Hosea 12 - Uwumbɔr aagbaŋ

¹ “Israel aanib aah tun pu kichakpiik ni ki ti saa kinyeek na aa kpa tinyoor, le ki ye libiil ŋmeen. Mbimbin mu pɔɔ na ni inyamɔn le moo kpae bi ponn ni. Bi ni Ijipt ni Asiria yaab kpaani kimɔbaan la.”

² Uwumbɔr kpa Juda aanib pu ngalm, le ki ga daa Israel aatiŋ aatafal, kaanib aatuln pu. U ga giin baah tun pu na le pa bi.

³ Biyaaja Jakob ni ujaantɔ Esɔ nan mɔn, bi mɔmɔk bilee aah nan laa bi bina aaponn ni pu na; le Jakob aah nan chikr na, le u ni Uwumbɔr mɔn,

⁴ u ni Uwumbɔr aatuun nan mɔn le u nyaŋ mu. U nan wii ki mee ban tinyoor. Le Uwumbɔr dan tiyaaja Jakob chee Betel aatiŋ ni, ki nan len u chee tibɔr.

⁵ Tidindaan Uwumbɔr Mpɔɔnsakpiindaan nan ye. Liyimbil li bi ga li joo dooni u na le ye Uwumbɔr.

⁶ Kina pu na, Jakob aayaabitiib, kii tii nimi Aawumbɔr, ki fenn gir ni u chee. Li si uchaŋ ni ki li bi mbamɔm, ki li kii nimi Aawumbɔr aah ga nan tun pu na.

Libɔjil aabɔr tiken

⁷ Uwumbɔr bui ke, “Israel aanib ji biŋeen aatɔtiib ke Kanaann yaab na la; bi gee ke bi li joo tiwan ni kaa ye nibamɔnn na le ŋaŋni tiwan ki ji binib bi daa bi chee tiwan na.

⁸ Bi len le ke, ‘Ti ye biwankpadam la. Ti kan liwangol sakpen. Le ubaa aan ŋmaa galn timi ke ti ji biken.’

⁹ Le min Nidindaan Uwumbɔr, u nyan ni nimi Ijipt aatiŋ ni na, ga ki cha ni ki gir li koo igban aaboo ni, ke naah nan koo pu buyoonn m dan ni chee nteersakpiin ni na.

¹⁰ “M nan len bibɔnabr chee tibɔr, le ki kpiir tibɔkpiirkaan pam tuk bi, le ki cha bi sak maanib.

¹¹ Tɔ, ŋiwaa le bi dooni ŋi Gilead aatiŋ ponn ni, le binib bi dooni ŋi na ga kpoi. Bi kɔr inaaja Gilgal aatiŋ ni toor kitork, le ŋiwaabimbin ŋi bi nima chee na ga kpaln ŋitakpakpuk le ikpaakon ni.”

¹² Tiyaaja Jakob nan san le ki buen Mesopotamia; nima chee, le u nan ti tun lituln tii uja uken ki kpaa waapiih, ke u tii u usapɔɔn.

¹³ Uwumbɔr nan tun ubɔnabr ke u ti nyan Israel yaab tinaagbiir ni Ijipt ni, ki li joo bi.

¹⁴ Israel aanib cha Uwumbɔr aaŋuul fii ni ti nyaŋ, baatunwanbir ŋeer nkun la. Uwumbɔr ga daa bitafal titunwanbir ti bi di tii u na pu.