Hosea 4 - Uwumbɔr aagbaŋ

Uwumbɔr aah nan galn Israel yaab pu na

¹ Uwumbɔr nan kpa ngalm u galn binib bi koo kitiŋ kee pu na. Israel yaab, li pel man waah len pu na; “Mbimbin mu bi chob na, ni ngeehm, aa bi kitiŋ kee pu, le binib ngbaan aa nyi ke min le ye Uwumbɔr.

² Bi puur tipuur le ki bii ti; bi geei inyamɔn, ki ku binib, ki su kinaayuk, ki ban tɔb aapuutiib. Libiil moo kpae la, le linikul libaa paa liken pu.

³ Kina pu le kitiŋ ga kuur, le tiwan nimɔk bi ki pu na ga kpoi. Tiwakor, ni inyoon, ni ijan mu ga kpoi.”

Uwumbɔr aah galn bitotoorb pu na

⁴ Uwumbɔr bui ke, “Ubaa taa galn binib ngbaan ki taa sak bi; nimi bitotoorb chee le maagalm cha.

⁵ Kinyeek ni nwiin pu mɔk ni moo bii cha, le bibɔnabr mu bi kina la. M ban m kuln nina Israel la.

⁶ Maanib aah kaa bee mi na, le baamɔfal ga junn. Nimi bitotoorb yii ke naan bee mi, le ki yii maakaal, kina pu le m mu yii nimi, kaan kii ke nijapɔtiib li ye maatotoorb.

⁷ “Nimi bitotoorb aah wiir pu na, kina le naah tun mi titunwanbir ti na mu wiir, le ki ga cha m kpeln nimi aanyuŋ ŋa inimɔɔn.

⁸ Maanib aatunwanbir pu le ni moo kani titunwanbir aatork aawangol, le ki ban ke bi li moo tun titunwanbir.

⁹ Nimi ni binib ngbaan aatafadaan ga li ye tiwanbaan la. M ga daa nitafal ki cha ni pa naah tun titunwanbir ti na pu.

¹⁰ Bi yaa toor kitork kan, ni ga ji nimi yaan, ki mu aan bab. Ni ga li dii timar aawaa, ki mu aan li kpa mbim, ba pu? ni fenn nipuwɔb tii mi, le ki ti dii ŋiwaa.”

Uwumbɔr aah bui ke ŋiwaa aatoor aah kaa ŋan pu na

¹¹ Uwumbɔr bui ke, “Ndakpok ni ndapɔm le gaa maanib aalan.

¹² Lidɔgeln chee le bi chaa ti baa tibɔkpiirkaan. Ndɔ le tuk bi baah ban ke bi li nyi tiwan ni na. Bi di mi Uwumbɔr di mee. Bi di bibaa tii ŋiwaa ke upii u di ubaa ŋa udagoor na la.

¹³ Ŋijoo paab le bi toor ŋiwaa, le ki seer nnyɔknii isui sakpiin i aabon taln buen dandar na taab, ŋigongon pu, isui aaboon aah mɔ ni chee na, kina pu le nibisatiib joo bibaa kooh, le nibipuutiib mu kpaln bidagoob.

¹⁴ Nimi ni bipiib bi bi nimi aawaadir ni na aah tun kidagook aatuln ki toor tijɔŋ aatork na pu, le maan daa nibisatiib ni nibipuutiib aatafal. Liyataŋakl libaa le len ke, ‘Binib yaa bi kaa kpa nlan kan, bi wɔŋ la.’

¹⁵ “Tɔ, nimi Israel aanib aa kii maamɔb, Juda yaab ma taa ji kina aabɔkpol. Ni taa ki buen Gilgal, bee Bef Afenn ki ti doon mi, ki taa puu tipuur nima chee min Uwumbɔr u bi na aayimbil pu.

¹⁶ Israel aanib aatafal pɔɔ ke uŋoob na la. Maan kpiin bi mmoŋmɔpaan ni ke ipihbi na.

¹⁷ Ŋiwaa le chuu Israel aanib. Cha bi li dii baah gee nsan mu na.

¹⁸ Bi yaa ti nyun ndaan bab kan, le bi fii lir kidagook pu, le ki neen inimɔɔn n‑yoonn ngbaan ki jer kipak.

¹⁹ Uwumbɔr ga di bi buen ke kinaakpaajabuŋ le aah daar bi cha na, le inimɔɔn ga chuu bi ŋiwaa aatork pu.