Hosea 5 - Uwumbɔr aagbaŋ

¹ “Nimi bitotoorb, li pel nimina man. Israel yaab, pel man. Nimi bi ye nnaan ni yaab na, li pel man. Nimi aatuln le ye ke ni di ibamɔn ji binib tibɔr, kina pu na, m ga ji nimi tibɔr. Ni kpaln gaawɔb le ki dɔ Mispa, le ki ye kipɔɔk Tabor aajool pu,

² le ki ye libuusakpeln Sitim aatiŋ ponn ni, le m ga daa ni mɔmɔk aatafal.

³ M nyi Israel aah bi pu na, waan ŋmaa bɔr mi. U nyan mpuwɔb, le waanib aa ŋeer ke bi li dooni mi.”

Hosea aah sak bi ŋiwaa aatork pu aabɔr pu na

⁴ Binib ngbaan aah tun titunwanbir ti na le cha baa ŋmaa gir ni Baawumbɔr chee. Ŋiwaa kpa bi pu mpɔɔn, le baa ki nyi Uwumbɔr.

⁵ Israel yaab aagaak mɔk ke bi kpa ngalm. Baatunwanbir cha bi gbeer le ki lir, le Juda aanib mu lir dii bi.

⁶ Bi joo baapiih ni inaa ki ti kɔr toor ke bi tii Uwumbɔr la, le naa ter bi. Waah siir cha bi na, le baa kan u.

⁷ Bi nyan Uwumbɔr aapuwɔb; kina pu le baabim aa ye waabim. Kina pu le naan yunn le baatim ga kuln.

Juda ni Israel yaab aatɔb aabɔr

⁸ Pii butɔb aakpiin Gibea aatiŋ ni man. Faa nkuun Rama aatiŋ ni man. Faa butɔb aakuun Bef Afenn aatiŋ ni. Benjaminn aajab, fii buen butɔb ni man.

⁹ Ntafadaan aawiin choo, le Israel aatiŋ ga ber. Israel aanib, nimina ga sil ŋa.

¹⁰ Uwumbɔr bui ke, “Juda aanib aayidam aah koo Israel aatiŋ ni ki sun kaatiŋ ngem na, le maaŋuul fii. Kina pu na, m ga cha ntafadaan dan bi pu ke nwam na.

¹¹ Israel yaab bi ji limukl aafalaa la, ki lann kitiŋ ki nan ye bibaa aatiŋ na, ba pu? bi nan si chaa ti ban nterm binib bi kaan ŋmaa ter bi na chee la.

¹² M ga kuln Israel ni Juda yaab.

¹³ “Israel aatiŋ nan kan kaah bun pu na, Juda mu kan kibaa aabuun na, le Israel buen Asiria aabɔrkpaan na chee ki ti ban nterm, le waa nan ŋmaa tii ki laafee, bee u yann kaabuun.

¹⁴ M ga tak Israel ni Juda aanib ke uchinn na la. Min mbaa le ga daa par par bi, ki siir cha bi. M yaa nan dar bi cha kan, ubaa aan ŋmaa gaa bi lii.

¹⁵ “M ga siir cha maanib, ki ti saa buyoonn bi ga ji falaa u ŋeer baatunwanbir ki gir ban ni mi na. Nibaakan bi ga fenn ban mi limukl ngbaan ni.”