Esta 1 - Uwumbɔr aagbaŋ

Ubɔrpii Fasti aah jinn Ubɔrkpaan Sekes inimɔɔn pu na

^1-2 Ubɔrkpaan Sekes nan ka waanaan aajal pu Susa aatiŋ ki ye Pesia aatiyil na, le ki lik ŋipepel nkub ni moninko ni ŋilole, ki nyan India aatingbaln ni ki ti saa Kus aatingbaln.

³ Waah nan jin nnaan ki nan saa libiln tatar ni na, u nan ŋa njim sakpem tii waaninkpiib bi lik waanaan na. Pesia ni Media aatɔb aajab nan bi nima, ki kpee biyidam ni bininyuum bi bi ŋipepel nkub ni moninko ni ŋilole na mu.

⁴ Njim ngbaan nan yunn ki ti saa iŋmal iloob, le u nan joo libɔrchiln ni aawangol, ni laanyaan, ni laapɔɔn mɔmɔk ki mɔk binib ngbaan.

⁵ Nee aapuwɔb na, le ubɔrkpaan ngbaan ki ŋa kina aajim ki tii bijab bi mɔmɔk bi litiyil Susa ni na, bigiim ni biwankpadam mɔmɔk. Njim mue mu nan yunn ki ti saa likpaakool libaa; bi nan ŋa mu libɔrchiln ni, nin chee ŋan sakpen na la.

⁶ Bi nan di tikokonn aakekenbɔn ni ŋipiin le di toor lichiln ngbaan ni, ki di ŋitan ŋi ye mbɔm ni mmam na di gbin tikunabr aabuen pu ki di chuu ŋitakpanyaan aagon. Bi nan di ncheen ni ŋitakpanyaan aabɔŋ aabɔŋ le di nak lichiln ngbaan ni, ki di ŋiyikukul aajal ŋi fɔk aan bi di salmaa ni tikunabr ŋa ŋi na di siin.

⁷ Bi nan nyu ndaan salmaa aayikur ni la, le ti mɔmɔk bi tibaabaa kaa kpaan; le ubɔrkpaan ngbaan di mbɔrdaan chann tichann.

⁸ Ndaan aa nan kpa ke ubaa taa nyu waah gee pu na, ubɔrkpaan ngbaan nan bui libɔrchiln ni aatutum ke bi cha unii mɔk nyu waah ga ŋman pu na mɔk.

⁹ Nimina aah bi ŋani na, le Ubɔrpii Fasti mu nan bi kibɔrnaakook ni ki ŋani kina aajim aaboln tii bipiib mu.

¹⁰ Nwiin lolole daal, le ubɔr nan bi nyu ndaan ki kpa mpopiin, le ki tun ti yin ni waajab bi bi kpaa bi na ponn ni bilole, bi nan ye ubaa aanaagbiib na, Mehumann, ni Bista, ni Habona, ni Bigta ni Abagta, ni Setar, ni Kakas.

¹¹ U nan bui bi ke bi ti li joo ni Ubɔrpii Fasti, aan u li chik nnaan aayikpupuk. Ubɔrpii ngbaan nan ye upii u ŋan na la, le ubɔr ngbaan nan ban u di waanyaan di puk kipupuk waaninkpiib ni bimɔk nan dan njim ngbaan ni na chee.

¹² Binaagbiib ngbaan aah nan ti bui Ubɔrpii Fasti ke ubɔrkpaan yin u na, u nan yii kaa dan. Le ni chuu ubɔrkpaan ngbaan liŋuul pam.

¹³ Tibɔr timina aaboln yaa nan ti dan kan, see ubɔr baa waaninkpiib bi sur u na, le ki nin ŋa waah ban pu na, kina pu le u nan yin ni bisusurb ngbaan, bima le ga nan bee waah ga ŋa pu na.

¹⁴ Bijab bi nan ŋmaa sur u n‑yoonn mɔmɔk na, le nan ye Kasena, ni Setar, ni Admata, ni Tasis, ni Meres, ni Masena ni Memukann; Pesia ni Media aaninkpiib bilole bi joo tininkpir ti nyuun nnaan ngbaan ni na le na.

¹⁵ U nan bui bi ke, “Min Ubɔrkpaan Sekes tun maanaagbiib Ubɔrpii Fasti chee ke u dan, le u yii maamɔb. Nkaal mɔk ke ti ŋa u kinye?”

¹⁶ Le Memukann bui ubɔr ni waaninkpiib ke: “Ubɔrpii Fasti aa sii ubɔr baanja la, u sii waaninkpiib mu la; mbamɔn, u sii uja umɔk bi nnaan mue taab na la.

¹⁷ Upii umɔk bi nnaan mue ni na yaa ŋun tibɔr tee kan, u ga piin ki li lik seeni uchal la. Bi ga bui ke, ‘Ubɔrkpaan Sekes tun yin Ubɔrpii Fasti, le u yii kaa buen u chee.’

¹⁸ Tɔ, Pesia ni Media aanaan ni aaninkpiib aapuutiib yaa ŋun tibɔr timina kan, bi ga piin ki bi tuk bichatiib, nwiin aa kee lir. Bipiib mɔmɔk aan ki li pak bichatiib, le nimina ga cha bichatiib aaŋuul fii bipuutiib pu.

¹⁹ Mpɔɔndaan, ni yaa ga piir aasui kan, cha ni nyan aamɔb ni ke Fasti taa ki cha aanimbil kan u. Cha bi ŋmee kina ŋa Pesia ni Media aakaal ponn ni, aan ubaa taa ki kpeln ni. Tɔ, aa di Ubɔrpii aajal mu ki di tii upii u ŋeer li na.

²⁰ Aa yaa cha bi moon tibɔr tee ni kookoo nnaan sakpiin mue ni kan, upii mɔmɔk ga lik pak uchal, kaan bui ke u ye ugiin bee upɔɔl.”

²¹ Ubɔrkpaan ngbaan ni waaninkpiib nan kii nsurm ngbaan; le ubɔrkpaan ngbaan nan ŋa Memukann aah nan len pu na.

²² U nan tun ŋipepel nkub ni moninko ni ŋilole ngbaan ni, lipepel mɔk ni laaliin, ni laaŋmeen ni, ki len ke uja mɔmɔk li ye waadichal ni aayidaan, aan waah len pu na ŋa kina.