Esta 7 - Uwumbɔr aagbaŋ

¹ Le ubɔr ni Hamann nan buen bi ti ji Esta chee njim lelee.

² Baah bi nyu ndaan na le ubɔr ki gir baa u ke, “Ubɔrpii Esta, ni ye ba aan aa ban? Bui mi aan ki kan ni. M ga ŋmaa tii si maanaan ligeln libaa.”

³ Le Ubɔrpii Esta kii u ke, “Mpɔɔndaan, ni yaa ga li mɔ si aan aa tii mi maah mee pu na kan, maah ban tiwan ni na le ye m ni maanib aamɔfal.

⁴ Bi di m ni maanib kooh ke bi ku timi. Ni yaa kaa ba ye linikul, ki yaa ba ye tinaagbiir kan, m ba ga li ŋmin kaan muk si; tɔ, ni ye le ke bi ku doo ti mɔmɔk.”

⁵ Le Ubɔrkpaan Sekes baa Ubɔrpii Esta ke, “Ŋma ga kaa ki ŋa kina aawan? Uja ngbaan bi la chee?”

⁶ Le Esta nan gar u ke, “Timi aadin u ban u ku timi na le ye utunwanbirdaan Hamann wee.” Le Hamann gaar ka lik ubɔr ni ubɔrpii ijawaan ni.

⁷ Le ubɔr di liŋuul nyii fii, ki nyan kidiik ngbaan ni, ki nyan lipaal ki ti koo libɔrchiln ni. Hamann nan bee ke ubɔr ban u daa utafal tibɔr ngbaan pu la, le ki gaar puwɔb ke u gaŋ Ubɔrpii Esta aan u gaa waamɔfal lii.

⁸ N‑yoonn mu u lir gbaan Esta aajal li fɔk na pu ke u gaŋ u na, le ubɔr ki nyan ni lichiln ni ki koo ni kidiik ngbaan ni. Waah kan Hamann nima chee na, le u kaan lii ke, “Uja wee ban ke u chuu ubɔrpii nnimbil ni, mbaa aabɔrdichal ni, ki doon u chee la aa?” Ubɔr ti len kina door na, le waakikiib di likekeln biin Hamann aanimbil wɔb.

⁹ Le bi ponn ni ubaa, u bi yin u ke Habona na, bui ke, “Hamann ma kpaan kpaa ŋikpan ŋi fɔk sakpen na udo ke u leen Modekai u nan gaa si mpɔɔndaan aamɔfal lii na ŋi pu. Ŋaah fɔk pu na ye ŋitaa imonko itaa ni kipiik ni ŋiŋmu.” Le ubɔr bui ke, “Ti di Hamann leen ŋi pu man.”

¹⁰ Kina pu na, bi nan leen Hamann iŋmin, ŋikpan ŋi pu u nan kpaa ke u leen Modekai na. Le ubɔr aaŋuul nin sɔŋ.