Habakuk 3 - Uwumbɔr aagbaŋ

Habakuk aah mee limeel pu na

¹ Uwumbɔr aabɔnabr Habakuk aameel sɔ:

² Uwumbɔr, m ŋun saah tun lituln li na pu, le ijawaan chuu mi sakpen. Tɔ, ŋa timi aayoonn mumina ŋitukpaan ŋi aa nan ŋani na. Hali saaŋuul ponn ni kan, san timi kinimbaak.

³ Uwumbɔr ki nyan ni Edom aatiŋ ni ki choo; Uwumbɔr u ye chain na nyan ni Parann aagongon pu ki choo. Waanyuun gbiin paacham, le waapak mu gbiin kitiŋ kee pu.

⁴ Waah wiin pu na naahn nwiin aah wiin pu na la; uŋaal moor lak lak ke mmii na la, le waapɔɔn ma tee bɔr.

⁵ U cha iween le lolni u pu nsan, le nkun paa upuwɔb.

⁶ U yaa sil kan, kitiŋ deŋni la; le u yaa yaar lik kan, ŋitimbol jii. Ŋijoo ŋi bi n‑yoonn mɔmɔk na wur la; le n‑yoonn mɔmɔk aagongon na mu ber lir kitiŋ. Ŋima pu le u nan chuun n‑yaayoonn na.

⁷ M nan kan ke ijawaan nan chuu Kusann aanib, le Midiann aatiŋ aanib aawon gbaa.

⁸ Uwumbɔr, ŋimɔɔ pu le saaŋuul nan fii ii? nnyusakpem pu le saaŋuul nan fii ii? Aa nan jak saataan ni yaatɔroku tiib bi ye linyaŋ yaab na.

⁹ Aa nan gor saatɔm kiir, ki ban ipiin pam; Aa cha ŋimɔɔ puu ki bɔkl kitiŋ.

¹⁰ Le ŋijoo kan si ki mur fenni. Nnyusakpem nyan ni paacham ki lir ni; le nnyun mu bi kitiŋ na puu mpɔɔn pu, le mu aanyunkpenn fii jon paacham.

¹¹ Nwiin ni uŋmal aah kan saapiin ni saakpaatuŋ aah san mala mala pu na, le ni sil paacham chii.

¹² Aa nan di liŋuul bɔ dii kitiŋ kee pu; le saaŋuul ponn ni aa taa taa ŋitimbol pu.

¹³ Aa nan dan ke aa ti gaa saanib ni saah nyan ubɔr u na lii la. Aa nan kuln titunwanbir aatiŋ aayidaan, aa nan doo u kookoo la.

¹⁴ Aa di ubaa aakpaatuŋ le too chaar uyil buyoonn waajab chii ni ke bi nan jenn timi, ki mɔɔni ke baah ban bi ti loon le ki ku doo bigiim bi bi limukl ni na.

¹⁵ Aa di saataan taa taa nnyusakpem, ki taa taa nnyun mu ti kpaln tipupur.

¹⁶ M ŋun timina mɔmɔk pu le mpobil gbaa, le mmɔgban jii ijawaan pu, le nwon mɔmɔk kpo, le ntaa jii. Le m tee ga mɔr ki li kii nwiin mundaal Uwumbɔr ga daa binib bi tak timi na aatafal na.

¹⁷ Ŋikakan yaa kaa ŋeen, le ndaan aasubil mu yaa kaa baa isui pu, olif aakpan aasui mu yaa yii kaa lun, le tijikaar mu yaa kaa ŋa ikpaakon ni, ipiih mu yaa kaa bi kibɔkpuk ni, le inaa mu yaa kaa bi tinaabar ni kan,

¹⁸ m tee ga li mɔɔni Uwumbɔr pu, m ga li kpa mpopiin Uwumbɔr u gaal mi lir na pu.

¹⁹ Ndindaan Uwumbɔr le ye maapɔɔn; u ŋa maataafar ke upeeman aataabuseen na la, le ki kii mi ŋijoo paab.