipuur ti m nan puu tii bi na, le ki yii maamɔkm.

² Bi yin mi ke Baawumbɔr la, le ki bui ke bi ye maanib le ki nyi mi,

³ le ki tee yii lituln li ŋan na. Kina pu na, baadim ga li ban bi.

⁴ “Maanib leer baabɔrb, le kaa ŋɔɔni m pu. Bi leer baasalolm, le kaa ŋɔɔni m pu. Bi di baakunabr ni salmaa le ki naan ŋiwaa; ŋima le ga kuln bi.

⁵ Maa gee Samaria aanib aah di salmaa naan unaaja u ke u ye liwaal ki dooni u na. Maaŋuul fii bi pu sakpen a. Bayoonn aan bi ga di cha ŋiwaa aabɔr?

⁶ Israel aawanaann ubaa le naan li, laa ye Uwumbɔr. Samaria yaab aah dooni salmaa aanaaja u na ga wii yuk yuk.

⁷ Bi yaa bun libuln kan, kitaabuŋ le bi ga nan chee. Njikaabim mu bi nkpaakon ni kaa biir na aan ŋmaa ŋa tijikaar. Hali mu yaa biir kan, biwɔwɔm le ga di mu ŋmɔ.

⁸ Israel gur bi ke ŋitimbol ŋiken aah bi pu na la, kaa bi tibaa ni ke libuul li wii na,

⁹ ki kpa tafalaaŋun ke iŋoob na. Israel aanib bi bibaa pu la. Bi buen Asiria aatiŋ pu ti ban nterm, le ki pan ŋitimbol ŋiken ŋimombil ke ŋi ter bi.

¹⁰ Le m ga kuun bi ki daa bitafal. Naan yunn le Asiria aabɔrkpaan ga di limukl pii bi, le bi ga lir ki biln kitiŋ iween pu.

¹¹ “Israel aanib aah moo maa kitork aabimbin ke bi kan titunwanbir aachapinn na, kina le bi moo kani nin chee bi ga tun titunwanbir na.

¹² M ŋmee ikaal i aa ti ki nyi imɔk na tii binib ngbaan, le bi yii i ke i ye tiwɔwɔwan, ni tiwachann le bi chee.

¹³ Bi toor kitork tii mi, le ki ŋmɔ kaanann. Le min Uwumbɔr aasui aa piin bi pu, le m ga teer baatunwanbir n‑yoonn mumina ki daa bitafal ti pu; m ga giin bi Ijipt aatiŋ ni.

¹⁴ “Israel aanib maa ŋibɔrdichal, le ki tee suln Uwumbɔr u naan bi na bɔr. Juda aanib maa ntim mu kpa tijawan aan bi maa ŋigon gob mu na. Le m ga cha mmii wu baabɔrdichal ni ntim ngbaan.”