Hagai 1 - Uwumbɔr aagbaŋ

Uwumbɔr aah bui ke bi ki gir maa Waadichal pu na

¹ Darius aah nan ye Pesia aabɔrkpaan ki ti saa ŋibin ŋilee pu na aaŋmaloob aawiin mbaa daal, le Uwumbɔr nan cha waabɔnabr Hagai len tibɔr timina. Tibɔr ngbaan nan ye Juda aayidaan Serubabel u nan ye Sealtiel aajapɔɔn na, ni Utotoorninkpel Josua u nan ye Jehosadak aajapɔɔn na aabɔr la.

² Uwumbɔr Mpɔɔnsakpiindaan nan bui Hagai ke, “Binib bee bui ke n‑yoonn mumina aa ye n‑yoonn mu ŋan ke ti ki gir di maa Uwumbɔr Aadichal na.”

³ Le Uwumbɔr nan cha waabɔnabr Hagai di tibɔr timina nabr binib ngbaan ke:

⁴ “Maanib, ba ŋa ni koo ŋidichal ŋi ŋan na ponn ni, aan maadichal ma ber ki dɔ?

⁵ Naa waa tiwan ni bi ŋani nimi na aa?

⁶ Ni bun njikaabim pam, le ki tee nan chee njikaabim pɔkaa kina. Ni kpa tijikaar ni ji, le ki mu aa babr. Ni kpa ndaan ni nyu, le mu aa tee gbii nimi. Ni kpa tiwanpeenkaan, le ni mu aa leer nimi tiwoor. Bijab bi tun lituln ki gaal lipal na aapal aa fuur bi.

⁷ Ni bee tiwan ni cha nimina mɔmɔk ŋani nimi na aa?

⁸ Tɔ, buen ŋigongon pu man aan ki ti gaa idɔ ki nan gir maa Maadichal; aan ki ki doon mi ke naah ga doon mi pu na, aan nsui piir.

⁹ “Ni nan mak ke ni ga nan chee tijikaar sakpen, le naa nan kpann kpala. Le naah di tijikaar ngbaan kun linampal na, m pii ti libuln di buen. Ba ŋa aan m ŋa kina? Unii mɔk aanimbil aah man ubaa aadichal pu aan Maadichal ber ki dɔ na pu le cha m ŋa kina.

¹⁰ Kina pu le utaal aa bi, le tijikaar mu aa ŋmaa ŋa.

¹¹ Min le cha nweel dan kitiŋ ngbaan pu, ni ŋigongon, ni njikaabim aasar pu, ni ndaan aasubil aasui aasar pu, ni olif aakpan aasui aasar pu, ni tijikaar ti kitiŋ ga ŋmaa cha ti ŋa na pu, ni binib ni tiwakor pu. Mu dan tiwan ni mɔmɔk ni pɔɔn nibaa ke ni ko na pu.”

Binib ngbaan aah kii Uwumbɔr aamɔb pu na

¹² Le Serubabel, ni Utotoorninkpel Josua, ni binib bi mɔmɔk nan nyan ni tinaagbiir ni Babiloŋ aatiŋ ni ki gir ni na, ŋa Bidindaan Uwumbɔr aah bui bi ke bi ŋa pu na. Bi nan bee ke Uwumbɔr le tun waabɔnabr Hagai, nima pu na le bi san ijawaan le ki kii waamɔb.

¹³ Le Hagai u ye Uwumbɔr aatuun na bui binib ngbaan ke uma Uwumbɔr puu tipuur ke: “M bi ni chee la.”

¹⁴ Uwumbɔr nan pɔɔk unii mɔmɔk aataakpab ke bi tun Waadichal aatuln ngbaan: U nan pɔɔk Serubabel u ye Juda aatiŋ aayidaan na, ni Utotoorninkpel Josua, ni binib bi mɔmɔk nan nyan ni tinaagbiir ni ki gir ni na aataakpab.

¹⁵ Ubɔrkpaan Darius aah nan jin nnaan ki ti saa ŋibin ŋilee pu na aaŋmaloob aawiin moninko ni inaa daal le bi nan piin ki bi tun Bidindaan Uwumbɔr Mpɔɔnsakpiindaan Aadichal aatuln ngbaan.