Hosea 10 - Uwumbɔr aagbaŋ

¹ Israel aanib nan bi ke ŋisubil aasub bu lun ŋisubil sakpen na la. Buyoonn bi moo kan liwangol na, le bi too maa ŋiwaa aatork aabimbin kpae. Buyoonn baatiŋ moo ŋani tijikaar na, le bi too toor ŋiwaa ŋi bi dooni na ke ŋi li ŋan.

² Binib bi aasui ni ye ŋŋmann ŋmeen na ga ji baatunwanbir aafalaa. Uwumbɔr ga gbaa wii baawaa ni ŋaabimbin ngbaan ki tur ŋi lir.

³ Binib ngbaan ga piin ki bi len ke, “Taah kaa san Uwumbɔr na le taa kpa ubɔr. Tɔ, ubɔr ba ga ŋmaa ŋa ba tii timi?”

⁴ Bi len tibɔr ti kaa gbii na, ki puur tipuur kaa gbiini ti, ki ŋani inyamɔn aamɔbaan. Ibamɔn le kpaln inyamɔn, le ki moo kpae ke timoor ti kaa ŋan ki bi baah kon nkpaakon mu na ponn ni pu na.

⁵ Binib bi koo Samaria aatiŋ ni na ga san ijawaan ki wii, baah ga lann salmaa aanaaja aawaal li bi naan siin Bef Afenn ni na pu. Bi ni bitotoorb bi dooni liwaal ngbaan na ga wii li pu. Buyoonn baadim chuu nyan laasalmaa aanyaan na le bi ga li kaani.

⁶ Bi ga di liwaal ngbaan buen ti pa Asiria aabɔrkpaan. Israel yaab aah dii nsurm mu na pu le bi ga ji inimɔɔn ki kpaln binimɔɔnib.

⁷ Bidim ga di baabɔr buen ke lidɔchɔl aah dee nnyun pu ki cha pu na la.

⁸ Afenn aagongon pu aawaa ŋi Israel aanib dooni ŋi na ga ber. Ikokon ni timoor le ga gaa kitork aabimbin ngbaan. Binib ga bui ŋijoo ke, “Bɔr timi man,” le ki bui ŋigongon ke, “Biin ti pu man.”

Uwumbɔr aah bui ke u ga ji Israel yaab tibɔr ti na

⁹ Uwumbɔr bui ke, “Israel yaab aah nan tun mi titunwanbir Gibea aatiŋ ni buyoonn na, baa kee di cha. Kina pu le butɔb ga pii bi Gibea aatiŋ ni.

¹⁰ M ga pii titunwanbirdam bimina ki daa bitafal. Ŋitimbol ga kpaan ki tak bi, le m ga daa bitafal, baah tun titunwanbir sakpen pu na pu.

¹¹ “Israel nan bi n‑yoonn mubaa ke unaasal u bi bae tiwan mbamɔm na la, le ki gor kii ke u poi idi. Le m nan di ndɔ puin usil mu ŋan na pu, le ki di iŋmin pui u ke u tun lituln li pɔɔ jer kina na. M cha Juda dar ŋikujal, le ki cha Israel dar nkucham.

¹² Le m bui ke, ‘Ko nkpaakopɔɔn tii nibaa man, di mbimbinyaan bu, ki nan chee naah di nibaa tii mi pu na aanyoor. Ni ŋeer ke ni fenn gir ni min Uwumbɔr chee, le m ga dan ki nan di tinyoor gbiin nimi.’

¹³ Le ni yii ki di titunwanbir bun ki nan chee taanyoor. Ni jin nimi aanyamɔn aah joo ni pu na la. “Naah mak nimi aataan aatɔroku tiib, ni nimi aajab aawiwiir pu na,

¹⁴ le butɔb ga lir nimi aanib pu, le nimi aatim mu kpa tijawan ki pɔɔ na mɔmɔk ga kuln. Ni ga li bi ke ubɔr Salmann aah nan kuln Bef Arbel aatiŋ butɔb ni, ki ku natiib ni baabim pu na la.

¹⁵ Betel aatiŋ aanib, kina ga ŋa nimi, naah tun titunwanbir sakpen ti na pu. Butɔb aah ga piin buyoonn na, le Israel yaab aabɔr ga kpo.”