Hosea 1 - Uwumbɔr aagbaŋ

¹ Bibɔrb bimina aah nan jin jin nnaan ki paan paan tɔb pu n‑yoonn mu aan Jehoas aajapɔɔn Jeroboam mu nan ye Israel aabɔr na, le Uwumbɔr nan di tibɔr timina tuk Beeri aajapɔɔn Hosea: Juda aabɔrb ngbaan le nan ye Usia, uma le nan puen jin nnaan, le Jotam paan u pu, le Ahas mu nan paan Jotam pu, le Hesekia ti gbeln puwɔb.

Hosea aapuu ni waabim aabɔr

² Uwumbɔr aah nan puen di Israel yaab aabɔr ti tuk Hosea na, u nan bui Hosea ke, “Ti ban upii ki yoor, aapuu ngbaan aan li ye upii kpala, le waabim mu ga li bi ke uma na la. Kina le maanib mu yii mi, kaa ye binib bi dii mi na.”

³ Le Hosea nan ti yoor upii ubaa, bi yin u ke Gomer. Ute aayimbil le nan ye Diblaim. Baah nan ma baajan aabo u na nan ye ubijabo la,

⁴ le Uwumbɔr bui Hosea ke, “Yin u ke ‘Jesreel,’ ba pu? naan yunn le m ga daa Israel aabɔr aatafal, uyaaja Jehu aah nan ku binib bi bi Jesreel ni na pu. M ban m kuln Jehu aanaan aadichal la.

⁵ Le n‑yoonn ngbaan m ga bii Israel aajab aapɔɔn, Jesreel aafataŋ ni.”

⁶ Gomer nan ki ma ubo uken, n‑yoonn mumina ma kan, u nan ye upiibo la. Le Uwumbɔr bui Hosea ke, “Yin u ke ‘Maaneen,’ ba pu? maan ki li neen Israel aanib, kaan ki di cha pinn bi.

⁷ Tɔ, m ga li gee Juda yaab ma. Min, Bidindaan Uwumbɔr ga gaa bi lii, m mu aan di kijaak aajum, bee itɔi ni ipiin, bee itaan ni bitandam tun li.”

⁸ Gomer aah lii waapiibo ngbaan na, u nan ki dek, le ki ki ma ubijabo.

⁹ Uwumbɔr nan bui Hosea ke, “Yin u ke ‘Baa‑ye‑maanib,’ ba pu? Israel aanib aan ki li ye maanib, le m mu aan ki li ye Baawumbɔr.”

Israel aanaan ga ki gir maa

¹⁰ Israel aanib ga li wiir ke nnyusakpem aatambol na la. Bi ga li wiir jer baah ga kahn, bee bi ŋaŋ bi pu na. Le Uwumbɔr bui bi n‑yoonn mue ke, “Naa ye maanib,” tɔ, n‑yoonn choo le u ga nan bui bi ke, “Ni ye min Uwumbɔr u bi na aabim la.”

¹¹ Juda aanib ni Israel aanib ga ki gir kpaan kimɔbaan. Bi ga kpaan le ki ban usaloln ubaa, le bi ga ki pɔr ki kan nkam baatiŋ ni. Een, Jesreel aawiin daal ga li ye nwinkpaan la.