Esta 5 - Uwumbɔr aagbaŋ

Esta aah ŋa njimkpaam tii ubɔrkpaan ni Hamann pu na

¹ Baah lul bumɔb ki ti saa iwiin itaa daal na, le Esta di nnaan aawanpeenkaan peen ki buen ti sil ubɔr aah bi lichiln li na aabisamɔb, ki lik libɔrjal aadiik ni. Ubɔr nan bi ki ponn ni, ki ka libɔrjal pu, ki lik ni mbisamɔb wɔb.

² Ubɔr aah kan Ubɔrpii Esta si lipaal na, le u nan lik ki faar u, le ki yoor salmaa aajaangbeek na mɔk ni u. Le Esta buen ti di uŋaal mee ki.

³ Le ubɔr baa u ke, “Ubɔrpii Esta, aa ban ba? Bui mi saah ban tiwan ni na, le aa ga kan ni, hali ni yaa ye ke m di maanaan ligeln libaa tii si kan, m ga ŋa kina.”

⁴ Le Esta gar u ke, “Ni yaa ga li mɔ si mpɔɔndaan kan, m ga li gee ke aa ni Hamann dan nan ji njim mu m bi ŋani m tii nimi na kinyeek kee.”

⁵ Le ubɔr cha bi yin Hamann ke u dan mala, aan bi nan buen Esta aajim ngbaan ni. Le ubɔr ni Hamann buen Esta aajim ngbaan ni.

⁶ Baah bi nyu ndaan buyoonn na le ubɔr ki bui u ke, “Bui mi saah ban tiwan ni na, aan ki kan ni. M ga tii si saah ban ni na, hali aa yaa ban maanaan ligeln libaa kan, m ga tii si.”

⁷ Le Esta ki gar u ke,

⁸ “Mpɔɔndaan, aa yaa san kinimbaak ki ga tii mi maah ban pu na kan, m ga li gee ke aa ni Hamann fe ki li ye maacham fen ki nan ki ji njim muken. N‑yoonn ngbaan le m ga bui si maah ban tiwan ni na.”

Hamann aah kpokl ke u ku Modekai pu na

⁹ Hamann aah nyan njim ngbaan ni na, le ni nan mɔ u, le ulan doon suuna. Le u kan Modekai mbisamɔb, le Modekai aa gar ke u fii gbaan ki pak u, le ni chuu Hamann liŋuul pam.

¹⁰ Tɔ, u nan tee chuu ubaa le ki kun, le ki yin ni ujɔtiib di dan udo, le ki bui upuu Seres ke u mu nan kpee bi pu.

¹¹ U nan puk kipupuk bi chee, waah kpa liwangol pu na, ni waah kpa japɔtiib sakpen pu na, ni ubɔr aah tii u tininkpir ti na, ni waah nyuun ki jer ubɔr aaninkpiib biken pu na.

¹² Hamann nan ki len kpee ke, “Ubɔrpii Esta aa ki yin ubaa ki kpee mi ni ubɔr baanja le bi ti jin njim u chee, ki ki bui timi ke ti fe ki gir ni fen.

¹³ Tɔ, Juu aanii Modekai yaa beenin ka libɔrchiln aabisamɔb kan, nimina mɔmɔk aa kpa mi tinyoor tibaa.”

¹⁴ Le upuu ni ujɔtiib na mɔmɔk len ke, “Ba ŋa saa cha bi di ŋikpan kpaa tiwan ni fɔk sakpen na, ki ga pii ŋitaa imonko itaa ni kipiik ni ŋiŋmu na? Fen kichakpiik ni kan, aa bui ubɔr aan u cha bi leen Modekai iŋmin ni pu, le aa nin buen fen aajim ngbaan ni, ki li kpa mpopiin.” Hamann nan dakl ke baalandak ngbaan ŋan, le u cha bi kpaa tiwan ngbaan.