Esta 9 - Uwumbɔr aagbaŋ

Juu yaab aah kuln baadim pu na

¹ Adar aaŋmal aawiin kipiik ni itaa daal nan fuu ni, nwiin mundaal nkaal na aatuln ga piin na, nwiin mundaal Juu yaab aadim nan ban bi kuln bi na. Le Juu yaab labr fenn lir bi pu ki nyaŋ bi.

² Juu yaab aakookoo yaan, nnaan ngbaan ni, bi nan gor bibaa ke bi tak unii umɔk nan pɔɔni ubaa ke u tii bi titotonn na. Ŋipepel mɔmɔk aanib nan san bi ijawaan la, le ubaa aa nan ŋman bi.

³ Ibamɔn, nnaan ngbaan aapepel mɔmɔk aaninkpiib, ni biyidam, ni nnaan aanib, ni ŋaaninkpiib mɔmɔk nan kpee Juu yaab pu la; ba pu? bi mɔmɔk nan san Modekai ijawaan la.

⁴ Nnaan ngbaan ni aanib mɔmɔk nan nyi ke Modekai gur ye mpɔɔn aanii le ki bi libɔrchiln ni, le waapɔɔn moo kpae.

⁵ Kina pu na, Juu yaab nan ga ŋmaa ŋa baadim baah ban pu na. Bi nan di kijaak aajum le ki di tak bi, ki ku bi.

⁶ Litiyil Susa ponn ni, Juu yaab nan ku binib ikui iŋmu la.

^7-10 Hamedata aajapɔɔn Hamann u nan ye Juu yaab aadin na aajapɔtiib kipiik bimina: Pasandata, ni Dalfonn, ni Aspata, ni Porata, ni Adalia, ni Aridata, ni Pamasta, ni Arisai, ni Aridai, ni Faisata nan bi baah ku binib bi na ponn ni. Bi mu aa nan tee yoor baawangol.

¹¹ Liyaadaal baan ngbaan le baah ku binib bimɔk Susa aatiŋ ni na aakahm nan fuu ubɔr chee.

¹² Le u bui Ubɔrpii Esta ke, “Susa aatiŋ ni baanja bi ku binib ikui iŋmu, le Hamann aajapɔtiib kipiik na mu kpee. Aa dak ke bi ga li ŋa kinye nnaan aapepel na mɔmɔk ni? Ni ye ba le aa ki ban? Saah ban ni na, aa ga kan ni. Bui mi saah ban ni na, aan ki kan ni.”

¹³ Le Esta bui u ke, “Ni yaa ga li mɔ si mpɔɔndaan kan, cha Juu yaab bi bi Susa ni do na fe ki ŋa baah ŋa pu din na; ki mu cha bi di Hamann aajapɔtiib kipiik ngbaan aanikpol leen ŋikpan pu.”

¹⁴ Ubɔr nan cha bi ŋa kina, le ki moon Susa ponn ni tibɔr ngbaan. Bi nan di Hamann aajapɔtiib kipiik ngbaan aanikpol leen ŋikpan pu, binib mɔmɔk aanimbil ni.

¹⁵ Adar aaŋmal aawiin kipiik ni inaa daal Juu yaab bi bi Susa ni na nan ki gor bibaa pu ki ki ku binib ikui itaa kitiŋ ngbaan ponn ni. Liyaadaal ngbaan mu, baa nan ki yoor baah ku binib bi na aawangol.

¹⁶ Juu yaab bi nan bi ŋipepel mɔmɔk ni na mu nan gor bibaa pu ki sil kiir umɔk tak bi na. Bi nan ku baadim ngbaan aanib ŋichur imonko itaa ni kipiik ni ŋiŋmu la. Bi mu aa nan yoor baah ku binib bi na aawangol.

¹⁷ Bi nan tun kina Adar aaŋmal aawiin kipiik ni itaa daal la. Naah woln na, iwiin kipiik ni inaa daal na, ŋipepel ŋi bi igbaan na aanib aa nan ki ku binib, bi nan jin njim le ki mɔɔni.

¹⁸ Juu yaab bima bi Susa ni na ma, nan jin njim ni lifuur aawiin, iwiin kipiik ni iŋmu daal la; ba pu? iwiin kipiik ni itaa daal, ni iwiin kipiik ni inaa daal le bima nan ku baadim, ki di cha kipiik ni iŋmu daal kaa ki ku.

¹⁹ Nimina pu le Juu yaab bi koo itingbaan ni na ji njim, ki tii tɔb ipiin, ki kpa mpopiin, Adar aaŋmal aawiin kipiik ni inaa daal.

Njim mu bi yin mu ke Purim na aabɔr

²⁰ Modekai nan ŋmee tiwan nimina mɔmɔk bil; ki ki ŋmee tigbann tii Juu yaab bimɔk duun Susa na, ni bimɔk bi ni daa na, Pesia aanaan mɔmɔk ni,

²¹ ki bui bi ke bi li nyi ki di Adar aaŋmal aawiin kipiik ni inaa, ni iwiin kipiik ni iŋmu daal libiln mɔmɔk ni, ŋa lifuur aawiin;

²² ba pu? iwiin ngbaan daal le Juu yaab nan nyaŋ baadim; uŋmal ngbaan le nan ye uŋmal u mpombiin ni itaakpayɔl kpaln mpopiin ni mmɔɔn na. U nan bui bi ke iwiin ngbaan daal kan, bi li ji njim ki tii tɔb tijikaar aapiin, ki tii binib bi ye bigiim na mu.

²³ Le Juu yaab ngbaan nan dii Modekai aah bui bi pu na, le njim ngbaan di ŋa libiln mɔmɔk aakaal.

²⁴ Juu yaab aadin, Hamedata aajapɔɔn Hamann, u aayaaja ye Agag na, nan too inaan i bi yin i ke “Purim” na, ke u bee nwiin mu u ga di kuln Juu yaab na; u nan kpokl ke u kuln bi la.

²⁵ Le Esta nan buen ubɔr chee, le ubɔr siin nkaal mu bi ŋmee bil aan Hamann tee labr jin nkaal ngbaan aafalaa u u nan kpokl ke Juu yaab nan ji na; bi nan leen u ni ujapɔtiib ŋikpan pu.

²⁶ Nima pu le bi yin lifuur aawiin ngbaan ke Purim. Modekai aah nan ŋmee tigbann ti na pu, ni tiwan nimɔk nan ŋa bi na pu,

²⁷ le Juu yaab nan cha ni ŋa baakaal, ni biyaabitiib aakaal, ni unii umɔk kpaln Juu aanii na aakaal ke n‑yoonn ngbaan yaa nan fuu ni libiln mɔk ni kan, iwiin ilee ngbaan ga li ye lifuur ni njim aawiin ke Modekai aah nan mɔk bi pu na la.

²⁸ Ni nan ŋa nkaal ke Juu aadichal ŋi ga nan li bi n‑yoonn mu choo na, ki bi ŋipepel mɔmɔk ni ntim mɔmɔk ni na, li teer ki ŋa Modekai aah siin pu ki tii Purim aawiin ilee ngbaan ki joo cha na.

²⁹ Le Abihail aabisal, Ubɔrpii Esta, ni Modekai mu ŋmee kigbaŋ ki di waaninkpir aapɔɔn mɔmɔk nyii ki pu, Purim aabɔr ti Modekai puun ŋmee na pu.

³⁰ U nan ŋmee kigbaŋ ngbaan tii Juu yaab bimɔk bi ŋipepel nkub ni moninko ni ŋilole ŋi bi Pesia aanaan ni na. Kigbaŋ ngbaan nan mɔk ke Juu yaab li kpa nsuudoon ni limakl ke nibaa aan ŋa bi;

³¹ ki mɔk bi ni biyaabitiib baah ga li nyi Purim aawiin ilee na pu na, ke baah ŋani bumɔb aalulm ni baapombiin aayoonn pu na. Modekai ni ubɔrpii Esta mɔmɔk le nan siin kina.

³² Esta nan cha bi ŋmee Purim aabɔr ngbaan nnaan aagbaŋ pu la.