Esta 3 - Uwumbɔr aagbaŋ

Hamann aah kpokl ke u kuln Juu aanib pu na

¹ Tiwan nee mɔmɔk aah ŋa ki jer na, le Ubɔrkpaan Sekes nan tii uja u bi yin u ke Hamann na tininkpir ti paa ubɔr pu na. Hamann aate le nan ye Hamedata, le uyaaja ye Agag.

² Waaninkpir ngbaan pu, ubɔr ngbaan nan siin nkaal ke waaninkpiib bimɔk tun waatuln na li gbaani ki pak u. Bi mɔmɔk nan ŋani kina, see Modekai baanja le nan yii, kaa ŋani kina.

³ Ubɔr aaninkpiib bi gur na nan baa u ke ba ŋa u yii ubɔr aamɔb;

⁴ ki nan pɔɔni bibaa iwiin mɔmɔk ke u li gbaani ki pak Hamann, le u yii kaan ŋun tii bi. U nan bui bi ke, “M ye Juu aanii la, kaan ŋmaa gbaan ki pak Hamann.” Kina pu na, bi nan bui Hamann tibɔr ngbaan ke bi lik Hamann aah ga ŋa Modekai aabimbin ngbaan pu na.

⁵ Hamann aah bee ke Modekai aan gbaan ki pak u na, liŋuul nan chuu u pam;

⁶ waah nan ki bee ke Modekai ye Juu aanii na, u nan ŋa nlandak ke waan daa Modekai baanja aatafal; u nan ŋa nlandak ke u ku Juu aanib bi mɔmɔk bi Pesia aanaan ni na.

⁷ Njan aaŋmal, u bi yin u ke Nisann na ni, Ubɔrkpaan Sekes aabin kipiik ni ŋilee waanaan ni, le Hamann nan cha bi too inaan, bi yin inaan ngbaan ke “Purim”, aan u bee nwiin ni uŋmal u ni u ga ku Juu yaab na. Ŋmapiik ni ilee, bi yin u ke Adar na aawiin kipiik ni itaa daal le nan ti jin.

⁸ Le Hamann nan bui ubɔr ke, “Linibol libaa bi ki yaa ki bi saanaan aapepel mɔmɔk ponn ni. Baah joo ikaal i na ni biken aakaal aa kpaa. Ki ki kpee na, baa kii saanaan aakaal; kina pu na, saan li gee ke kina aanib li bi.

⁹ Mpɔɔndaan, ni yaa ga mɔɔr si kan, siin nkaal ke bi ku bi mɔmɔk. Aa yaa ŋa kina kan, m puu ke m ga ŋmaa tii nnaan aaninkpiib tikunabr aakur aamombil ŋi aanyunyuun ga pii ŋichur ikui itaa ni imonko ilee na, bi li joo tun nnaan mue aatuln.”

¹⁰ Le ubɔr chuu ŋmaar waabɔmbik ki bi joo nyiir tigbann pu ke ni ye ubɔr aaseeraa na, ki di tii Juu yaab aadin Hamann u ye Hamedata aajapɔɔn, ki mu ye Agag aayaabil na.

¹¹ Le ubɔr bui u ke, “Binib ngbaan ni baamombil ye siyaan la; ŋa bi saah gee pu na.”

¹² Kina pu na, njan aaŋmal aawiin kipiik ni itaa daal le Hamann nan yin ubɔr aagbaŋmeeb le ki cha bi ŋmee tibɔr ti u ban na, nnaan ngbaan aaliin mɔmɔk ni, ni iliin ngbaan aaŋmeen ni, ke u tii bitinjoob mɔmɔk, ni biyidam mɔmɔk, ni nnaan aaninkpiib mɔmɔk. U nan ŋmee ti Ubɔrkpaan Sekes aayimbil pu la, ki di waabɔmbik nyii tibɔr ngbaan pu.

¹³ Bitaasam le nan di tigbann ngbaan buen nnaan ngbaan aapepel mɔmɔk ni. Ti nan mɔk ke nwiin mubaa daal, Adar aaŋmal aawiin kipiik ni itaa daal kan, bi ku Juu yaab mɔmɔk, binachipɔm ni bi por na, ni bipiib ni bibilb mɔmɔk. Bi kɔr bi mɔmɔk ki taa san bi kinimbaak, ki gaa baawangol mɔmɔk.

¹⁴ Tibɔr ngbaan nan ye unii mɔmɔk li nyi ti ŋipepel mɔmɔk ni, aan bi mɔmɔk gor ki li kii nwiin ngbaan daal.

¹⁵ Ubɔr nan cha bi moon tibɔr ngbaan litiyil Susa ni, le bitaasam mu di ti buen ŋipepel mɔmɔk ni. Le ubɔr ni Hamann nan kal ki nyu ndaan, le litiyil Susa ma ponn ni nan ŋa yɔl yɔl.