Esta 2 - Uwumbɔr aagbaŋ

Baah ŋa Esta Ubɔrpii pu na

¹ Nee aapuwɔb, ubɔr aaŋuul aah sɔŋ na, u nan beenin dak Fasti aah ŋa u pu na, ni u mu aah siin nkaal mu u pu na.

² Kina pu na, ubɔr aasusurb bi nan ŋɔk u pu sakpen na nan len ke, “Ba ŋa saa cha ti buen ki ti ban upii u ŋan kaa nyi uja na?

³ Aa ga ŋmaa ban bininkpiib saanaan aapepel mɔmɔk ni, ki cha bi li joo ni bisapɔm bi ŋan na saapiichiln ni, Susa litiyil ni do. Di bi ŋa Hegai, bijab bi bi kpaa bi na ponn ni ubaa, u lik saapiib na aaŋaal ni, ki cha bi toor bi ki tii bi kinyaan,

⁴ le aa nan nin nyan bi ponn ni usapɔɔn u aa gee u sakpen na ki di u kaan Fasti aajal pu.” Ubɔr nan dakl ke nsurm ngbaan ŋan, le ki dii mu.

⁵ Susa ponn ni, Juu aanii ubaa nan bi, bi yin u ke Modekai aan ute ye Jair; u nan nyan ni Benjaminn aamaal ponn ni, le ki ye Simei u nan ye Kis aajapɔɔn na aayaabil.

⁶ U nan bi Ubɔrkpaan Nebukadnesar aah nan chur Juda Aabɔrkpaan Jehoyachinn ni waanib bi nyan Jerusalem, ki di buen Babiloŋ ni tinaagbiir na ponn ni.

⁷ U nan kpa weesal ubaa, bi yin u ke Esta, le ki yin u ke Hadasa Hiibru yaab aaliin ni; u nan ye usapɔɔn u ŋan na la, ki kpa tiwon ti ye kinyaan aawon na. Ute ni una aah kpo na, le Modekai kpiin u ki di u ŋa ubisal.

⁸ Ubɔrkpaan aah nan moon ki ban bisapɔm bi ŋan na ke bi li joo ni bi Susa ni na, Esta nan ye bi ponn ni ubaa. Bi nan di u mu di ŋa libɔrchiln ni, Hegai u lik lipiichiln na aaŋaal ni.

⁹ Hegai nan gee Esta, le waanyaan nan chuu Hegai. Kina pu na, u nan piin waanyaan aabimbin aatuln mala, le ki tii u tijikaar ti ŋan na. U nan tii u kidiik ki ŋan jer ti mɔmɔk na lipiichiln ngbaan ni, ki tii u bisapɔm bi bi nyan ni bi libɔrchiln ni na ponn ni bilole, ke bi li tun tii u.

¹⁰ Modekai aasurm pu na, Esta aa nan cha ubaa bee ke u ye Juu aanii la.

¹¹ Iwiin mɔmɔk Modekai nan chuun kpak lipiichiln ngbaan aabisamɔb, ke u lik Esta aah bi pu na, ni tiwan ni ga ŋa u na.

¹² Kinyaan aabimbin aajoom ngbaan nan yunn ki ti saa libiln libaa la; bi nan joo mir aakpan ŋmir bisapɔm ngbaan ki ti saa iŋmal iloob, le ki di nkpan mu nu mɔ na mu ki ŋmir bi ki ti saa iŋmal iloob. Nee aapuwɔb, le bi ga di usapɔɔn ubaabaa di koon Ubɔrkpaan Sekes chee.

¹³ Waah ga nya lipiichiln ni pu ki buen libɔrchiln ni na, u ga ŋmaa peen waah gee tiwanpeenkaan ni na.

¹⁴ Usapɔɔn ngbaan ga buen nima kijook la, le kitaak yaa woln kan, bi nyan u buen lipiichiln liken ni, u ti li bi Sasgas, u ye uja u bi kpaa u aan u lik ubɔr aapuutiib na aaŋaal ni. Uma aan ki buen ubɔr chee see ubɔr gee u sakpen aan ki tun yin u waayimbil aah ye pu na ke u dan u chee.

¹⁵ Esta u ye Abihail aabisal, ki mu ye Modekai aaweesal, u u nan kpiin u ki di kpaln ubisal na aayoonn aah nan fuu ni ke u koo ubɔr chee na, u nan peen tiwan ni Hegai nan sur u ke u peen na la; le umɔk nan kan u na nan neen u.

¹⁶ Tɔ, Sekes aanaan aabiln lolole ni, ŋmapiik ni, uŋmal u bi yin u ke Tebef na, le Esta nan koo Ubɔrkpaan Sekes chee libɔrchiln ni.

¹⁷ Ubɔrkpaan nan gee u ki jer bisapɔm biken na mɔmɔk; le u nan kan ubɔr chee ngeehm ki jer biken na. U nan di kibɔryikpupuk chiŋ u ki ŋa u ubɔrpii, Fasti aajal pu.

¹⁸ Le ubɔr nan ŋa njim sakpem ke u nyuŋ Esta, le ki yin waaninkpiib mɔmɔk. U nan tii waanaan mɔmɔk aanib nwiin mubaa ke ubaa taa tun lituln, le ki tii ipiin pam.

Modekai aah gaa ubɔr aamɔfal lii pu na

¹⁹ N‑yoonn mue na, Modekai nan ye ubɔr aanaan ni aaninkpel ubaa la.

²⁰ Esta aa nan kee kpiir tuk ubaa ke u ye Juu aanii la. Modekai nan bui u ke u taa bui ubaa, le u kii waamɔb tibɔr tee pu, ke waah nan laa ye upiibo ki bi u chee ki keei waamɔb pu na.

²¹ Buyoonn Modekai nan bi waatuln ni, libɔrchiln ni na, Bigtana ni Teres, bijab bi bi kpaa bi na ponn ni bilee, bi nan kii Ubɔr Sekes aadir aabisamɔi na, nan gee liŋuul ubɔr pu, ki kpokl ke bi ku u.

²² Modekai nan ŋun tibɔr ngbaan le ki bui Ubɔrpii Esta, le u mu tuk ubɔr, ki mu bui u ke Modekai le kpiir ti tuk u.

²³ Bi nan fiir lik, ki kan ke tibɔr ngbaan nan gbii, kina pu na, bi nan leen bijab bilee ngbaan iŋmin ki ku bi. Ubɔr nan cha bi ŋmee tibɔr ngbaan mɔmɔk ŋa waanaan aagbann ponn ni.