Esta 4 - Uwumbɔr aagbaŋ

Modekai aah ban Esta chee nterm pu na

¹ Modekai aah ŋun tibɔr ti mɔmɔk ŋa na, le u daa kar waawanpeenkaan mpombiin pu, le ki di tiwanpeenkaan ni saak kuub na peen, ki di nfatan puŋ uyil, ki bɔ dii kitiŋ ni, ki wii ikpowiil mpombiin pu,

² ki ti fuu libɔrdichal aabisamɔb. Waa nan koo; ba pu? ni nan ye nkaal ke unii u pee tiwanpeenkaan ni saak kuub na taa koo libɔrchiln ni.

³ Nnaan ngbaan aapepel mɔmɔk ni, nin chee tibɔr ngbaan nan fuu na, nan ye ikpowiil le Juu yaab ni. Bi nan lul bumɔb, ki wii ikpowiil ki pee tiwanpeenkaan ni saak kuub na ki dɔ nfatan ni.

⁴ Esta aanaagbiisapɔm ni bijab bi bi kpaa bi na aah bui u Modekai aah ŋani pu na, ni nan bii usui pam. U nan ban tiwanpeenkaan tun tii Modekai ke u chuu peer tiwanpeenkaan ni saak kuub na ki di waah di ni tii u na peen; le Modekai yii, kaa gaa ni.

⁵ Le Esta yin ni ubɔr aah di uja u bi kpaa u tii u na, bi yin u ke Hatak na, le ki bui u ke u buen Modekai chee ki ti baa lik ke ba ŋa u.

⁶ Hatak nan nyan buen Modekai chee kitiŋ ni, libɔrdichal aabisamɔb chee.

⁷ Modekai nan bui u tiwan ni ŋa u na, ni Hamann aah nan puu ke bi yaa ku Juu yaab mɔmɔk kan, waah ga tii nnaan aaninkpiib ŋimombil ŋi bi li joo tun nnaan ngbaan aatuln na.

⁸ U nan tii Hatak kigbaŋ ki bi nan tii Susa ni yaab ke bi ku doo Juu yaab mɔmɔk na. Modekai nan bui u ke u di ki ti tii Esta ki moo tuk u mbimbin ngbaan aah bi pu na, ki bui u ke u buen ubɔr chee ki ti gaŋ u waanib pu, ke ubɔr san bi kinimbaak.

⁹ Tɔ, Hatak nan ŋa kina,

¹⁰ le Esta nan di inaŋ yee giin Modekai chee ke:

¹¹ “Uja, bee upii yaa koo ponn ni aachiln ni ki kan ubɔr aan ubɔr ubaa aa yin udaan kan, udaan ngbaan aamɔfal junn le na. Nkaal ngbaan le na, unii mɔmɔk, ki nyan ubɔr aasusurb ni, ki ti saa binib bimɔk bi nnaan mue aapepel mɔmɔk ni na nyi kina. Tiwan ni ga ŋmaa cha unii ŋmar na le ye ke ubɔr yaa di waasalmaa aajaangbeek mɔk udaan kan, u ga ŋmar. Ni mu saa uŋmal ubaa le na le ubɔr nan tun yin mi.”

¹² Modekai aah ŋun Esta aanaŋ na,

¹³ le u nan tii u nsurm ke, “Taa dak ke aa ma aah bi libɔrchiln ni na, aa ga nyan tibɔr ngbaan ni.

¹⁴ Aa yaa ka ŋmin n‑yoonn mumina aaboln ni kan, nterm ga nyan ni paacham ki dan Juu yaab chee, aan bi ŋmar, le aa ma ga kpo, le aate aadichal ber. Ŋma ti ki nyi, nibaakan ni nan ye n‑yoonn mumina pu le bi di si ŋa ubɔrpii.”

¹⁵ Esta nan giin kii Modekai ke,

¹⁶ “Li cha ki ti kuun Juu yaab bimɔk bi Susa ni do na, ki cha ni mɔmɔk lul bumɔb man ki mee limeel tii mi. Ni taa nyu ki taa ji nwiin pu ni kinyeek ki ti saa iwiin itaa. M ni maanaagbiisapɔm mu ga ŋa kina. Nima aapuwɔb na, m ga buen ubɔr chee, hali ni yaa ye likoobil kan, m ga buen. M yaa ŋa kina, aan ni ye mi nkun kan, m kpo.”

¹⁷ N‑yoonn ngbaan le Modekai siir ki ti ŋa Esta aah nan bui u ke u ŋa pu na mɔmɔk.