Hosea 13 - Uwumbɔr aagbaŋ

Israel aakookoo aabɔjil

¹ N‑yoonn mu jer na, Efraim aanibol yaa nan len kan, ijawaan nan chur ŋinibol ŋi gur na la; ŋi mɔmɔk nan lik Efraim aanibol pu la. Le binib ngbaan dooni liwaal Baal, le ki ga kpo kina pu.

² Baah beenin naani tikur aawan ki dooni ni na, le bi beenin tun titunwanbir, bi dooni tikunabr aawaa ŋi unibɔn di waalan naan ŋi uyil ni, ki di uŋaal ŋa ŋi na. Le bi bui ke, “Toor kitork tii ŋi man.” Binib ga ŋa kinye ki moor ŋiwaa ŋi bi naan ŋi ke inaaja na?

³ Kina pu le binib ngbaan ga wɔŋ ke kichakpiik ni aakpakpal na, ki wɔŋ ke limaln li wɔŋni kichakpiik ni na. Bi ga fii buen ke libuln aah daar kimook lipaal pu cha na la, ki naahn iŋmanyuu aah nya kidadiik aadipimoor ni pu na.

⁴ Uwumbɔr bui ke, “Min le ye Nidindaan Uwumbɔr u nan nyan ni nimi Ijipt aatiŋ ni na. Naa ki kpa Uwumbɔr uken ki kpee m pu. Min baanja le ye u gaal nimi lir na.

⁵ M nan kpiin nimi nteersakpiin mu aatiŋ kuun na ni.

⁶ Le naah ti koo kitiŋ ki ŋan na ponn ni na, le ni nan jin bab, le ni ŋeer nimi, le ni kpaln bigaadam ki suln mbɔr.

⁷ Kina pu le m ga tak nimi ke uchinn na. M ga doon nsan ni kiir nimi ke unaamuun na.

⁸ M ga tak nimi ke kipeewanbiik ki aabim wɔŋ na, le ki daa par nimi. M ga di nimi ŋmɔ mala ke uchinn na libuul ngbaan ni, ki daa par par nimi ke kipeewanbiik na.

⁹ “Israel aanib, m ga kuln nimi. Le ubaa aan ŋmaa ter nimi.

¹⁰ Ni nan bui ke ni ban ubɔr ni bisalolm la; tɔ, bi ga ŋa kinye ki gaa litimbol ngbaan lii?

¹¹ Maaŋuul ponn ni le m nan tii nimi bibɔrb, le maaŋuusakpeln ni m nan ki gaa bi.

¹² “M ŋmee Israel aatunwanbir ni kaataani bil, le ki di tigbann ngbaan bil mbamɔm.

¹³ Israel yaab kpa limɔfal aamakl, le ki tee jɔr sakpen ke bi kan limɔfal ngbaan, bi jɔr ke ubo u una ban u maa u aan u yii ke waan nya ni na la.

¹⁴ Maan nyan binib ngbaan nkun ni, kaan nyan bi nkun aapɔɔn ni. Nkun, li joo ni saabiil. Kitekpiitiŋ, li joo ni saabiil. Maan ki san binib bimina kinimbaak.

¹⁵ Israel pɔr ke timoor na la, le m tee ga cha libuln li ton ki nyan ni liwipuul wɔb nteersakpiin ni na dan ki nan foor baayayak aanyunbun, ni ŋibun. Li ga yoor tiwanbankaan mɔmɔk buen.

¹⁶ Samaria aatiŋ aanib aah yii maamɔb na, bi ŋeer ntafadaan. Bi ga kpoi butɔb ni, le bidim di baabipɔm yur ku, ki saa gber bipudam aapuu.”