Esta 6 - Uwumbɔr aagbaŋ

Ubɔrkpaan aah nyuŋ Modekai pu na

¹ Kinyeek ngbaan ubɔr aa nan ŋmaa geen; le u cha waatutunn yoor ni nnaan aagbann ki nan karn ti tii u.

² Baah nan karn ti na aabɔr tibaa nan ye Modekai aah nan ŋun baah nan kpokl ke bi ku ubɔr pu na, nkpokl mu Bigtana ni Teres, bijab bi nan kii ubɔr aadir na nan kpokl na.

³ Le ubɔr baa ke, “Kinye aan bi nan nyuŋ ki pan Modekai tibɔr tee pu?” Waanaagbiib nan gar u ke, “Baa tii u nibaa.”

⁴ Le ubɔr ki baa ke, “Maaninkpiib ponn ni ubaa bi do oo?” N‑yoonn ngbaan Hamann nan koo ni lichiln ni, u nan dan ke u nan bui ubɔr aan u cha bi leen Modekai iŋmin tiwan ni u cha bi kpaa siin na pu.

⁵ Le bi bui u ke, “Hamann le si do, ki kiir ke u kan si na.” Le ubɔr bui ke, “Cha u koo ni man.”

⁶ Le Hamann koo, le ubɔr bui u ke, “Unii ubaa bi le m gee ke m nyuŋ u. M ga ŋa u kinye?” Le Hamann dakl uneen ni ke, “Ŋma tee ye aan ubɔr ban u nyuŋ u sakpen kina? Ni ye mi la.”

^7-8 Kina pu le u kii ubɔr ke, “Cha bi yoor ni ŋibɔrbɔkul nan peen kina aaja, ŋibɔkul ŋi si aabaa peeni na. Cha bi yoor saataan aagbayɔk nan chiŋ aabaa aataan,

⁹ ki cha saaninkpiib ponn ni u kpa kipak na di tiwanpeenkaan ngbaan peen uja ngbaan, aan u diŋ utaan ngbaan pu, aan ki cha uninkpel ngbaan loln u pu nsan ki bɔ dii kitiŋ ponn ni, ki li moon ni ke, ‘Lik man ubɔr aah pan unii u u ban ke u nyuŋ u na pu na.’”

¹⁰ Le ubɔr nan bui Hamann ke, “Fii mala ki ban tiwanpeenkaan ngbaan ni utaan, ki di ni tii Juu aanii Modekai. Ŋa saah len pu na mɔmɔk. Aa ga kan u ka libɔrdichal aabisamɔb.”

¹¹ Le Hamann ban tiwanpeenkaan ni utaan ngbaan, ki di tiwanpeenkaan ngbaan peen Modekai. Le Modekai diŋ utaan ngbaan pu, le Hamann loln u pu nsan ki di bɔ dii kitiŋ ni, ki mooni tuk binib ke, “Lik man ubɔr aah pan unii u u ban ke u nyuŋ u na pu na.”

¹² Baah doo na le Modekai gir buen libɔrdichal aabisamɔb; le Hamann ma siir mala ki kun, ni inimɔɔn ŋmeen.

¹³ U nan bui upuu ni ujɔtiib na mɔmɔk tibɔr ti kan u na. Le upuu ni ujɔtiib bi kpa nlan na bui u ke, “Dandana wee, saapɔɔn gir cha Modekai chee la. U ye Juu aanii la, le saan ŋman u. U ga nyaŋ si.”

Hamann aah kpo pu na

¹⁴ Baah laa bi len kina na, le libɔrchiln ni aajab bi bi kpaa bi na koo ni mala ki nan yoor Hamann buen Esta aajim na ponn ni.