Hosea 11 - Uwumbɔr aagbaŋ

Uwumbɔr aah gee waanib bi nyan upuwɔb na pu na

¹ Uwumbɔr len ke, “Israel aah nan laa ye ubo pu na, m nan gee u, le ki nan yin u nyan ni Ijipt aatiŋ ni ke maabo na.

² Tɔ, buyoonn m moo yin u na, le u moo san m chee. Maanib toor kitork tii liwaal Baal la, le ki seer nnyɔknii tii ŋiwaa ŋiken.

³ Tɔ, m mu le nan mɔk Israel lisachuln. M yoor maanib ŋmam ŋŋaal ni, le baa nyi ke min le joo bi.

⁴ M di ngeehm ni lineen daa bi dan mbaa chee. M nan yoor bi paacham ki di buŋ mbɔgbiln pu; m nan sɔɔn taab ki kpiin bi.

⁵ “Bi yii kaan gir ni m chee, kina pu le bi ga ki gir Ijipt aatiŋ ni, le Asiria aabɔr ti li joo bi.

⁶ Butɔb ga ŋar baatim ŋŋaan ki gbaa wɔi mu aagon aabisamɔi. Maanib aah ŋani bibaa aageehn aatuln li na le ga cha butɔb bii bi.

⁷ Bi nyan sil ke bi nya m chee la. Bi ga wii lituln li nyik bi pu na pu, le ubaa mu aan tuur bi.

⁸ Israel, m ga ŋa kinye ki di si lii? M ga ŋa kinye ki di si mee? M ga ŋmaa kuln si ke maah nan bii Adma aatiŋ pu na aa? M ga ŋmaa ŋa si ke maah nan ŋa Seboyim aatiŋ pu na aa? Nsui aan cha m ŋa si kina, ba pu? m gee si sakpen a.

⁹ Maan daa aatafal maaŋuul ponn ni; maan ki kuln Israel yaab, ba pu? M ye Uwumbɔr la, maa ye unibɔn. Min u bi chain na bi ni chee. Maan dan ni chee maaŋuul ponn ni.

¹⁰ “M yaa nan ŋuun baadim pu ke uchinn na kan, maanib ga dii mi. Bi ga nya liwilir wɔb ki dan m chee mala.

¹¹ Bi ga nya ni Ijipt aatiŋ ni mala ke inyoon na, ki nya ni Asiria aatiŋ ni mala ke ŋinanjel na. M ga ki giin ni bi bido bido. Min Uwumbɔr le len kina.”

Israel ni Juda aanib aabɔr aah bii pu na

¹² Uwumbɔr bui ke, “Israel aanib di inyamɔn ni ŋŋmann le gob mi, le Juda aanib beenin yiil min Uwumbɔr u bi chain ki tun maah len pu na aamɔb.