Hosea 7 - Uwumbɔr aagbaŋ

¹ “M yaa ti ban ke m tii maanib Israel yaab laafee, ki ki tii bi nkam kan, m kani baatunwanbir ni mbiin mu bi tun na baanja la. Bi ji tɔb la; bi koo biken aadichal ni le ki su kinaayuk; ki su binib kinaayuk kitiŋ ponn ni.

² Naa kee koo biyil ni ke m ga teer titunwanbir timina mɔmɔk; le baatunwanbir mann goln bi, le maan ŋmaa yii ke maa waa ti.”

Libɔrchiln ni aabeebee aakpokl

³ Uwumbɔr bui ke, “Binib joo baatunwanbir aakpokl le ŋmanni ubɔr ni waaninkpiib.

⁴ Bi mɔmɔk ye nchakpokjum, le kaa si ubɔr aachaŋ ni. Baabiin nyakr ke baah pu boroboro nin chee na aamii mu unii u pu boroboro na aa tur mu ŋani ke boroboro ti nin ŋeer buyoonn u ga pu u na la.

⁵ Ubɔr aajim daal, le bi cha ubɔr ni waaninkpiib nyu ndaan gbii le ki jɔr.

⁶ Mbamɔn, baakpokl wu ke baah pu boroboro nin chee na aamii na la. Kinyeek ni kitaak aawoln pu, baaŋuul nyakr la, le kichakpiik ni kan, li gaa mmii.

⁷ “Baaŋuul aakaasisik ni le bi ku baajojoob. Bi ku baabɔrb paani tɔb pu la. Le ubaa aa tee mee mi ki ban nterm.”

Israel ni ŋitimbol ŋiken aabɔr

⁸ Uwumbɔr bui ke, “Israel aanib bi ke boroboro u bi pun u aan waa biir mbamɔm na la. Bi ka lik ŋitimbol ŋi mann goln bi na pu le ki ban nterm,

⁹ kaa nyi ke biniyayam aaterm ngbaan gaal baapɔɔn la. Baawiin aa ki daa, le baa kpaan nyi.

¹⁰ Israel aanib aagaak wii ban bi la. Hali tiwan ni mɔmɔk ŋa na pu, baa fenn ki gir ni min Bidindaan Uwumbɔr chee.

¹¹ Israel chuun fii labr ke linanjel li kaa kpa nlan na la; njan, kaanib nan buen Ijipt yaab chee le ti ban nterm, le ki fenn san buen Asiria yaab chee.

¹² Bi yaa bi jer kan, m ga taln kipɔɔk ki chur bi ke inyoon na. Baah tun titunwanbir ti na pu le m ga daa bitafal.

¹³ “Baamɔfal junn a. Bi di mi lii le ki nyan mpuwɔb. Bi ga kuln. M ba ban ke m ter bi la, le bi mu aa dii mi mbamɔm.

¹⁴ Baa joo bisui mɔmɔk mee mi, le ki labr lir kitiŋ le ki kaani ke binib bi kaa dii maasan na aah ŋani pu na. Bi yaa bi mee ban njikaabim ni ndaan kan, bi joo njum le geei bibaa ke binib bi kaa dii maasan na aah ŋani pu na. Bi ye binib bi kaa keei min Uwumbɔr aamɔb na la.

¹⁵ Min le nan kpiin bi ki tii bi mpɔɔn, le bi fenn ki kpokl m pu.

¹⁶ Bi nya mpuwɔb n‑yoonn mɔmɔk, le ki dii liwaal li kaa kpa mpɔɔn mubaa na. Saan ŋmaa li kpa bi pu limakl ke butɔm bu gɔr na la. Baasalolm aah len tibɔr kigaak ŋmeen na, le bi ga kpo mpɔɔkun, le Ijipt yaab ga laa bi.”