Hosea 3 - Uwumbɔr aagbaŋ

Hosea ni upii u nyan upuwɔb na

¹ Le Uwumbɔr nan bui mi ke, “Gir ki ti di ngeehm tii upii u bi ubɔɔn chee na. Aa li gee u ke maah gee Israel aanib pu na, aa mu tee lik kan, bi di bibaa tii ŋiwaa le ki gee ke bi li joo ŋisubil ŋi kuur na tii ŋiwaa ipiin.”

² Le m nan pan tikunabr aamombil kipiik ni ŋiŋmu, ni njikaabim kuruwaa nkub ni piiŋmu u pu.

³ M nan bui u ke u ga kal ni yunn pam, ki taa tun kidagook aatuln, ki kiir mi, le n‑yoonn ngbaan na m ga li ka kii u.

⁴ Kina le Israel yaab mu ga li gur bi, kaa kpa bibɔrb ni bisalolm, kaan ki li kpa kitork ki toor, kaan li kpa ŋitakpal ŋi bi toor na, kaan li kpa ŋiwaa, bee tiwanaankaan nibaa ke bi li joo buu tibɔɔr.

⁵ Tɔ, n‑yoonn tee choo, le Israel aanib ga nan ki fenn dan Bidindaan Uwumbɔr chee, ki dan ubɔr David aayaabil chee. Le bi ga li san Uwumbɔr ki gaa waapiin i ŋan na.