Esra 9 - Uwumbɔr aagbaŋ

Esra aah mee Uwumbɔr pu na

¹ Nimina mɔmɔk aah ŋa doo na, le Israel yaab aayidam bibaa dan nan bui mi ke binib ngbaan, ni bitotoorb, ni Liifai yaab aa yakr binib bi koo gbɔk bi ki ye Amonn yaab, ni Moab yaab, ni Ijipt yaab, ni Kanaann yaab, ni Hef yaab, ni Peres yaab, ni Jebus yaab, ni Amor yaab na chee. Bi tun inimɔɔn, ni tijɔŋ aatun ŋi binib ngbaan tun na la.

² Bi yoor biwɔwɔmpiib la, le bima Uwumbɔr aanib bi bi chain na kpaln tijɔŋ aanib. Biyidam ni bininkpiib na le nan ye biyikpaadam.

³ Maah ŋun kina na, le m daa kar maawanpeenkaan, ni n‑yikpir, ni nlangban, mpombiin pu.

⁴ M nan ka nima, kinimbaak ni, le kijook aatork nan fuu, le binib kuun ni m chee, binib bi ijawaan nan chuu bi, bima Israel yaab Aawumbɔr aah nan len pu, binib bi nan nyan ni tinaagbiir ni ki gir ni na aatunwanbir pu na.

⁵ Kijook aatork aayoonn aah nan fuu ni na, le m fii maah ka nin chee ki wii na, ki beenin pee maawankpir na, le ki gbaan, ki yoor ŋŋaal paacham, ki mee Ndindaan Uwumbɔr.

⁶ M nan bui ke, “Uwumbɔr, inimɔɔn sakpiin pu, le maa ŋmaa yaar n‑yil paacham aanimbiin ni. Timi aatunwanbir muun ti nyaŋ, ki fɔk jer timi, ti fɔk ti pii kitaapaak.

⁷ Ki nyan tiyaaja tiib yoonn ki nan saa din, timi saanib tun titunwanbir sakpen. Timi aatunwanbir pu le timi, ni timi aabɔrb, ni timi aatotoorb koo ntiyayam aabɔrb aaŋaal ni, le bi ku timi, ki sun timi aawangol, ki di timi buen tinaagbiir ni. Ti kpaln binimɔɔnib le ki nan saa din wee.

⁸ Tidindaan Uwumbɔr, le aa san timi kinimbaak, ki cha ti ponn ni siib nyan tinaagbiir ngbaan ponn ni, ki ti koo nsuudoon ni, kitiŋ ki bi chain na ponn ni. Aa nyan timi tinaagbiir ngbaan ni, le ki tii timi limɔfapɔln.

⁹ Ti nan ye binaagbiib la, le aa nyan timi tinaagbiir ngbaan ni. Aa cha Pesia aatiŋ aabɔrb san timi kinimbaak, ki tii timi nsan ke ti li bi limɔfal ni, ki ki gir maa Saadichal li nan ber na, ki cha ti kan nsuudoon, Jerusalem ni Juda aatim muken ni.

¹⁰ “Uwumbɔr, ti ga ki len ke ba, tiwan ni mɔmɔk ŋa na pu? Ti ti ki gir yii ikaal ngbaan,

¹¹ ikaal i aa nan di tii saabɔnabr bi ye saatutum na, ke bi di tii timi na. Aa nan bui timi ke kitiŋ ki ti ban ti koo ki ponn ni na aa ŋan, ba pu? binib bi bi ki pu na di inimɔɔn ni tijɔŋ aatuln le gbiin kaapepel mɔmɔk.

¹² Bi nan bui timi ke ti yaa ban ke ti li kpa mpopiin kitiŋ ngbaan pu, aan ki nan kpaln tiyaabitiib aatiŋ kan, ti taa yoor baapiibim, ki taa ter bi aan bi kan tinyoor baatun ni.

¹³ Timi Aawumbɔr, saah ŋa timi tiwan mɔmɔk ki daa titafal pu na, ti nyi ke saa daa titafal ki ŋeer timi aatunwanbir, le ki cha ti ponn ni siib ŋmar.

¹⁴ Kina kan, ti ga ŋa kinye ki suln saakaal bɔr, ki ki gir yoor bibiindam ngbaan aapiibim? Ti yaa ŋa kina kan, saaŋuul ga fii ti pu sakpen, le aa ga kuln ti mɔmɔk aan ubaa taa ŋmar.

¹⁵ Uwumbɔr, Israel yaab Aadindaan, aa ye ubamɔndaan la, le ki tee cha ti ŋmar. Ti kpiir timi aataani tuk si; taa kpa nsan ke ti dan nan sil aanimbiin ni.”