Hagai 2 - Uwumbɔr aagbaŋ

Uwumbɔr aadichapɔln ngbaan aah ga li ŋan pu na

¹ Libinbaal ngbaan aaŋmalole aawiin moninko ni mubaa daal, le Uwumbɔr nan ki cha waabɔnabr Hagai ki len tibɔr timina.

² U nan bui Hagai ke u len Juda aayidaan Serubabel, ni Utotoorninkpel Josua, ni binib ngbaan chee ki bui bi ke,

³ “Unii ubaa bi ni ponn ni ki ga ŋmaa teer njan Aadichal aah nan ŋan pu na aa? Li bi ni chee kinye dandana? Nibaakan, laan li ye nibaa ni chee kpala.

⁴ Tɔ, Serubabel, cha aataakpab pɔɔk; Utotoorninkpel Josua, aa mu cha aataakpab pɔɔk; nimi bimɔk bi kitiŋ ngbaan ni na, cha nitaakpab pɔɔk. Min Uwumbɔr Mpɔɔnsakpiindaan bi ni chee, kina pu na, li tun lituln ngbaan man.

⁵ Naah nan nyan ni Ijipt aatiŋ ni na, m nan puu ke m ga li bi ni chee n‑yoonn mɔmɔk. M beenin bi ni chee, kina pu na, ni taa san ijawaan man.

⁶ “Naan ki yunn le m ga dam paacham, ni taab, ni kitiŋ, ni nnyusakpem.

⁷ M ga nyaŋ ŋitimbol mɔmɔk, ki joo ni ŋaawangol do, le liwangol ga gbiin Maadichal ni.

⁸ Dulnyaa wee aakunabr ni salmaa mɔmɔk ye min yaan la.

⁹ Maadichapɔln limina ga li ŋan jer likpokl na pel pel, nima chee le m ga tii maanib nwankam ni nsuudoon.” Uwumbɔr Mpɔɔnsakpiindaan le len kina.

Uwumbɔr aabɔnabr aah buen ti baa bitotoorb mbaan mu na

¹⁰ Darius aah nan ye Pesia aabɔrkpaan ki ti saa ŋibin ŋilee pu na aaŋmawae aawiin moninko ni inaa daal le Uwumbɔr Mpɔɔnsakpiindaan nan ki cha waabɔnabr Hagai ki len tibɔr timina.

¹¹ U nan bui ke, “Baa bitotoorb ki bee mbaan mue aabɔr.

¹² Unii yaa lee kitork aanann ti bi chain aan bi di ti tii Uwumbɔr na ki di poo waabɔkul ni; udaan yaa nan cha waabɔkul ngbaan meeh boroboro, bee baah mɔn bisaa bu na, bee ndaan, bee olif aakpan, bee tijikaar tibaa kan, kina ga ŋmaa cha kina aajikaar ŋa chain aa?” Hagai aah baa mbaan ngbaan na, bitotoorb ngbaan nan bui ke, “Aayii.”

¹³ Le Hagai ki baa bi ke, “Unii yaa meeh linikpol aan ki kpaln tijɔŋ aanii, ki yaa nan ki meeh tijikaar ngbaan kan, kina ngbaan ga ŋmaa cha kina aajikaar kpaln tijɔŋ aajikaar aa?” Le bitotoorb ngbaan kii ke, “Een.”

¹⁴ Le Hagai bui ke, “Uwumbɔr bui ke litimbol limina aanib bi kina le unimbil ni. Bi kpa tijɔŋ, le baah kon tijikaar ti mɔmɔk na mu kpa tijɔŋ; kina pu na, tiwan ni mɔmɔk bi nan di tii ipiin kitork aabimbiln pu na mu ye tijɔŋ aawan la.”

Uwumbɔr aah puu ke u ga ŋa waanyoor ŋa waanib pu pu na

¹⁵ Uwumbɔr nan bui ke, “Naa kan tiwan ni ŋa nimi na aa? Waahr aan ni nin piin ki ki gir maa Maadichal na,

¹⁶ ni ga nan buen lidikpukl libaa chee ki dak ke ni ga ti kan ndibim mu gbiin bɔtɔ tiib bilee na, le ki ti mui mu ye bɔtɔ ubaa baanja la. Ni ga nan buen ke ni ti chuun ndaan ikinja ilee, le ki ti mui mu ye nkinja mubaa baanja la.

¹⁷ M nan cha libuln li ton na, ni ŋitaatakpal ŋmeen dan nan bii naah kon tijikaar ti mɔmɔk na, le naa kee kpeln nimi aabimbin.

¹⁸ Din wee ye ŋmawae aawiin moninko ni inaa daal la, le ni bil Maadichal aadinyikl aatakpal doo. Tɔ, li lik man tiwan ni ga ŋa n‑yoonn mue ki joo cha na.

¹⁹ Tɔ, njikaabim mubaa aa gur, le ndaan aasubil ni ŋikakan, ni ŋisubil ŋiken na, ni olif aakpan aasui mu aa kee lun; ki nya din wee ki joo cha, m ga ŋa tinyoor ŋa ni pu.”

Uwumbɔr aah bui ke u ga ter Serubabel pu na

²⁰ Uŋmal ngbaan aawiin moninko ni inaa daal baan ngbaan,

²¹ le Uwumbɔr nan ki tii Hagai tibɔr tee ke u di tii Juda aayidaan Serubabel ke, “M ban m dam paacham ni kitiŋ

²² ki nyaŋ nnaan yayan mɔmɔk ki kuln mu aapɔɔn. M ga nyaŋ itaan aatɔroku tiib ni binib bi ŋaal bi na; itaan ga kpoi, le binib bi dik i pu na ku tɔb.

²³ Nwiin ngbaan daal le m ga lee sin maatutunn Serubabel, ki ga cha aa di maayimbil joo binib. Sin le ye unii u m lee u na.” Uwumbɔr Mpɔɔnsakpiindaan le len kina.