Habakuk 2 - Uwumbɔr aagbaŋ

Uwumbɔr aah ki gar Habakuk pu na

¹ M ga jon maakikiib aadifɔfɔk pu, ki ti li ka nima, ki lik Uwumbɔr aah ga bui mi pu ke m len na, ni ngarm mu u ga tii mi maabɔr ti m len na pu.

² Le Uwumbɔr gar mi ke, “Ŋmee tibɔbɔrkaan ti m ga kpiir tuk si na tiyakr aapen pu, aan unii umɔk yaar tuur ti pu na ga ŋmaa karn ti;

³ ba pu? tibɔkpiirkaan ngbaan aayoonn aa kee ŋeer ke ti gbiin, ti ye ndoon aabɔr la, le ki ga dan mala ki nan gbiin kina. Nibaakan, ti ga yunn siib, aa mu tee li kii ti, ti ga sil dan kaan yunn.

⁴ Tibɔr ngbaan sɔ: ‘Utunwanbirdaan aan ŋmar, le uninyaan aah gaa Uwumbɔr ki kii na, u ga li kpa limɔfal.’”

Titunwanbirdam aah kuln pu na

⁵ Mbamɔn, liwangol ŋmanni unii la, u kpa kigaak le kaa tee kpa lifuur ma. Waah kpa kikumɔŋ ke likaakul ki bi ke nkun na, waa babr tiwan nibaa, le ki nyaŋni ŋitimbol ki chur binib mɔmɔk tinaagbiir.

⁶ Bi mɔmɔk ga ŋa u mbɔnyun ni yaansara ki len ke, “Unii u kuun kinaayuk aawangol ki gaal binib aawan mpɔɔn pu bilni na aamɔfal ga kuln. Kina aatuln ga yunn kinye?”

⁷ Libuul ngbaan ni le binib bi ye saapɔndam na ga fii sil. Bi ga finn ngeen pu, le ki cha ijawaan chuu si, le sin aabaa ga kpaln baapɔndaan.

⁸ Saah gaa ŋitimbol pam aawangol mpɔɔn pu pu na, kina le binib bi ŋmar na mu ga nan gaa saawangol; ba pu? aa ku binib pam ki kuln baatim ni binib bi mɔmɔk bi mu ni na.

⁹ Saamɔfal junn a. Aa di mpɔɔn ni beebee le ki di gaa binib aawangol le ki kpaln uwankpadaan, le ki pɔɔn aabaa ke aa maa saadichal paacham ki nya mbiin ni tibɔr ni.

¹⁰ Aa ban isan ki kuln binib pam aamɔfal, le ki joo ni inimɔɔn nan lii saadichal pu, ki lann aabaa aamɔfal.

¹¹ Tidir aagon aatakpal wii saabiin pu la, le ilɔkdɔ ti keei.

¹² Saamɔfal junn a. Aa di titunwanbir naan kitiŋ, le ki di linikul maa kitiŋ ngbaan siin.

¹³ Uwumbɔr Mpɔɔnsakpiindaan le nan siin ke binib ngbaan aatotoŋ li ye idɔ i ga tuur mmii na, ki mɔk ke ŋitimbol nan tun nimina mɔmɔk fam.

¹⁴ Nnyun aah bi ni kookoo nnyusakpem ponn ni pu na, kina le binib ga li nyi Uwumbɔr aah kpa mpɔɔn sakpen pu na dulnyaa wee mɔmɔk ni.

¹⁵ Tibɔbir bi aa pu la. Sin le bar ŋisubil aadaan lidabuul ni tii biken le bi ti gbii ki dɔ bi ŋmeen ki jinn bibaa inimɔɔn aanimbil ni.

¹⁶ Sin le ga kan inimɔɔn, naan li ye kipak. Sin aabaa ga nyu ndaan ki gbii. Uwumbɔr le ga daa aatafal ki cha inimɔɔn biin saapak pu.

¹⁷ Mbiin mu aa nan di ŋa Lebanonn aachook na ga gir ni aa pu, le saah nan ku tiwakor ti na ga cha ijawaan chuu si, ba pu? aa ku binib pam ki kuln baatim ni binib bi mɔmɔk bi mu ponn ni na.

¹⁸ Liwaal kpa ba aanyoor? Unibɔn le naan li, le li joo inyamɔn baanja tuk si. Unii u naan li na tii li naadii, le li mu aa tee ŋmaa len tibɔr.

¹⁹ Saamɔfal junn a; ba pu? aa bui lidɔgeln ke, “Finn ngeen pu,” le ki ki bui litakpal li kaa kpa kifuurk na ke, “Finn ngeen pu.” Liwaal ga ŋmaa kpiir tiwan nibaa tuk si ii? Bi ga di salmaa ni tikunabr le boon li, le li mu aa tee kpa kifuurk.

²⁰ Uwumbɔr bi Waadichal li bi chain na ni, cha kitiŋ kee mɔmɔk ŋmin chii unimbiin ni.