Habakuk 1 - Uwumbɔr aagbaŋ

¹ Uwumbɔr aah nan kpiir tibɔr ti tuk waabɔnabr Habakuk na sɔ.

Habakuk aah len waanib aatunwanbir aabɔr pu na

² Uwumbɔr, ni ga yunn kinye aan aa ŋun maah yin si ki ban nterm pu na, aan ki nyan mi linimaln ni?

³ Ba ŋa aa cha m kani tibɔbir timina aaboln? Ni ga ŋa kinye aan aa li ka lik titunwanbir ki ŋmin? Mbiin ni mbimbin mu pɔɔ na le mann goln mi na, le kijaak ni kinikpakpak bi ni kookoo.

⁴ Nkaal aa kpa mpɔɔn, le ki bee fam, kina pu na, ibamɔn aa bi. Titunwanbirdam nyaŋ binib bi aabimbin ŋan na, le ki laŋ ibamɔn pu.

Uwumbɔr aah gar pu na

⁵ Uwumbɔr nan bui waanib ke, “Li lik man ŋitimbol ŋi mann goln nimi na, aan ki lik ke naah ga kan tiwan ni na ga chuu nimi ijawaan aan naan chuu nimi ijawaan. M ban ke m ŋa tiwan ni binib yaa tuk nimi ni pu na kan, naan tii naadii na la.

⁶ M ban ke m di mpɔɔn ŋa Babiloŋ aanib bi kpa mbiin kaa san nibaa na aaŋaal ni la. Bi chuun dulnyaa wee mɔmɔk ni ki ban ntim ke bi nyaŋ ki gaa mu la.

⁷ Bi ye binib bi biken san bi ijawaan sakpen na la, le ki kpa kigaak ki ŋani baah gee pu na.

⁸ “Baataan ŋmaa san mala mala ki jer ipeenaamuun, le ki bir jer nkon aah joo takɔtiib bi na. Baatandam nyan ni dandar aatim ni le ki jak ni baataan, baataan aataagbendun pɔɔ sakpen. I booni ke ŋikaagii le aah booni ke ŋi ti chuu tinann na.

⁹ “Baajab choo bi ti nyaŋ ntim mɔmɔk. Bi wiir pam, ki nya ni liwipuul wɔb ke kitaabuŋ na. Le baah chur binib bi tinaagbiir na wiir ke litambol na.

¹⁰ Bi lik seeni bibɔrb le ki laa baaninkpiib. Baah maa ŋigon kiir ntim mu aan mu pɔɔ na kibaa aa ŋmaa sil kiir bi, bi kuun titan le ti din kaagon, le ki nyaŋ ki,

¹¹ le ki chuun mala ke libuln na ki jer, titunwanbirdam bi aapɔɔn ye baawaal na le na.”

Habakuk aah ki gir bui Uwumbɔr binib aah tun titunwanbir pu na

¹² Uwumbɔr, ki nyan mpiin na, sin le ye Uwumbɔr. Sin le ye Maawumbɔr u bi chain kaa kpa ndoon na. Uwumbɔr, Ndindaan ni maakikiir, sin le lee Babiloŋ yaab ki cha bi kpa mpɔɔn ke bi ŋmaa daa timi aatafal.

¹³ Tɔ, ba ŋa saa daa bibiindam ngbaan aatafal? Aanimbil bi chain pam kaan ŋmaa lik titunwanbir, kaan ŋmaa li si lik aan binib ŋani tiwan ni kaa ŋan na. Kina pu na, ba ŋa aa ka ŋmin aan bi bi kuln binib bi aabimbin ŋan jer baabimbin na?

¹⁴ Binib ye ijan i bi nnyun ni kaa kpa ujojoor na aa?

¹⁵ Babiloŋ yaab ngbaan joo ijapiin le chur binib ke baah ye ijan le na. Bi joo baapɔr le dar bi cha, le ki tar mpopiin pu.

¹⁶ Bi kpaan dooni baapɔr ngbaan le ki toor kitork tii ti; ba pu? tima le tii bi baah ban tiwanyaan ni mɔmɔk na.

¹⁷ Bi ga li joo baajaak aajum kuln ŋitimbol, kaa san ŋi kinimbaak kina le ki cha aa?