Esta 8 - Uwumbɔr aagbaŋ

Baah bui Juu yaab ke bi li kii bibaa pu na

¹ Liyaadaal baan ngbaan le Ubɔrkpaan Sekes nan di Hamann, u nan ye Juu yaab aadin ngbaan na aawangol mɔmɔk di tii Ubɔrpii Esta. Esta nan bui ubɔr ke u ni Modekai ye unibaan la; nima pu na, liyaadaal ngbaan ki joo cha Modekai nan gur koo ubɔr chee waadiik ni la.

² Le ubɔr chuu ŋmaar waabɔmbik ki ye waamɔkl na, aan u nan chuu gaa Hamann chee na, di tii Modekai. Esta nan cha Modekai le lik Hamann aawangol li ubɔr nan di tii u na.

³ Le Esta nan lir gbaan ubɔr aanimbiin ni, ki wii, ki len u chee tibɔr, ki nan gaŋ u ke u lik ki taa cha Hamann u ye Agag aayaabil na aalandawanbiik ki u nan siin ke bi ku Juu yaab mɔmɔk na tun lituln.

⁴ Ubɔr nan di waasalmaa aajaangbeek na di mɔk u, le u fii sil ki bui ke,

⁵ “Ni yaa ga li mɔ si mpɔɔndaan, aan aa yaa lik faar mi ki dak ke ni ŋan aa chee kan, m gaŋ si ke aa siin nkaal ke Hamann aah nan siin ikaal i na taa tun lituln; ikaal i Hamedata aajapɔɔn u aayaaja ye Agag na nan siin ke bi kuln Juu yaab, nnaan mue ni na.

⁶ Tibɔbir timina yaa nan pii maanib, aan bi ku bi mɔmɔk doo kan, m ga ŋa mbaa kinye?”

⁷ Le Ubɔrkpaan Sekes bui Ubɔrpii Esta ni Modekai, u ye Juu aanii na ke, “Lik man, m cha bi leen Hamann iŋmin, waah nan kpokl ke bi ku Juu yaab pu na pu, ki di waawangol di tii Esta.

⁸ Tɔ, nkaal yaa siin ubɔr aayimbil pu, aan bi di nnaan aamɔkl aabɔmbik nyii mu pu kan, ubaa aan ki ŋmaa kpeln mu. Naah ga ŋa pu na le ye ke: Ŋmee kigbaŋ tii Juu yaab mɔmɔk naah gee pu na; ni ga ŋmee ki maayimbil pu, ki di nnaan aabɔmbik nyii mu pu.”

⁹ Nimina nan ŋa ŋmataa, u bi yin u ke Sifann na aawiin moninko ni itaa daal la. Modekai nan yin ubɔr aagbaŋmeeb ki cha bi ŋmee tigbann tii Juu yaab, ni biyidam, ni nnaan aaninkpiib bimɔk bi nnaan aapepel nkub ni moninko ni ŋilole, ki nyan India aatingbaln, ki ti saa Kus aatingbaln ni na mɔmɔk. Tigbann na nan buen lipepel mɔmɔk, ni laaliin, ni laaŋmeen ni, ni Juu yaab, ni baaliin, ni baaŋmeen ni.

¹⁰ Modekai nan cha bi ŋmee tigbann ngbaan ubɔrkpaan Sekes aayimbil pu la, le ki di nnaan aamɔkl aabɔmbik nyii ti pu. Binib nan di libɔrdichal ni aataan le ki di tigbann ngbaan buen mala ŋipepel ngbaan mɔmɔk ni.

¹¹ Tigbann ngbaan nan mɔk ke ubɔr tii Juu yaab nsan ntim mɔmɔk ni ke bi gor bibaa pu ki li kii bibaa. Bijab yaa nyan ni linibol limɔk ni ki ban bi tak bi ni bipuutiib ni baabim na kan, bi fii sil ki kiir bi, ki ku doo bi; bi ku bi mɔmɔk, ubaa taa gur, ki yoor baawangol.

¹² Nkaal ngbaan aatuln nan ga piin Pesia Aanaan ni nwiin mundaal Hamann nan siin ke bi ku doo Juu yaab na, ŋmapiik ni ilee, u bi yin u ke Adar na aawiin kipiik ni itaa daal la.

¹³ Ni nan ye ke bi moon mu ke mu ye nkaal la, ki cha unii mɔmɔk li nyi mu ŋipepel ngbaan mɔmɔk ni, aan Juu yaab li kii bibaa baadim chee nwiin ngbaan daal.

¹⁴ Ubɔr nan cha bitandam di libɔrdichal ni aataan di san mala bi ti di tigbann ngbaan tii. Litiyil Susa ni aanib mɔmɔk mu nan ŋun nkaal ngbaan pu.

¹⁵ Tɔ, Modekai nan nyan libɔrchiln ngbaan ni, ki pee ŋibɔrbɔkul ŋi ŋmal nsiin ni mpem na, ni ŋikekenyaan ŋiken, ki chik salmaa aabɔryikpupuk ki ŋan sakpen na. Le Susa aatiŋ ni aasan mɔmɔk ni, binib faa mpopiin aafuuk;

¹⁶ ba pu? Juu yaab bi bi ki ponn ni na nan kan mpopiin ni ŋŋmarm, ni mmɔɔn ni linyaŋ.

¹⁷ Ntim mɔmɔk ni, ni ŋipepel mɔmɔk ni, nin chee bi nan karn ubɔr aakaal ngbaan na, Juu yaab nan kpa lifuur aawiin ki ji njim ki kpa mpopiin. Ibamɔn, binib bi kaa ye Juu yaab na pam nan kpaln Juu aanib; ba pu? bi nan gur san bi ijawaan la.